សម្ដេចធិបតី៖ រាជរដ្ឋាភិបាលអាណត្តិថ្មីនេះ នឹងខិតខំធ្វើយ៉ាងណាចុះវាស់វែង និងផ្តល់ប័ណ្ណកម្មសិទ្ធិដីធ្លី ឲ្យចប់សព្វគ្រប់ជូនប្រជាពលរដ្ឋ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា រាជរដ្ឋាភិបាលអាណត្តិទី៧នេះ នឹងខិតខំធ្វើយ៉ាងណាបន្តចុះវាស់វែង និងផ្តល់ប័ណ្ណកម្មសិទ្ធិដីធ្លីឲ្យបានចប់សព្វគ្រប់ជូនប្រជាពលរដ្ឋ ដែលនេះហើយជាផលនៃសន្តិភាព។

ក្នុងឱកាសអញ្ជើញ ប្រកាសខេត្តកំពង់ចាម បញ្ចប់ការវាស់វែងដីធ្លីមានលក្ខណៈជាប្រព័ន្ធ និងពិធីចែកបណ្ណកម្មសិទ្ធិដីធ្លី ជូនប្រជាពលរដ្ឋ ស្ថិតក្នុងស្រុកស្ទឹងត្រង់ ខេត្តកំពង់ចាម នៅថ្ងៃទី២១ ខែធ្នូ ឆ្នាំ២០២៤នេះ សម្តេចធិបតី បានលើកឡើងថា រាជរដ្ឋាភិបាល នៅតែបន្តយកចិត្តទុកដាក់ ចំពោះប្រជាពលរដ្ឋ លើបញ្ហាដីធ្លីនេះ ជាពិសេសរាជរដ្ឋាភិបាល បានខិតខំដោះស្រាយរាល់ទំនាស់ដីធ្លីរបស់ប្រជាពលរដ្ឋទៅតាមយន្តការនានា ។

សម្តេចធិបតី ហ៊ុន ម៉ាណែត សង្កត់ធ្ងន់ថា «នេះជាអ្វីដែលរាជរដ្ឋាភិបាល អាណត្តិទី៧ នឹងបន្តខិតខំដឹកនាំ ដើម្បីឆ្លើយតប ជាមួយនឹងប្រជាពលដ្ឋ ដែលជាម្ចាស់ឆ្នោត ដែលបានបោះឆ្នោត ផ្តល់ការគាំទ្រ ដល់រាជរដ្ឋាភិបាល ដល់គណបក្សប្រជាកម្ពុជា ដើម្បីឱ្យបម្រើដល់ប្រជាជន ចឹងការប្តេជ្ញាចិត្តរបស់យើង ក្នុងវិស័យដីធ្លី គឺមានតែខិតខំធ្វើយ៉ាងណា វាស់វែងឱ្យចប់ ផ្តល់កម្មសិទ្ធិឱ្យប្រជាពលរដ្ឋ ឱ្យបានត្រឹមត្រូវ ហើយបង្កលក្ខណៈឱ្យកាន់តែមានតម្លៃ និងមានឱកាសច្រើន នៅក្នុងការប្រើប្រាស់ដីធ្លី ឱ្យប្រជាជននៅគ្រប់ទីកន្លែងបានផល នេះហើយជាការប្តេជ្ញាចិត្ត» ៕