ឧបនាយករដ្ឋមន្ត្រី ហង់ជួន ណារ៉ុន ដឹកនាំកិច្ចប្រជុំស្តីពីការរៀបចំ ប្រព័ន្ធគន្លងអប់រំនៅកម្ពុជា

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី១៣ ខែធ្នូ ឆ្នាំ២០២៤ បានដឹកនាំកិច្ចប្រជុំ ស្តីពី “ការរៀបចំប្រព័ន្ធគន្លងអប់រំនៅកម្ពុជា” ដោយមានការចូលរួមពី ឯកឧត្តម លោកជំទាវ ថ្នាក់ដឹកនាំ និងមន្ត្រីមកពីនាយកដ្ឋានពាក់ព័ន្ធក្រោមឱវាទ។

មុនឈានចូលដល់កិច្ចពិភាក្សា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានចែករំលែកអំពីបទពិសោធន៍នៃការរៀបចំ និងសរសេរទស្សនទានខ្លីខ្លឹមងាយយល់ ដោយត្រូវបង្ហាញឱ្យច្បាស់ពីបុព្វហេតុ ជម្រើស និងថ្លឹងថ្លែងហេតុផល ឱ្យឆ្លើយតបទៅនឹងបេសកកម្ម និងចក្ខុវិស័យរបស់រាជរដ្ឋាភិបាល និងរំលឹកឡើងវិញអំពីគោលដៅនៃការរៀបចំគន្លងអប់រំនាពេលនេះ គឺដើម្បី ១) រៀបចំតម្រង់ទិសសិស្សតាមសមត្ថភាព និងចំណង់ចំណូលចិត្ត ២) កសាងច្រកសិក្សាឱ្យមានភាពបត់បែន ដោយផ្សារភ្ជាប់ការអប់រំចំណេះទូទៅ ទៅនឹងការបណ្តុះបណ្តាលបច្ចេកទេសនិងវិជ្ជាជីវៈ ៣) រៀបចំឱ្យមានថ្នាលវិទ្យាសាស្រ្ត និងបច្ចេកវិទ្យានៅកម្រិតមធ្យមសិក្សា (ចាប់ពីកម្រិតមធ្យមបឋមភូមិ ឬចាប់ពីកម្រិតបឋមសិក្សាទុតិយភូមិ) ដើម្បីបង្កើនការចូលរៀនជំនាញវិទ្យាសាស្រ្ត និងបច្ចេកវិទ្យានៅឧត្តមសិក្សា។

កិច្ចប្រជុំនេះបានពិភាក្សាផ្លាស់ប្តូរយោបល់គ្នាយ៉ាងផុសផុលរវាងមន្ត្រីជំនាញពាក់ព័ន្ធក្រោមការណែនាំរបស់ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ដើម្បីចងក្រងជាឯកសារទស្សនាទាន រំលេចបង្ហាញពីភាពចាំបាច់ក្នុងការពិនិត្យឡើងវិញនូវគន្លងអប់រំនៅកម្ពុជា សំដៅកសាងគន្លងអប់រំមួយឱ្យមានភាពទូលំទូលាយ ច្រើនជម្រើស និងផ្អែកលើសមត្ថភាពសិស្ស ដែលមានទំនាក់ទំនងគ្នា និងមានភាពបត់បែនរវាងប្រព័ន្ធអប់រំ ការបណ្តុះបណ្តាលបច្ចេកទេស និងវិជ្ជាជីវៈ ជាពិសេសដើម្បីរៀបចំថ្នាលបណ្តុះមូលធនមនុស្សប្រកបដោយសមត្ថភាព ឆ្លើយតបទៅនឹងរចនាសម្ព័ន្ធសេដ្ឋកិច្ចកម្ពុជា និងតម្រូវការជំនាញក្នុងបរិបទសង្គមសេដ្ឋកិច្ចឌីជីថល។

គួរបញ្ជាក់ដែរថា ទស្សនទាននេះផងដែរក៏មានគោលដៅ ដើម្បីកំណត់ការវិនិយោគតាមស្ថានភាព ឬប្រភេទសាលារៀន (រួមមានការវិនិយោគលើហេដ្ឋារចនាសម្ព័ន្ធសាលារៀន ការរៀបចំកម្មវិធីសិក្សាពេញមួយថ្ងៃ កម្មវិធីបន្ថែមម៉ោង កម្មវិធីក្រៅម៉ោងសិក្សា និងការអភិវឌ្ឍគុណវុឌ្ឍិ និងសមត្ថភាពគ្រូបង្រៀន តាមតាមស្ថានភាព ឬប្រភេទសាលារៀន), ការចម្រាញ់សិស្សដែលសមត្ថភាពនៅមានកម្រិតឱ្យទៅរៀនខាងផ្នែកជំនាញបច្ចេកទេស ហើយសិស្សដែលមានសមត្ថភាពបន្តរៀនបន្តនៅមធ្យមសិក្សា និងបន្តរៀននៅឧត្តមសិក្សា, ការបង្កើនប្រសិទ្ធភាពនៃការវិនិយោគលើវិស័យអប់រំ ជាពិសេសការពង្រឹងគុណភាពអប់រំនៅកម្រិតមធ្យមសិក្សា៕