លោក ឡយ អូស្ទីន នឹងជួបនាយករដ្ឋមន្ត្រី និងប្រមុខការពារជាតិជប៉ុន
តូក្យូ៖ រដ្ឋមន្ត្រីការពារជាតិសហរដ្ឋអាម៉េរិក លោក ឡយ អូស្ទីន នឹងជួបជាមួយនាយករដ្ឋមន្ត្រីជប៉ុន លោក ស៊ីហ្គេរូ អ៊ីស៊ីបា (Shigeru Ishiba) នៅថ្ងៃអង្គារទី១០ ខែធ្នូ ខណៈមួយថ្ងៃមុននេះ លោក អូស្ទីន បានព្រមានកងទ័ពអាម៉េរិកពីការគំរាមកំហែងដោយប្រទេសចិន។
លោក អូស្ទីន នឹងជួបជាមួយលោក អ៊ីស៊ីបា ហើយបន្ទាប់មកសមភាគីជប៉ុន លោក ជែន ណាកាតានី (Gen Nakatani) ខណៈជប៉ុនកំពុងរៀបចំសម្រាប់យុគសម័យថ្មីដែលស្របតាម«គោលនយោបាយ America First» របស់ប្រធានាធិបតីអាម៉េរិក ដូណាល់ ត្រាំ។
ប្រធានមន្ទីរបញ្ចកោណ កាលពីថ្ងៃចន្ទបានពិពណ៌នាអំពីការគំរាមកំហែងដែលបង្កឡើងដោយប្រទេសចិន នៅក្នុងសុន្ទរកថាមួយនៅលើនាវាផ្ទុកយន្តហោះ USS George Washington ឈរជើងនៅទីក្រុង Yokosuka ភាគខាងត្បូងនៃរាជធានីតូក្យូ។
លោកបាននិយាយថា៖«ចិនគឺជាប្រទេសតែមួយគត់នៅក្នុងពិភពលោក ដែលមានបំណងផ្លាស់ប្ដូរសណ្តាប់ធ្នាប់ពិភពលោក»។ លោកបន្តថា៖«ដូច្នេះហើយ អ្នកដឹងទេ យើងចង់ឃើញតំបន់នេះនៅតែបើកចំហសម្រាប់សេរីភាពនៃការធ្វើនាវាចរ និងសមត្ថភាពក្នុងការហោះហើរលើមេឃ និងផ្លូវអាកាសអន្តរជាតិនៅពេលណាដែលយើងចង់។ យើងនឹងបន្តធ្វើការជាមួយសម្ព័ន្ធមិត្ត និងដៃគូរបស់យើង ដើម្បីធានាថា យើងអាចធ្វើវាបាន»។
បុគ្គលិកយោធាអាម៉េរិកប្រមាណ៥៤០០០នាក់ កំពុងឈរជើងនៅក្នុងប្រទេសជប៉ុន ភាគច្រើននៅកោះអូគីណាវ៉ា ភាគខាងកើតកោះតៃវ៉ាន់។ គួរបញ្ជាក់ថា ដំណើរទៅកាន់ប្រទេសជប៉ុនរបស់លោក អូស្ទីន គឺជាដំណើរទស្សនកិច្ចលើកទី១៣ របស់គាត់ទៅកាន់តំបន់អាស៊ីប៉ាស៊ីហ្វិក ក្នុងនាមជារដ្ឋមន្ត្រីការពារជាតិ។ នេះបើយោងតាមមន្ទីរបញ្ចកោណ៕
