ខេត្តស្ទឹងត្រែង ជាប៉ូលទី៤ នៅប៉ែកភូមិភាគឦសាន្តប្រទេសកម្ពុជា ដែលសំបូរទៅដោយធនធានធម្មជាតិ និងអេកូទេសចរណ៍ សម្រាប់ទាក់ទាញភ្ញៀវទេសចរជាតិ និងអន្តរជាតិ

ភ្នំពេញ៖ នៅថ្ងៃទី១៨ ខែធ្នូ ឆ្នាំ២០២៤ មន្ទីរទេសចរណ៍ខេត្តស្ទឹងត្រែង បានរៀបចំពិធីផ្សព្វផ្សាយបើកដំណើរការកម្មវិធីវគ្គបណ្តុះបណ្តាល បដិសណ្ឋារកិច្ច ហូកា ដំណាក់កាលទីបី ឆ្នាំ ២០២៤-២០២៨ ស្ថិតក្រោម អធិបតីភាព ឯកឧត្តម សរ សុពុត្រា អភិបាលខេត្តស្ទឹងត្រែង លោក អ៊ន់ ប៉ោសឿន ប្រធានមន្ទីរទេសចរណ៍ខេត្ត និង លោក គង់ ដារ៉ា ប្រធានផ្នែកការគ្រប់គ្រងបដិសណ្ឋារកិច្ច នៃអង្គការ ស្វីសខនថាក់ ព្រមទាំង មានការចូលរួមពីតំណាងអង្គការ ស្វីសខនថាក់ប្រចាំខេត្តស្ទឹងត្រែង តំណាងដៃគូ សហគ្រាន និង យុវជន ស ស យ ក ជាច្រើនរូប។

បន្ទាប់ពី លោក អ៊ន់ ប៉ោសឿន ប្រធានមន្ទីរទេសចរណ៍ខេត្តស្ទឹងត្រែង បានអាននូវរបាយការណ៍ សង្ខេបអំពីផែនការសកម្មភាព រួចមក លោក លោក គង់ ដារ៉ា ប្រធានផ្នែកការគ្រប់គ្រងបដិសណ្ឋារកិច្ច នៃអង្គការ ស្វីសខនថាក់ បានគូសបញ្ជាក់ថា កម្មវិធីអភិវឌ្ឍន៍ជំនាញ (SDP) គឺជាគម្រោងរបស់ទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការ និងសហការផ្តល់មូលនិធិដោយ ភ្នាក់ងារអភិវឌ្ឍន៍ លីចតេនស្ទីន (LED)។ កម្មវិធី SDP ដំណាក់កាលទី៣ (២០២៤ – ២០២៨) ត្រូវបានអនុវត្តដោយ ស្វីសខន់ថាក់ (Swisscontact) ក្នុងសម្ព័ន្ធជាមួយ involas និងសហការជាមួយក្រសួងការងារ និងបណ្តុះបណ្តាលវិជ្ជាជីវៈ និង ក្រសួងទេសចរណ៍ នៅក្នុងខេត្តគោលដៅចំនួនដប់ពីរ គឺខេត្តក្រចេះ ស្ទឹងត្រែង ព្រះវិហារ មណ្ឌលគិរី រតនគិរី ពោធិ៍សាត់ បាត់ដំបង បន្ទាយមានជ័យ ឧត្តរមានជ័យ ប៉ៃលិន កំពង់ឆ្នាំង និងកោះកុង។

ក្នុងនោះលោកបានបន្ថែមថា កម្មវិធីអភិវឌ្ឍន៍ជំនាញ (SDP) អនុវត្តការងារដោយមានកិច្ចសហការយ៉ាងជិតស្និទ្ធជាមួយរដ្ឋបាលទាំងថ្នាក់ជាតិ និង ថ្នាក់ក្រោមជាតិ គ្រឹះស្ថានផ្តល់សេវាបណ្តុះបណ្តាលទាំងរដ្ឋ និងឯកជន ក៏ដូចជាក្រុមហ៊ុន និងសហគ្រាសធុនតូចក្នុង វិស័យបដិសណ្ឋារកិច្ច និងវិស័យផ្សេងទៀត។ គោលបំណងរួមរបស់កម្មវិធី SDP គឺដើម្បីឱ្យយុវជនងាយរងគ្រោះ និងបុគ្គលិកដែលមានជំនាញទាបមានឱកាសទទួលបានការងារសមរម្យ និងប្រាក់ចំណូលកើនឡើង។

មានប្រសាសន៍ ក្នុងពិធី ឯកឧត្តម សរ សុពុត្រា អភិបាលខេត្តស្ទឹងត្រែង បានគាំទ្រយ៉ាងពេញទំហឹង សម្រាប់កម្មវិធីបណ្តុះបណ្តាលបដិសណ្ឋារកិច្ច ហូកា (Hoka) ដែលមានការសហការគាំទ្រពី ទីភ្នាក់ងារស្វីស សម្រាប់ការអភិវឌ្ឍន៍ និងសហប្រតិបត្តិការ (SDC) ចាប់ពីដំណាក់កាលទី១ដល់ទី៣នេះ ដល់ យុវជន ម្ចាស់អាជីវកម្មអ្នកគ្រប់គ្រង និងអ្នកជំនាញទេសចរណ៍ ស្របពេលជាមួយនេះ ឯកឧត្តម ក៏បានជំរុញឲ្យមន្ទីរទេសចរណ៍ជាសេនាធិការ និងបងប្អូនម្ចាស់អាជីកម្ម យុវជន យុវនារី សហការ ខិតខំរៀបចំ និងការចូលរួមទទួលការបណ្តុះបណ្តាលឱ្យមានប្រសិទ្ធិភាពខ្ពស់ ពីគម្រោងនេះ។

ឆ្លៀតក្នុងឪកាសនោះដែរ ឯកឧត្តម សរ សុពុត្រា បានបន្តថា: ខេត្តស្ទឹងត្រែង ជាប៉ូលទី៤ នៅប៉ែកភូមិភាគឦសាន្តនៃប្រទេសកម្ពុជា ដែលសំបូរទៅដោយធនធានធម្មជាតិ និង អេកូទេសចរណ៍ សម្រាប់ទាក់ទាញភ្ញៀវទេសចរជាតិ និងអន្តរជាតិ។ ជាពិសេសតាមរយៈកម្មវិធីអភិវឌ្ឍន៍ជំនាញ (SDP) និង កម្មវិធីបណ្តុះបណ្តាលបដិសណ្ឋារកិច្ចកម្ពុជា (HoKa) បានពង្រឹងសមត្ថភាពដល់ យុវជន និងបុគ្គលិក និងម្ចាស់អាជីវកម្មនៅតាមមូលដ្ឋាន អាជីវិកម្មទេសចរណ៍ មានជំនាញវិជ្ជាជីវះទេសចរណ៍ច្បាស់លាស់ ឆ្លើយតបទៅនឹង ការងារនាពេលបច្ចុប្បន្ន និងស្របតាមស្តង់ងាររបស់ក្រសួងទេសចរណ៍៕