ឧបនាយករដ្ឋមន្ត្រី ហង់ជួន ណារ៉ុន ថ្លែងអំណរគុណសហភាពអឺរ៉ុប ដែលតែងតែផ្តល់នូវការគាំទ្រដល់ការអភិវឌ្ឍលើវិស័យអប់រំ នៅកម្ពុជា ជាង ២៥ឆ្នាំមកនេះ
ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងឯកឧត្តម Igor Driesmans ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា នាថ្ងៃទី១០ ខែធ្នូ ឆ្នាំ២០២៤ បានអញ្ជើញជាសហអធិបតីក្នុងសិក្ខាសាលាអន្តរជាតិស្តីពី «ការផ្សព្វផ្សាយកម្មវិធីព័ត៌មានអាហារូបករណ៍របស់សហគមន៍អឺរ៉ុប Erasmus+» (European Scholarships information Session for the benefits of the Cambodian Universities) នៅសាកលវិទ្យាល័យអង្គរ ខេត្តសៀមរាប ដោយមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួង លោក Bryan Fornari ប្រធាននៃកិច្ចសហប្រតិបត្តិការ EU Delegation តំណាងប្រទេសសមាជិកEU មកពី ប្រទេសបារាំង ហ្វាំឡង់ និងអាល្លឺម៉ង់ មន្ត្រីអប់រំមកពីអង្គភាពពាក់ព័ន្ធ សាស្ត្រាចារ្យ លោកគ្រូ អ្នកគ្រូ និងសិស្សនិស្សិត សរុបចំនួនប្រមាណ ៤៥០នាក់។
បន្ទាប់ពីស្តាប់មតិស្វាគមន៍របស់ ឯកឧត្តម អនុប្រធានក្រុមប្រឹក្សាភិបាល នៃសាកលវិទ្យាល័យអង្គររួចមក ឯកឧត្តមឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា បានលើកឡើងថាថ្ងៃនេះ សិស្សនិស្សិត លោកគ្រូ អ្នកគ្រូដែលមានបំណងចង់បន្តការសិក្សា នឹងទទួលបានព័ត៌មានពេញលេញផ្លូវការដោយផ្ទាល់ ពីតំណាងរដ្ឋសមាជិកEU មកពី ប្រទេសបារាំង ហ្វាំឡង់ និងអាល្លឺម៉ង់ និងអតីតនិស្សិតអាហារូបករណ៍ Erasmus+ ជាច្រើននៅទីនេះ ដើម្បីស្វែងយល់ពីឱកាសក្នុងការទទួលបានអាហារូបករណ៍ទៅសិក្សានៅប្រទេសក្នុងសភាពអឺរ៉ុប ព្រមទាំងបានចែករំលែកអំពីអត្ថប្រយោជន៍ជាច្រើននៃអាហារូបករណ៍ Erasmus+ ដែលផ្តល់ជូននូវការអប់រំប្រកបដោយគុណភាព កម្មវិធីសិក្សាឯកទេស(Specialized Programs) ការគាំទ្រលើផ្នែកសេដ្ឋកិច្ច ប្រាក់អាហារូបរករណ៍ (Value for Money) បទពិសោធន៍វប្បធម៌ និងអរិយធម៌ដ៏សម្បូរបែប។
មានប្រសាស៍នាឱកាសនេះដែរ ឯកឧត្តមបណ្ឌិតសភាចារ្យ ឧបនាយរដ្ឋមន្ត្រី បានចែករំលែកអំពីបទពិសោធន៍នៃការបន្តការសិក្សានៅបរទេស ជាពិសេសនៅសហភាពអឺរ៉ុប ដែលនិស្សិតនឹងទទួលបាននូវការអប់រំប្រកបដោយគុណភាពព្រមជាមួយចំណេះដឹង ជំនាញ និងបទពិសោធន៍ជីវិតដ៏សម្បូរបែបជាមួយវប្បធម៌ជម្រុះនៃប្រទេសជាសមាជិកសហភាពអឺរ៉ុប ដោយសមាហរណកម្មសេដ្ឋកិច្ចនៅអឺរ៉ុបជាសមាហរណកម្មដែលធំជាងគេ និងស៊ីជម្រៅជាងគេ ហើយប្រព័ន្ធអប់រំនៅអឺរ៉ុបមានលំហឧត្តមសិក្សា (High education Space) ដែលជាស្តង់ដានៃការអប់រំដូចៗគ្នា ធ្វើឱ្យនិស្សិតអាចទៅរៀននៅប្រទេសផ្សេងៗគ្នាក្នុងសហភាពអឺរ៉ុបបានដោយងាយស្រួល។ អាហារូបករណ៍ Erasmu+ ត្រូវបានលើកទឹកចិត្តសម្រាប់ទាំងអស់គ្នា មិនថាជាសិស្ស និស្សិត លោកគ្រូ អ្នកគ្រូ ឬមន្ត្រីរាជការឡើយ ដើម្បីអាចទៅបន្តការសិក្សាពង្រឹងពង្រីកចំណេះដឹង ជំនាញ ដកបទពិសោធន៍ការងារ និងវិញត្រឡប់មកអភិវឌ្ឍប្រទេសជាតិវិញ ហើយតាមរយៈកម្មវិធី Credit transfer និស្សិតយើងអាចទៅបន្តការសិក្សាមួយឆ្នាំរួចបកមកសិក្សាបន្តនៅក្នុងស្រុកក៏បាន ។ ចាប់តាំងពីឆ្នាំ២០១៣ កម្ពុជាមាននិស្សិតប្រមាណជាង ៨០០នាក់បានទៅសិក្សានៅអឺរ៉ុប និងប្រមាណ ៤០នាក់ទទួលបានអាហារូបករណ៍ពេញលេញរៀនចប់បរិញ្ញាប័ត្រ និងមានកម្មវិធីពង្រឹងសមត្ថភាពមន្ត្រីរាជការជាច្រើនទៀត។
ជាថ្មីម្តងទៀត ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណយ៉ាងជ្រាលជ្រៅដល់សហភាពអឺរ៉ុប ព្រមទាំងប្រទេសសមាជិកទាំងអស់ដែលបានផ្តល់អាហារូបករណ៍ដល់សិស្សនិស្សិតកម្ពុជា និងផ្តល់នូវការគាំទ្រដល់ការអភិវឌ្ឍលើវិស័យអប់រំនៅកម្ពុជាក្នុងអំឡុងជាង ២៥ឆ្នាំមកនេះ និងសូមលើកទឹកចិត្តយុវជនកម្ពុជាយើងឱ្យបន្តខិតខំប្រឹងប្រែងរៀនសូត្រ ជាពិសេសពង្រឹងសមត្ថភាពផ្នែកភាសាឱ្យខ្លាំង ត្រូវដាក់គោលដៅជីវិតឱ្យច្បាស់លាស់ដើម្បីឈោងចាប់អាហារូបករណ៍ក្នុងក្តីស្រមៃរបស់ខ្លួន ហើយត្រូវយកចំណេះវិជ្ជាមកប្រើប្រាស់ឱ្យមានប្រយោជន៍ ក្លាយជាធនធានដ៏មានតម្លៃចូលរួមចំណែកក្នុងការអភិវឌ្ឍសេដ្ឋកិច្ចសង្គមជាតិ និងសូមជូនពរយុវជនកម្ពុជាយើងកាន់តែច្រើនឱ្យទទួលបានអាហារូបករណ៍ក្នុងក្តីស្រមៃដើម្បីចាប់យកអាជីពដែលខ្លួនស្រលាញ់នាពេលអនាគត៕
