អាជ្ញាធរសុខាភិបាល៖ ចំនួនអ្នកស្លាប់ជនជាតិប៉ាឡេស្ទីននៅហ្គាហ្សាកើនដល់ ៤៥,០០០នាក់
ហ្គាហ្សា៖ អាជ្ញាធរសុខាភិបាលដែលមានមូលដ្ឋាននៅហ្គាហ្សាបានឲ្យដឹងនៅក្នុងសេចក្តីថ្លែងការណ៍មួយកាលពីថ្ងៃចន្ទថា ចំនួនអ្នកស្លាប់របស់ប៉ាឡេស្ទីនពីការវាយប្រហារបន្តរបស់អ៊ីស្រាអែលទៅលើតំបន់ហ្គាហ្សាស្ទ្រីប បានកើនឡើងដល់ ៤៥,០០០នាក់ហើយ។
ក្នុងរយៈពេល ២៤ម៉ោងកន្លងមក យោធាអ៊ីស្រាអែលបានសម្លាប់មនុស្ស ៥២នាក់ និងរបួស ២០៣នាក់ទៀត ដែលនាំឱ្យចំនួនអ្នកស្លាប់សរុបកើនឡើងដល់ ៤៥,០២៨នាក់ និងរបួសដល់ ១០៦,៩៦២នាក់ចាប់តាំងពីជម្លោះប៉ាឡេស្ទីន-អ៊ីស្រាអែលបានផ្ទុះឡើងនៅដើមខែតុលា ឆ្នាំ២០២៣ នេះបើយោងតាមសេចក្តីថ្លែងការណ៍។
អាជ្ញាធរសុខាភិបាលបានកត់សម្គាល់ថា នៅមានជនរងគ្រោះមួយចំនួននៅក្រោមគំនរបាក់បែក ហើយរថយន្តសង្គ្រោះបន្ទាន់ និងក្រុមអ្នកការពារស៊ីវិលមិនអាចទៅដល់ពួកគេបានទេ។
ទន្ទឹមនឹងនេះ ទីភ្នាក់ងារព័ត៌មានផ្លូវការរបស់ប៉ាឡេស្ទីន WAFA បានរាយការណ៍ថា មនុស្សប្រាំនាក់បានស្លាប់ និងជាច្រើននាក់ទៀតរងរបួសកាលពីថ្ងៃចន្ទ បន្ទាប់ពីយន្តហោះចម្បាំងរបស់អ៊ីស្រាអែលបានទម្លាក់គ្រាប់បែកលើផ្ទះមួយខ្នងនៅ Beit Lahia ភាគខាងជើងនៃតំបន់ហ្គាហ្សាស្ទ្រីប។
សេចក្តីរាយការណ៍បានបន្ថែមថា បីនាក់ទៀតបានស្លាប់ និងមួយចំនួនទៀតរងរបួសនៅក្នុងការទម្លាក់គ្រាប់បែករបស់អ៊ីស្រាអែលលើជំរុំ Nuseirat នៅកណ្តាលហ្គាហ្សា។
កងទ័ពអ៊ីស្រាអែលមិនទាន់ធ្វើអត្ថាធិប្បាយជុំវិញឧប្បត្តិហេតុទាំងនេះនៅឡើយទេ។
អ៊ីស្រាអែលបាននិងកំពុងធ្វើការវាយលុកទ្រង់ទ្រាយធំប្រឆាំងនឹងក្រុមហាម៉ាសនៅតំបន់ហ្គាហ្សា ដើម្បីសងសឹកនឹងការវាយលុករបស់ក្រុមហាម៉ាស់ឆ្លងកាត់ព្រំដែនភាគខាងត្បូងអ៊ីស្រាអែលកាលពីថ្ងៃទី៧ ខែតុលា ឆ្នាំ២០២៣ ក្នុងអំឡុងពេលដែលមនុស្សប្រហែល ១,២០០នាក់ត្រូវបានសម្លាប់ និងប្រហែល ២៥០នាក់ត្រូវបានចាប់ធ្វើជាចំណាប់ខ្មាំង។
