ចង់តទឹក តអគ្គិសនី តម្រូវឱ្យមានឯកសារពីឃុំ សង្កាត់? មិនមានអ្វីស្មុគស្មាញទេ!
ភ្នំពេញ៖ នៅពេលពលរដ្ឋចង់ស្នើតបណ្ដាញទឹកស្អាត ឬអគ្គិសនីយកមកប្រើប្រាស់ ក្នុងចំណោមឯកសារតម្រូវភ្ជាប់មួយចំនួន គឺក៏មានដែរ លិខិតបញ្ជាក់តបណ្ដាញទឹក ឬតបណ្ដាញអគ្គិសនី ដែលចេញដោយមេឃុំ ចៅសង្កាត់នៃលំនៅឋាន ឬទីតាំងដែលស្នើសុំសេវាទឹក ឬអគ្គិសនីនោះ។
លោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ បានឱ្យដឹងថា បច្ចុប្បន្ន ការស្នើសុំសេវាតបណ្ដាញទឹកក្ដី ឬអគ្គិសនីក្ដី គឺមានភាពងាយស្រួលណាស់ ពីព្រោះរាជរដ្ឋាភិបាលបានដាក់បញ្ចូលសេវានេះទៅក្នុងយន្តការច្រកចេញចូលតែមួយឃុំ សង្កាត់រួចជាស្រេចហើយនៅទូទាំងប្រទេស។
ផ្អែកតាមតារាងឧបសម្ព័ន្ធនៃប្រកាសអន្តរក្រសួង លោកបណ្ឌិត ទូច សុឃៈ បានឱ្យដឹងថា សម្រាប់ឃុំ-សង្កាត់ក្នុងខេត្តរតនគិរី មណ្ឌលគិរី ស្ទឹងត្រែង ព្រះវិហារ និងឧត្តរមានជ័យ ការបញ្ជាក់លិខិតតបណ្ដាញទឹកស្អាត និងអគ្គិសនី ក្នុង១សន្លឹក មានតម្លៃ ៣០០០រៀល រយៈពេល៧ថ្ងៃ (នៃថ្ងៃធ្វើការ) និងមានសុពលភាព១លើក។
ដោយឡែក ឃុំ-សង្កាត់ក្នុងរាជធានី ខេត្តក្រៅពីខេត្តទាំង៥ខាងលើ ក្នុង១សន្លឹក មានតម្លៃ ៥០០០រៀល ដោយមានរយៈពេលនិងសុពលភាពដូចគ្នា។ ទោះបីជាគោលការណ៍បានកំណត់សេវានេះមានរយៈពេល៧ថ្ងៃ ប៉ុន្តែបើតាមលោកបណ្ឌិតអ្នកនាំពាក្យរង គឺជាក់ស្ដែងឃុំ សង្កាត់បានផ្ដល់សេវានេះលឿនជាងពេលកំណត់។
បើតាមលោកបណ្ឌិត ដើម្បីស្នើសុំសេវា លិខិតបញ្ជាក់តបណ្ដាញទឹកស្អាត និងអគ្គិសនី ប្រជាពលរដ្ឋ ត្រូវភ្ជាប់ជូនមន្រ្តីឃុំ សង្កាត់នូវឯកសារសម្គាល់សិទ្ធិកាន់កាប់អចលនាទ្រព្យ (ថតចម្លង) ចំនួន១សន្លឹក និងសៀវភៅគ្រួសារឬសៀវស្នាក់នៅ (ថតចម្លង) ១សន្លឹក ជាការស្រេច៕
