បាងកក កំពុងប្រឈមមុខនឹងការបំពុលបរិយាកាស ខណៈគុណភាពខ្យល់ឡើងដល់កម្រិតគ្រោះថ្នាក់ ដល់សុខភាព

បាងកក៖ បាងកកដែលជារាជធានីដ៏មមាញឹកបំផុតរបស់ប្រទេសថៃ កំពុងប្រឈមមុខនឹងការបំពុលបរិយាកាស និងបានក្លាយជាក្ដីបារម្ភកាន់តែខ្លាំងឡើងសម្រាប់ប្រជាជនរស់នៅទីនោះ និងភ្ញៀវទេសចរ ខណៈគុណភាពខ្យល់ឡើងដល់កម្រិតគ្រោះថ្នាក់ដល់សុខភាព ជាពិសេសក្នុងអំឡុងខែត្រជាក់ខ្លាំងចាប់ពីខែវិច្ឆិកាដល់ខែកុម្ភៈ។ នេះបើតាមការចុះផ្សាយដោយសារព័ត៌មានថៃ Pataya Mail។

កត្តារួមចំណែកចម្បងចំពោះការបំពុលបរិយាកាសនៅរាជធានីបាងកក គឺបណ្តាលមកពីការបំភាយផ្សែងយានយន្ត សកម្មភាពឧស្សាហកម្ម និងការដុតកាកសំណល់កសិកម្ម ជាពិសេសក្នុងរដូវប្រមូលផលរួច។ ទន្ទឹមនឹងនេះ ការកកស្ទះចរាចរណ៍គឺជាកត្តាសំខាន់មួយ ដោយយានជំនិះរាប់ពាន់គ្រឿងកកកុញនៅលើដងផ្លូវ បញ្ចេញផ្សែងពុលដែលរួមចំណែកដល់កម្រិតខ្ពស់នៃកំហាប់ភាគល្អិតនិចល ឬPM2.5 និងអាសូតឌីអុកស៊ីត(NO2) នៅក្នុងបរិយាកាស។ គួរជម្រាបថា PM2.5 គឺជាភាគល្អិតនិចលតូចៗដែលមានអង្កត់ផ្ចិតតូចជាង២,៥មីក្រូម៉ែត្រ អាចជ្រាបចូលជ្រៅទៅក្នុងសួត និងចរន្តឈាម ដែលនាំឱ្យមានបញ្ហាផ្លូវដង្ហើម និងជំងឺសរសៃឈាមបេះដូង។ ក្រុមងាយរងគ្រោះមានដូចជា៖កុមារ មនុស្សចាស់ និងបុគ្គលដែលមានសុខភាពមិនល្អ។

សារព័ត៌មានថៃខាងលើបានចុះផ្សាយថា ក្រៅពីលើការបំភាយយានយន្ត និងសកម្មភាពឧស្សាហកម្ម រដូវដុតកាកសំណល់កសិកម្មនៅប្រទេសជិតខាង ដូចជា៖ កម្ពុជា ឡាវ និងមីយ៉ាន់ម៉ា ក៏រួមចំណែកដល់បញ្ហាផ្សែងអ័ព្ទក្នុងរដ្ឋធានីបាងកកផងដែរ។ កសិករ​តែងតែ​ដុត​កាកសំណល់កសិកម្ម និង​ដំណាំ​ផ្សេង​ទៀតដើម្បីសម្អាតស្រែចម្ការ ដោយ​បញ្ចេញ​ផ្សែង​ហុយ​ចូល​ក្នុង​អាកាស ដែលធ្វើ​ឱ្យ​គុណភាព​ខ្យល់​កាន់តែ​អាក្រក់​នៅ​រាជធានី​បាងកក។

រាជរដ្ឋាភិបាលថៃ និងអាជ្ញាធរមូលដ្ឋាន បានចាត់វិធានការផ្សេងៗដើម្បីដោះស្រាយបញ្ហានេះ រួមទាំងការអនុវត្តប្រព័ន្ធត្រួតពិនិត្យគុណភាពខ្យល់ ការលើកកម្ពស់ការប្រើប្រាស់យានយន្តអគ្គិសនី និងការកែលម្អហេដ្ឋារចនាសម្ព័ន្ធដឹកជញ្ជូនសាធារណៈ ដើម្បីកាត់បន្ថយការបំភាយឧស្ម័នដែលទាក់ទងនឹងចរាចរណ៍។ ទោះជាយ៉ាងណាក៏ដោយ ការបំពុលខ្យល់នៅតែជាបញ្ហាស្នូលមួយរបស់ថៃ ដោយសារតែនគរូបនីយកម្មលឿន ដង់ស៊ីតេប្រជាជនខ្ពស់ និងការអនុវត្តមិនគ្រប់គ្រាន់នៃបទប្បញ្ញត្តិបរិស្ថាន។ ដូច្នេះ គុណភាពខ្យល់នៅរាជធានីបាងកកនៅតែជាបញ្ហាប្រឈមផ្នែកបរិស្ថាន និងសុខភាពសាធារណៈដ៏សំខាន់។