អភិសន្ដិបណ្ឌិត ស សុខា អរគុណចំពោះអ្នកពាក់ព័ន្ធ ក្នុងព្រឹត្តិការណ៍ការប្រកួតកីឡាបាល់ទះ ពានរង្វាន់សម្តេចក្រឡាហោម ស ខេង ឆ្នាំ២០២៤
ភ្នំពេញ៖ ឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធានសហព័ន្ធកីឡាបាល់ទះកម្ពុជា បានផ្ញើសារថ្លែងអំណរគុណជូនចំពោះអ្នកពាក់ព័ន្ធ ក្នុងព្រឹត្តិការណ៍ការប្រកួតកីឡាបាល់ទះ ពានរង្វាន់សម្តេចក្រឡាហោម ស ខេង ឆ្នាំ២០២៤។
តាមរយៈបណ្ដាញសង្គម នៅថ្ងៃទី២៤ ខែធ្នូ ឆ្នាំ២០២៤ ឯកឧត្តមអភិសន្ដិបណ្ឌិត ស សុខា បានបញ្ជាក់យ៉ាងដូច្នេះថា៖ «ក្នុងនាមមហាគ្រួសារបាល់ទះកម្ពុជា ខ្ញុំសូមថ្លែងអំណរគុណដល់ថ្នាក់ដឹកនាំក្លិបបាល់ទះ ទាំង ៣១ក្រុម ដែលបានបញ្ជូនកីឡាករ ចូលរួមប្រកួតប្រជែងយ៉ាងស្វិតស្វាញក្នុងព្រឹត្តិការណ៍ពានរង្វាន់សម្តេចក្រឡាហោម ស ខេង ឆ្នាំ២០២៤។ នេះជាការសាមគ្គីផ្ទៃក្នុងរបស់បាល់ទះជាតិយើង ដើម្បីផ្តល់ឱកាសឱ្យកីឡាករ មកពីបណ្តារាជធានី ខេត្ត បានបង្ហាញសមត្ថភាពរៀងៗខ្លួន។
ជាមួយនឹងការបញ្ចប់ព្រឹត្តិការណ៍ដ៏ធំនេះដោយជោគជ័យ ព្រមទាំងទទួលបានការគាំទ្រពីបងប្អូនមហាជន ទាំងក្នុងនិងក្រៅប្រទេស យើងមានភាគីនៅពីក្រោយឆាកជាច្រើន ដែលជួយជ្រោមជ្រែងការងាររៀងៗខ្លួនប្រកបដោយស្មារតីទទួលខុសត្រូវខ្ពស់។ ខ្ញុំសូមថ្លែងអំណរគុណដល់មន្រ្តីគ្រប់ផ្នែករបស់សហព័ន្ធកីឡាបាល់ទះកម្ពុជា មន្រ្តីគណៈកម្មការបច្ចេកទេស មន្រ្តីអាជ្ញាកណ្តាល ដែលបានរៀបចំការងារ និងដឹកនាំការប្រកួត តាំងពីដើមរហូតដល់ចប់។
ជាមួយគ្នានេះដែរ ខ្ញុំសូមថ្លែងអំណរគុណដល់ប្អូនៗយុវជនស្ម័គ្រចិត្តទាំងអស់ ដែលបានចូលរួមចំណែកបំពេញចន្លោះខ្វះខាត និងមិនប្រកាន់ការងារតូចធំ រហូតធ្វើឱ្យចរន្តការងារពីការប្រកួតមួយទៅការប្រកួតមួយទៀត និងពិធីបើក-បិទ ដំណើរការទៅដោយរលូនតាមការគ្រោងទុក។
ខ្ញុំក៏សូមថ្លែងអំណរគុណផងដែរចំពោះក្រុមហ៊ុន ខ្មែរប៊ែវើរីជីស ក៏ដូចជាក្រុមហ៊ុន សហគ្រាស និងសប្បុរសជននានា ដែលបានជួយឧបត្ថម្ភជាថវិកានិងសម្ភារៈ រួមចំណែកជាមួយសហព័ន្ធកីឡាបាល់ទះកម្ពុជា បង្កើតព្រឹត្តិការណ៍ប្រកួតបាល់ទះពានរង្វាន់សម្តេចក្រឡាហោម ស ខេង នេះឡើង ដើម្បីអភិវឌ្ឍន៍បាល់ទះជាតិផង និងជាការបង្កើតនូវចំណីចក្ខុជូនបងប្អូនជនរួមជាតិ និងមិត្តអន្តរជាតិផង។
ក្នុងនោះដែរ ខ្ញុំសូមថ្លែងអំណរគុណដល់ក្រុមការងារផ្សាយផ្ទាល់សារព័ត៌មានត្រយង និងស្ថានីយ៍ទូរទស្សន៍មហាផ្ទៃ ដែលបានផ្សាយផ្ទាល់ និងផ្សាយបន្តផ្ទាល់ នាំយកផ្ទាំងទស្សនីយភាពគ្រប់ការប្រកួតតាំងពីដើមរហូតដល់ចប់ ជូនបងប្អូនទាំងក្នុងនិងក្រៅប្រទេស បានទស្សនា តាមដានកីឡាករ ឬក្រុមដែលខ្លួនស្រលាញ់ចូលចិត្ត។ ក្នុងនោះផងដែរ ក៏សូមថ្លែងអំណរគុណដល់បងប្អូនអ្នកសារព័ត៌មាន និងអ្នកផលិតមាតិកាតាមអនឡាញ ដែលបានផលិតព័ត៌មានផ្សព្វផ្សាយជាបន្តបន្ទាប់។
អ្វីដែលមិនអាចភ្លេចបាននោះគឺ បងប្អូនក្រុមគ្រួសារបាល់ទះកម្ពុជាទាំងអស់ ដែលបានចំណាយពេលវេលា អញ្ជើញចូលទស្សនាការប្រកួតនៅពហុកីឡដ្ឋានជាតិផ្ទាល់ និងទស្សនាតាមការផ្សាយផ្ទាល់ ដើម្បីលើកទឹកចិត្តដល់ក្រុមរៀងៗខ្លួន។ ក្នុងនាមប្រមុខសហព័ន្ធកីឡាបាល់ទះកម្ពុជា ខ្ញុំនឹងខិតខំព្យាយាមរៀបចំការប្រកួតទាំងកម្រិតជាតិ និងអន្តរជាតិ ជូនបងប្អូនជាបន្តបន្ទាប់នៅឆ្នាំ២០២៥ ខាងមុខ» ៕
