ធនាគារពិភពលោក៖ សេដ្ឋកិច្ចហ្វីលីពីន នឹងកើនឡើងយឺតជាងការរំពឹងទុកដំបូងនៅឆ្នាំនេះ បន្ទាប់ពីប្រទេសនេះ រងការវាយប្រហារដោយព្យុះទីហ្វុងជាបន្តបន្ទាប់

ម៉ានីល៖ ធនាគារពិភពលោក កាលពីថ្ងៃអង្គារទី១០ធ្នូ បានបង្ហាញថា សេដ្ឋកិច្ចហ្វីលីពីននឹងកើនឡើងយឺតជាងការរំពឹងទុកដំបូងនៅឆ្នាំនេះ បន្ទាប់ពីប្រទេសប្រជុំកោះនៅអាស៊ីអាគ្នេយ៍មួយនេះ រងការវាយប្រហារដោយព្យុះទីហ្វុងជាបន្តបន្ទាប់ ប៉ុន្តែសេដ្ឋកិច្ចនៅឆ្នាំ២០២៥ និងឆ្នាំ២០២៦មានភាពរឹងមាំ។

ធនាគារបានបង្ហាញនៅក្នុងការធ្វើបច្ចុប្បន្នភាពសេដ្ឋកិច្ចហ្វីលីពីនថា ផលិតផលក្នុងស្រុកសរុប (GDP) នឹងកើនឡើង៥,៩ភាគរយក្នុងឆ្នាំ២០២៤ តិចជាងការរំពឹងទុកដែលមាន៦ភាគរយ បន្ទាប់ពីជួបបញ្ហាអាកាសធាតុញឹកញាប់នៅក្នុងត្រីមាសទីបី។ លោក ហ្សាហ្វឺរ មូស្តាហ្វាវគ្លូ (Zafer Mustafaoglu) នាយកធនាគារពិភពលោកប្រចាំប្រទេសហ្វីលីពីន ម៉ាឡេស៊ី និងប្រ៊ុយណេ បាននិយាយនៅក្នុងសេចក្តីថ្លែងការណ៍មួយថា៖«ប្រទេសនេះនៅតែងាយរងគ្រោះ ចំពោះព្រឹត្តិការណ៍អាកាសធាតុធ្ងន់ធ្ងរ ដូចជាព្យុះទីហ្វុង និងភ្លៀងមូសុង»។ យ៉ាងណា GDP នឹងកើនដល់៦,១ភាគរយក្នុងឆ្នាំ២០២៥ និង៦ភាគរយនៅឆ្នាំ២០២៦។ ការព្យាករទាំងនេះមានម្រិតទាបជាងគោលដៅរបស់រដ្ឋាភិបាល ដែលរំពឹងពីកំណើន៦ភាគរយទៅ៦,៥ភាគរយសម្រាប់ឆ្នាំ២០២៤ និង៦ភាគរយ ទៅ៨ភាគរយ ក្នុងរយៈពេលពីរឆ្នាំខាងមុខ។

គួររំឭកថា ផលិតផលក្នុងស្រុកសរុបបានធ្លាក់ចុះមកត្រឹម៥,២ភាគរយក្នុងអំឡុងខែកក្កដាដល់ខែកញ្ញា ជាកម្រិតទាបបំផុតក្នុងរយៈពេលជាងមួយឆ្នាំ ដោយសារអាកាសធាតុមិនល្អ បានរំខានដល់ការចំណាយរបស់រដ្ឋាភិបាល និងទិន្នផលកសិកម្មដែលធ្លាក់ចុះ។ ធនាគារបានបញ្ជាក់ថា កំណើនក្នុងរយៈពេល៩ខែដំបូងនៃឆ្នាំ២០២៤ គឺ៥,៨ភាគរយ។ កំណើននៅក្នុងប្រទេសហ្វីលីពីនពឹងផ្អែកលើអតិផរណា នឹងអនុញ្ញាតឱ្យធនាគារកណ្តាលរក្សាគោលនយោបាយរូបិយវត្ថុគាំទ្រសកម្មភាពអាជីវកម្ម។

គួរបញ្ជាក់ថា ហ្វីលីពីនមានប្រជាជនច្រើនជាង១១០លាននាក់ ដែលមានអាយុជាមធ្យម២៥,៣ឆ្នាំគិតត្រឹមឆ្នាំ២០២០។ នេះបើយោងតាមទិន្នន័យរបស់រដ្ឋាភិបាល។ យោងតាមធនាគារពិភពលោក ហ្វីលីពីន គឺជាប្រទេសមួយក្នុងចំណោមប្រទេសមួយចំនួននៅក្នុងតំបន់ ដែលអាចសម្រេចបាននូវវិបុលភាពមុនពេលចំនួនប្រជាជនរបស់ខ្លួនឈានដល់វ័យចំណាស់៕