ចិនដាក់ដំណើរការនាវាវាយប្រហារដែនទឹកខ្នាតយក្សថ្មីដែលមានសមត្ថភាពផ្ទុក និងដំណើរការយន្តហោះចម្បាំង

ប៉េកាំង៖ ចិនបានដាក់ដំណើរការនាវាវាយប្រហារដែនទឹកខ្នាតយក្សថ្មីនៅថ្ងៃសុក្រទី២៧ខែធ្នូ ដែលមានសមត្ថភាពផ្ទុក និងដំណើរការយន្តហោះចម្បាំង ត្រូវបានរចនាឡើងដើម្បីពង្រឹងសមត្ថភាពប្រយុទ្ធរបស់កងទ័ពជើងទឹក នៅក្នុងលម្ហដែនសមុទ្ទឆ្ងាយៗ។

នាវាស៊ីឆ័ន (Sichuan) ជានាវាទីមួយនៃប្រភេទ០៧៦ គឺជានាវាដ៏ធំបំផុតរបស់ប្រទេសចិន ដោយអាចផ្ទុកទម្ងន់បាន៤ម៉ឺនតោន និងបំពាក់ដោយប្រព័ន្ធអេឡិចត្រូម៉ាញេទិក ដែលនឹងអនុញ្ញាតឱ្យយន្តហោះចម្បាំងចុះចតដោយផ្ទាល់។ នេះបើយោងតាមទីភ្នាក់ងារសារព័ត៌មានស៊ីនហួ។

សូមរំឭកថា នាវា វាយប្រហារលើ ផ្ទៃទឹក ដំបូង គេ របស់ ចិនប្រភេទ០៧៥ ត្រូវបាន ដាក់ ឲ្យ ដំណើរការ ក្នុង ឆ្នាំ២០១៩។

កងទ័ពជើងទឹកនៃកងទ័ពរំដោះប្រជាជនចិន បាននិងកំពុងធ្វើទំនើបកម្មកងកម្លាំងរបស់ខ្លួនអស់រយៈពេលជាងមួយទសវត្សរ៍មកហើយ ដោយមានគោលបំណងអាចប្រតិបត្តិការជាសកល។

គួរបញ្ជាក់ថា ចិនមានកងទ័ពជើងទឹកដ៏ធំបំផុតនៅក្នុងពិភពលោក ហើយកំពុងព្យាយាមធ្វើឱ្យប្រសើរឡើងនូវកងនាវារបស់ខ្លួន។ ថ្មីៗនេះ ក្រុមអ្នកស្រាវជ្រាវបានរកឃើញថា ចិនកំពុងធ្វើការលើការរចនានាវាផ្ទុកយន្តហោះដើរដោយថាមពលនុយក្លេអ៊ែរ អាចឱ្យរដ្ឋធានីប៉េកាំងដាក់ពង្រាយនាវារបស់ខ្លួន នៅក្នុងដែនទឹកឆ្ងាយៗ។ បច្ចុប្បន្ន សហរដ្ឋអាម៉េរិកមាននាវាផ្ទុកយន្តហោះចំនួន១១គ្រឿងដើរដោយថាមពលនុយក្លេអ៊ែរ៕