សម្តេចធិបតី ហ៊ុន ម៉ាណែត៖ ក្នុងនាមជាខ្មែរ យើងត្រូវមានទស្សនៈ និងផ្នត់គំនិតវិជ្ជមាន ចំពោះសង្គមជាតិ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានថ្លែងបញ្ជាក់ថា ក្នុងនាមជាខ្មែរ យើងត្រូវមានទស្សនៈនិងផ្នត់គំនិតវិជ្ជមានចំពោះសង្គមជាតិរបស់យើង ហើយត្រូវរួមគ្នាទប់ស្កាត់កុំឱ្យប្រទេសជាតិយើងមានការវាយគ្នាឡើងវិញដូចកាលពីអតីតកាល។

ក្នុងពិធីសំណេះសំណាលជាមួយសិស្សនិទ្ទេស A នៃការប្រឡងសញ្ញាបត្រមធ្យមសិក្សាទុតិយភូមិ និងការប្រឡងសញ្ញាបត្របច្ចេកទេស និងវិជ្ជាជីវៈកម្រិត៣ នៅថ្ងៃទី២៣ ខែធ្នូ ឆ្នាំ២០២៤សម្តេចធិបតី ហ៊ុន ម៉ាណែត បានមានប្រសាសន៍ថា យើងមិនអាចអង្គុយសោកសៅចំពោះប្រវត្តិសាស្ត្រដ៏ជូរចត់របស់កម្ពុជានោះទេ ប៉ុន្តែគឺយើងត្រូវខិតខំប្រឹងប្រែងស្វែងរកនិងថែរក្សាសុខសសន្តិភាពឱ្យកម្ពុជាឡើងវិញ និងប្រឹងប្រែងកសាងអភិវឌ្ឍន៍ប្រទេសឱ្យតាមទាន់ប្រទេសក្បែរខាង និងវ៉ាប្រទេសគេនៅពេលខាងមុខផងដែរ។

សម្តេចធិបតី ហ៊ុន ម៉ាណែត បានបន្ថែមថា ប្រសិនបើខ្មែរយើងមិនត្រូវគ្នានិងយោគយល់គ្នានោះទេ គឺយើងមិនអាចបញ្ចប់សង្រ្គាមទាំងស្រុងបានឡើយ ហើយយើងត្រូវចងចាំថា មានតែខ្មែរខ្លួនឯងប៉ុណ្ណោះដែលឯកភាពគ្នាឈប់ឈ្លោះវាយប្រយុទ្ធគ្នា ទើបប្រទេសជាតិយើងមានសុខសន្តិភាពរហូតដល់បច្ចុប្បន្ននេះ៕