លោក ពូទីន៖ រុស្ស៊ីគួរតែក្លាយជាមេដឹកនាំពិភពលោកនៅក្នុងបច្ចេកវិទ្យាបញ្ញាសិប្បនិម្មិត (AI)
បរទេស៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានឲ្យដឹងថា បច្ចេកវិទ្យាបញ្ញាសិប្បនិម្មិត (AI) កំពុងផ្លាស់ប្តូរជីវិតប្រចាំថ្ងៃ ហើយត្រូវបានគេរំពឹងថានឹងក្លាយទៅជាប្រភពដ៏សំខាន់សម្រាប់ការសម្រេចបាននូវគោលដៅជាតិរបស់ប្រទេសរុស្ស៊ី។
មេដឹកនាំរុស្ស៊ីបានធ្វើការកត់សម្គាល់នេះកាលពីថ្ងៃពុធ ខណៈថ្លែងសុន្ទរកថាក្នុងសន្និសីទអន្តរជាតិ AI ក្នុងទីក្រុងម៉ូស្គូ។ បើយោងតាមលោក ពូទីន បច្ចេកវិទ្យាថ្មីនេះកំពុងដំណើរការកាន់តែខ្លាំងឡើងចូលទៅក្នុងគ្រប់វិស័យនៃសេដ្ឋកិច្ច និងសង្គមរបស់ប្រទេស ហើយបានផ្លាស់ប្តូរយ៉ាងខ្លាំងនូវឧស្សាហកម្មទាំងមូល។
លោក ពូទីន បានបន្តថា បច្ចេកវិទ្យាបញ្ញាសិប្បនិម្មិត មានបំណងក្លាយជាធនធានដ៏សំខាន់បំផុតសម្រាប់ការសម្រេចបាននូវគោលដៅអភិវឌ្ឍន៍ជាតិ ដោយបន្ថែមថា បច្ចេកវិទ្យានេះអាចជួយពង្រឹងសមត្ថភាពការពារប្រទេស ការអភិវឌ្ឍន៍ប្រកបដោយគុណភាពខ្ពស់នៃសេដ្ឋកិច្ច និងវិស័យសង្គម រដ្ឋបាលសាធារណៈ និង កំណើននៃការច្នៃប្រឌិត។
លោកប្រធានាធិបតីបានសង្កត់ធ្ងន់ថា ដើម្បីដោះស្រាយបញ្ហាទាំងនេះដោយជោគជ័យ រុស្ស៊ីត្រូវតែក្លាយជាអ្នកដឹកនាំពិភពលោកមិនត្រឹមតែក្នុងការបង្កើតប៉ុណ្ណោះទេ ប៉ុន្តែថែមទាំងក្នុងកម្រិតនៃការអនុវត្ត និងការប្រើប្រាស់ AI នៅក្នុងគ្រប់វិស័យនៃជីវិតរបស់យើងដោយគ្មានករណីលើកលែង។
លក្ខខណ្ឌមួយក្នុងចំនោមលក្ខខណ្ឌសំខាន់ៗ សម្រាប់អធិបតេយ្យភាពផ្នែកវិទ្យាសាស្ត្រ បច្ចេកវិទ្យា និងមនោគមវិជ្ជារបស់ប្រទេសគឺត្រូវមានការអភិវឌ្ឍន៍របស់ខ្លួននៅក្នុងវិស័យ AI នេះបើយោងតាមលោក ពូទីន។
លោកបានបញ្ជាក់ថា ក្បួនដោះស្រាយ និងគោលការណ៍នៃប្រតិបត្តិការ AI ត្រូវបានដាក់ចេញដោយមនុស្ស ដែលបញ្ជាក់ពីតម្លៃជាក់លាក់ វប្បធម៌ ប្រពៃណី ផលប្រយោជន៍ជាតិ និងអ្វីៗផ្សេងទៀត។ ដើម្បីកំណត់អនាគត ជោគវាសនារបស់រុស្ស៊ី យើងត្រូវបង្កើតបច្ចេកវិទ្យាបែបនេះដោយខ្លួនឯង ដោយឯករាជ្យ។
លោកពូទីនបានបញ្ជាក់បន្ថែមថាក្រុមហ៊ុនរុស្ស៊ីកំពុងរក្សាល្បឿនជាមួយនឹងដំណោះស្រាយបច្ចេកវិទ្យាចុងក្រោយបំផុត ដោយរួមបញ្ចូលការច្នៃប្រឌិត និងសមិទ្ធិផលទាំងនេះយ៉ាងសកម្មទៅក្នុងការងាររបស់ពួកគេ។ ពួកគេនឹងបន្តបង្កើតផលិតផល និងសេវាកម្មដោយផ្អែកលើបច្ចេកវិទ្យា AI មិនត្រឹមតែសម្រាប់ប្រទេសរុស្ស៊ីប៉ុណ្ណោះទេ ប៉ុន្តែសម្រាប់ពិភពលោកទាំងមូល។
