អតិផរណា បានធ្វើឱ្យសេដ្ឋកិច្ចធ្លាក់ចុះភាគច្រើន នៅជុំវិញពិភពលោក ក្នុងឆ្នាំ២០២៤នេះ

បរទេស៖ អតិផរណាបានធ្វើឱ្យសេដ្ឋកិច្ចធ្លាក់ចុះភាគច្រើននៅជុំវិញពិភពលោក ក្នុងឆ្នាំ២០២៤នេះ ទន្ទឹមនឹងប្រទេសជាច្រើនរៀបចំការបោះឆ្នោតជ្រើសរើសប្រធានាធិបតី និងមេដឹកនាំ ខណៈភ្លើងសង្គ្រាម ជម្លោះ វិវាទ បានផុសឡើងស្ទើរគ្រប់ជ្រុងនៃភពផែនដី។

ប្រជាជននៅជុំវិញពិភពលោក មានការខឹងសម្បារចំពោះការឡើងថ្លៃគ្រប់យ៉ាងចាប់ពីស៊ុតរហូតដល់ថាមពលក្នុងរយៈពេលប៉ុន្មានឆ្នាំចុងក្រោយនេះ ខណៈអតិផរណានៅតែបន្ត។ នៅសហរដ្ឋអាម៉េរិក ការចំណាយខ្ពស់ជាងមុនបានជួយឱ្យលោក ដូណាល់ ត្រាំ ឈ្នះតំណែងប្រធានាធិបតីរយៈពេល៤ឆ្នាំជាលើកទី២ ដែលទំនងជានឹងរង្គោះរង្គើស្ថាប័នប្រជាធិបតេយ្យ ទំនាក់ទំនងក្នុងប្រទេស និងក្រៅប្រទេស។

គោលបំណងប្រឆាំងអតិផរណាក៏បានឈានទៅដល់ការផ្លាស់ប្ដូររដ្ឋាភិបាលថ្មីនៅចក្រភពអង់គ្លេស បូតស្វាណា ព័រទុយហ្គាល់ និងប៉ាណាម៉ា។ ក្រៅពីនេះ អ្នកបោះឆ្នោតកូរ៉េខាងត្បូង បានគាំទ្របក្សប្រឆាំងឡើងកាន់អំណាចនៅក្នុងសភារបស់ខ្លួន។ កាន់តែវឹកវរនៅដើមខែធ្នូនេះ ប្រធានាធិបតីកូរ៉េខាងត្បូង លោក យូន ស៊ុកយ៉ុល បានដាក់ច្បាប់អាជ្ញាសឹក ដែលបង្កឱ្យមានភាពចលាចលនៅទូទាំងផ្ទៃប្រទេស។ គួរជម្រាបថា ព្រឹត្តិការណ៍នៃការ​បោះ​ឆ្នោត​ក៏​បាន​អង្រួនប្រទេស​បារាំង អាល្លឺម៉ង់ ជប៉ុន និង​ឥណ្ឌា។

រដ្ឋធានីមូស្គូបានបន្តបញ្ឆេះភ្លើងសង្រ្គាមរបស់ខ្លួនប្រឆាំងនឹងអ៊ុយក្រែន ដោយបានបំផ្លិចបំផ្លាញច្រើនឥតគណនា។ សំណួរដ៏ធំគឺថា តើការវិលត្រឡប់របស់លោក ត្រាំ ទៅកាន់សេតវិមានជះឥទ្ធិពលអ្វីខ្លះចំពោះសង្គ្រាមនេះ? ទន្ទឹមនឹងលោក ត្រាំ បានសន្យាថា នឹងបញ្ចប់សង្រ្គាមនេះត្រឹមមួយថ្ងៃប៉ុណ្ណោះ។ សង្វេគណាស់! មនុស្សជាច្រើននៅអ៊ុយក្រែន និងកន្លែងផ្សេងទៀតក្នុងទ្វីបអឺរ៉ុបភ័យខ្លាចថា លោក ពូទីន នឹងបង្កស្ថានភាពឱ្យកាន់តែចលាចលជាងនេះ។

រីឯនៅមជ្ឈិមបូព៌ា អ៊ីស្រាអែលបានបន្តសង្រ្គាមនៅតំបន់ហ្កាហ្សា ហើយរដ្ឋធានីហ្ស៊េរ៊ុយហ្សាឡិមបានពង្រីកសង្គ្រាមទៅកាន់ប្រទេសលីបង់។ ចំណែកនៅក្នុងប្រទេសស៊ីរី ក្រុមឧទ្ទាមបានផ្តួលរំលំរបបដឹកនាំលោក បាស្ហា អាល់អាសាដ (Bashar al-Assad) ហើយឥឡូវនេះកំពុងស្វែងរកការគ្រប់គ្រងប្រទេស។ ដោយឡែក ពាក់ព័ន្ធនឹងអាជីវកម្ម ក្រុមហ៊ុននានាជុំវិញពិភពលោក កំពុងរិះរកវិធីសម្របខ្លួនទៅនឹងការរីកចម្រើនលឿនដូចផ្លេកបន្ទោររបស់បញ្ញាសិប្បនិម្មិត(AI)។ លោកមហាសេដ្ឋី អេឡុន ម៉ាសក៍ (Elon Musk) ដែលគ្រប់គ្រងក្រុមហ៊ុនមួយក្នុងចំណោមក្រុមហ៊ុនទាំងនោះគឺ Tesla គឺជាទីប្រឹក្សា និងជាអ្នកគាំទ្រផ្នែកហិរញ្ញវត្ថុដល់ប្រធានាធិបតីជាប់ឆ្នោត Trump។ សម្លឹងទៅមុខ ការរួមបញ្ចូលគ្នានៃបច្ចេកវិទ្យា bro mojo និងអំណាចនយោបាយអាចកំណត់បានយ៉ាងល្អនៅឆ្នាំ២០២៥៕