សម្ដេចមហាបវរធិបតី មានមោទនភាពចំពោះការនាំចេញរបស់កម្ពុជា ដែលមានទំហំកើនឡើងជាលំដាប់ពីមួយឆ្នាំទៅមួយឆ្នាំ

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបង្ហាញមោទនភាពចំពោះការនាំចេញរបស់កម្ពុជា ដែលមានទំហំកើនឡើងជាលំដាប់ពីមួយឆ្នាំទៅមួយឆ្នាំ ជាក់ស្ដែងក្នុងរយៈពេល ១១ ខែនៃឆ្នាំ២០២៤ នេះ ទំហំពាណិជ្ជកម្មអន្តរជាតិរបស់កម្ពុជា គឺកើនជិត ៥០ពាន់លានដុល្លារ។

ក្នុងឱកាសអញ្ជើញ បើកពិព័រណ៍ពាណិជ្ជកម្មកម្ពុជា លើកទី១៧ នៅមជ្ឈមណ្ឌលភីអេច ហ្គ្រេនហល បុរីប៉េងហួត បឹងស្នោ រាជធានីភ្នំពេញ នាថ្ងៃទី១៣ ខែធ្នូ ឆ្នាំ២០២៤នេះ សម្តេចធិបតី ហ៊ុន ម៉ាណែត បានថ្លែងកោតសរសើរចំពោះក្រសួងពាណិជ្ជកម្ម ដែលបានរៀបចំការតាំងពិព័រណ៍បានយ៉ាងល្អ ខណៈការរៀបនេះ បានធ្វើទំនើបកម្មច្រើន មានទាំងផលិតផលក្នុងស្រុក និងក្រៅស្រុក។

សម្តេចធិបតី ហ៊ុន ម៉ាណែត បានមានប្រសាសន៍ថា ការភ្ជាប់ទំនាក់ទំនងទីផ្សារក្នុងស្រុក និងផលិតផលក្រៅស្រុក តាមបច្ចេកវិទ្យាតាមប្រព័ន្ធអ៊ីនធឺណេត ជាកាលានុវត្តភាពដ៏ល្អ សម្រាប់អ្នកវិនិយោគ និងជាការសម្រួលពាណិជ្ជកម្មដ៏ល្អរវាងអ្នកលក់ និងអ្នកទិញ ។

ជាមួយគ្នានោះសម្តេចធិបតី ហ៊ុន ម៉ាណែត ក៏បានណែនាំដល់ក្រសួងពាណិជ្ជកម្មពិនិត្យឡើងវិញ ឱ្យបានត្រឹមត្រូវនូវច្បាប់លិខិត​បទដ្ឋាន​គតិយុត្តិ ​ដែលមានស្រាប់បន្តធ្វើទៅទៀត ដើម្បីអនុវត្តទៅឲ្យមានប្រសិទ្ធភាពខ្ពស់ ៕