អភិបាលខេត្តស្ទឹងត្រែង លើកទឹកចិត្តដល់អ្នកផ្ទុកមេរោគអេដស៍ កុំឱ្យមានការបាក់ទឹកចិត្ត បន្តរួមចំណែកក្នុងការអភិវឌ្ឍន៍ប្រទេសជាតិ
ភ្នំពេញ៖ មន្រ្តីរាជការ កងកម្លាំងប្រដាប់អាវុធទាំង៣ប្រភេទ និងសិស្សនិស្សិតប្រមាណ៧០០នាក់ បានចូលរួមក្នុងពិធីប្រារព្ធទិវាពិភពលោកប្រយុទ្ធនឹងជំងឺអេដស៍ ១ ធ្នូ ឆ្នាំ២០២៤ ក្រោមប្រធានបទ៖ «សិទ្ធិ ជាមាគ៌ាឆ្ពោះទៅបញ្ចប់អេដស៍» នាព្រឹកថ្ងៃទី១៥ ខែធ្នូ ឆ្នាំ២០២៤ នៅក្រុងស្ទឹងត្រែង ក្រោមអធិបតីភាព ឯកឧត្តម ឈាង ឡាក់ ប្រធានក្រុមប្រឹក្សាខេត្ត និងឯកឧត្តម សរ សុពុត្រា អភិបាល នៃគណៈអភិបាលខេត្តស្ទឹងត្រែង។
ឯកឧត្តម សរ សុពុត្រា អភិបាល នៃគណៈអភិបាលខេត្តស្ទឹងត្រែង បានថ្លែងថា ការប្រារព្វទិវានេះឡើងក្នុងគោលបំណងបង្ហាញការប្តេជ្ញាចិត្តដ៏មុតស្រួចរបស់រាជរដ្ឋាភិបាលកម្ពុជា ក្នុងការប្រយុទ្ធនិងការរីករាលដាលមេរោគអេដស៍ និងជំងឺអេដស៍។
ឯកឧត្តមអភិបាលខេត្ត បានផ្តល់នូវការគាំទ្រលើកទឹកចិត្តដល់អ្នកផ្ទុកមេរោគអេដស៍ កុំឱ្យមានការបាក់ទឹកចិត្ត ហើយបន្តរួមចំណែកក្នុងការអភិវឌ្ឍន៍ប្រទេសជាតិ។
ក្នុងឱកាសនោះដែរ ឯកឧត្តមអភិបាលខេត្ត រំលឹកនូវការសោកស្តាយចំពោះអ្នកស្លាប់ដោយសារជំងឺអេដស៍ ព្រមទាំងក្រើនរំលឹកដល់ប្រជាពលរដ្ឋទូទាំងប្រទេស ឱ្យចងចាំពីគ្រោះថ្នាក់នៃការឆ្លងមេរោគអេដស៍ ដើម្បីទាំងអស់គ្នាឈានទៅលុបបំបាត់ការឆ្លងរាលដាលមេរោគអេដស៍ រួមចំណែកក្នុងការអភិវឌ្ឍមនុស្សជាតិ។ ដោយត្រូវសម្រេចគោលដៅ 95-95-95 ឆ្នាំ២០២៥ និងមិនទុកនរណាម្នាក់ចោល ដោយមិនបានទទួលការយកចិត្តទុកដាក់ឡើយ ដោយសង្ឃឹមយ៉ាងមុតមាំថានឹងកសាងមនុស្សជាតិជំនាន់ថ្មីមួយដែលគ្មានអេដស៍។
លោកវេជ្ជបណ្ឌិត អ៊ុង សូវៀត ប្រធានមន្ទីរសុខាភិបាលខេត្តស្ទឹងត្រែង បានលើកឡើងថា កម្ពុជា ឆ្លងតាមការអង្កេត អត្រាប្រេវ៉ាឡង់របស់មជ្ឈមណ្ឌលជាតិប្រយុទ្ធនិងជំងឺអេដស៍ សើស្បែក និងកាមរោគ គឺនៅឆ្នាំ១៩៩៨ មានអ្នកផ្ទុកមេរោគអេដស៍ អ្នកជំងឺអេដស៍លើមនុស្សពេញវ័យពី១៥ឆ្នាំ ទៅ៤៩ឆ្នាំ មានចំនួន១.៧ភាគរយ និងថយចុះត្រឹម០.៧ភាគរយនៅឆ្នាំ២០១៣ និងបន្តថយចុះ០.៦ភាគរយ នៅឆ្នាំ២០១៤ មកដល់ឆ្នាំ២០២២។ ដោយឡែកខេត្តស្ទឹងត្រែង គិតត្រឹមខែវិច្ឆិកា ឆ្នាំ២០២៤នេះ មានអ្នកផ្ទុកមេរោគអេដស៍ និងអ្នកជំងឺអេដស៍ ចំនួន៤៣៩នាក់ មានស្រ្តី២១៤នាក់ មនុស្សពេញវ័យ៤២៤នាក់ និងកុមារចំនួន១៥នាក់។
ប្រជាពលរដ្ឋក្នុងអង្គមិទ្ទិញនាថ្ងៃដដែលនោះ បានស្តាប់នូវសារលិខិតរបស់សម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិនៃវេទិកាភាពជាអ្នកដឹកនាំតំបន់អាស៊ី ប៉ាស៊ីហ្វិក ឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា បានអានទាំងស្រុងដោយលោក ស៊ា ប៉ាច ប្រធានអង្គភាពអគ្គីសនីស្ទឹងត្រែង។ ដោយឡែកលោកស្រី កែវ សាវឿន អភិបាលរង នៃគណៈអភិបាលខេត្ត បានអាននូវសារលិខិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ក្នុងឱកាសទិវាពិភពលោកប្រយុទ្ធនិងជំងឺអេដស៍ ១ ធ្នូ ឆ្នាំ២០២៤ ក្រោមប្រធានបទ៖ «សិទ្ធិជាមាគ៌ាឆ្ពោះទៅបញ្ចប់អេដស៍» ឆ្ពោះទៅសម្រេចគោលដៅទាំង៣ដែលបានកំណត់ គឺ៖ គោលដៅទី១. កាត់បន្ថយករណីឆ្លងថ្មី នៃមេរោគអេដស៍ក្នុងរង្វង់ចំនួនជាង២០០នាក់ក្នុង១ឆ្នាំ, គោលដៅទី២. កាត់បន្ថយអ្នកស្លាប់ដោយសារជំងឺអេដស៍មកតិចជាង២០០នាក់ក្នុង១ឆ្នាំ និងគោលដៅទី៣. គ្មានការមាក់ងាយ រើសអើងអ្នកផ្ទុកមេរោគអេដស៍ និងប្រជាជនគន្លឹះ ៕
