ឯកឧត្តម ម៉ាង ស៊ីណេត អញ្ជើញអបអរសាទរទិវាអន្តរជាតិ នៃអ្នកស្ម័គ្រចិត្ត ៥ធ្នូ ២០២៤ ក្រោមប្រធានបទ “រួមគ្នាស្ម័គ្រចិត្ត ដើម្បីភាពធនសហគមន៍ក្នុងសន្តិភាព”

ភ្នំពេញ៖ ឯកឧត្តម ម៉ាង ស៊ីណេត ប្រធានគណ:កម្មាធិការសាខាកាកបាទក្រហមកម្ពុជា ខេត្តព្រះសីហនុ ឯកឧត្តម លោកជំទាវ សមាជិក សមាជិកាគណៈកម្មាធិការសាខា អ្នកឧកញ៉ា ឧកញ៉ា មន្ត្រីសាខា យុវជនស្ម័គ្រចិត្ត រួមទាំងសប្បុរសជន ចូលរួមអបអរសាទរទិវាអន្តរជាតិ នៃអ្នកស្ម័គ្រចិត្ត ៥ធ្នូ ២០២៤ ក្រោមប្រធានបទ “រួមគ្នាស្ម័គ្រចិត្ត ដើម្បីភាពធនសហគមន៍ក្នុងសន្តិភាព” ដែលមានអ្នកស្ម័គ្រចិត្តមកពីក្រុងស្រុកទាំង៥ចំនួន ២៧៦នាក់ នៅសាលាដុនបូស្កូ ស្ថិតនៅ សង្កាត់លេខ៤ ក្រុងព្រះសីហនុ រសៀលថ្ងៃចន្ទទី១៦ ខែធ្នូ ឆ្នាំ២០២៤។

ក្នុងឱកាសនោះ ឯកឧត្តម ម៉ាង ស៊ីណេត ប្រធានគណ:កម្មាធិការសាខា បានអានសារសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក្នុងឱកាសទិវាអន្តរជាតិនៃអ្នកស្ម័គ្រចិត្ត ៥ធ្នូ ២០២៤ ក្រោមប្រធានបទ “រួមគ្នាស្ម័គ្រចិត្ត ដើម្បីភាពធន់សហគមន៍ក្នុងសន្តិភាព” ក្នុងមានគោលបំណងសម្តែងនូវកត្តញ្ញូតាធម៌ ទទួលស្គាល់ស្នាដៃ និងគុណតម្លៃ នៃការលះបង់កម្លាំងកាយចិត្ត ពេលវេលារបស់អ្នកស្ម័គ្រចិត្ត ដែលបានលះបង់ពេលវេលា ក្នុងការជួយសង្គ្រោះអាយុជីវិត, ការកសាងភាពធន់សហគមន៍,ការពង្រឹងកម្លាំងសកម្មនៅមូលដ្ឋាន និងក្នុងការលើកកម្ពស់សេចក្តីថ្លៃថ្នូររបស់មនុស្សជាតិ ដើម្បីបុព្វហេតុមនុស្សធម៌នៅគ្រប់ទីកន្លែង។

ពីធីនេះធ្វើឡើងគោលបំណងដើម្បីលើកទឹកចិត្តដល់អ្នកស្ម័គ្រចិត្តរបស់សាខាកាកបាទក្រហមកម្ពុជាខេត្តព្រះសីហនុ តែងតែលះបង់ពេលវេលាកម្លាំងកាយកម្លាំងចិត្តមិនថាថ្ងៃយប់កម្លាំងអ្នកស្ម័គ្រចិត្តចូលរួមសម្មភាពមនុស្សធម៌ជាមួយសាខាយើងជានិច្ច។

ក្នុងនោះលោក គាំ សុខុម នាយកសាខា បានផ្សព្វផ្សាយយុទ្ធសាស្រ្តដើម្បីធ្វើអោយមានសុខភាពល្អនិងអាយុវែងគឺ សូមបងប្អូនហាត់ប្រាណជារាងរាល់ថ្ងៃ ហូបបន្លែធម្មជាតិអោយបានច្រើន សូមបងប្អូនកាត់បន្ថយ អាហារមានសារធាតុខ្លាញ់ ផ្អែម ប្រៃ ជាពិសេសគ្រឿងស្រវឹងវាអាចធ្វើអោយបងប្អូនជួបប្រទៈនូវជំងឺផ្សេងៗ ហើយមន្រ្តីសាខាក៏បានផ្សព្វផ្សាយវិជ្ជាសង្គ្រោះបឋមដល់បងប្អូនអ្នកស្ម័គ្រចិត្តបានចូលរួមក្នុងថ្ងៃនេះផងដែរ។

ក្នុងឱកាសនោះឯកឧត្តម ប្រធានគណ:កម្មាធិការសាខាកាកបាទក្រហមខេត្តព្រះសីហនុ ក៏បានឧបត្ថម្ភសម្ភារះជូនអ្នកស្ម័គ្រចិត្តកាកបាទ ក្រហមចំនួន ២៧៦នាក់ ក្នុងម្នាក់ ទទួលបានអង្ករ ២៥គីឡូក្រាម មី១កេស ត្រីខ១០កំប៉ុង ទឹកត្រី១យួរ កន្ទេល១ ឃីត១កញ្ចប់ (មុង១ ភួយ១ សារុង១ ក្រមា) និងថវិកា ៥ម៉ឺនរៀល៕