ក្រុមហ៊ុនសិង្ហបុរីមួយកំពុងផ្ដល់ជូនសេវាកម្មដ៏ចម្លែកមួយ គឺមន្តអាគមដាក់ស្នេហ៍
សិង្ហបុរី៖ ក្រុមហ៊ុនសិង្ហបុរីមួយកំពុងផ្ដល់ជូននូវសេវាកម្មដ៏ចម្លែកមួយ គឺមន្តអាគមដាក់ស្នេហ៍ដោយសន្យាថា នឹងនាំយកមកវិញនូវគូស្នេហ៍ដែលបានបាត់បង់ ឬបានបែកបាក់ ជាពិសេសទាក់ទាញទាំងការចាប់អារម្មណ៍ និងមានមន្តស្នេហ៍តាមប្រព័ន្ធអ៊ីនធឺណិត។
សេវាកម្មនេះមានតម្លៃ៣៦០ដុល្លារ។ ក្រុមហ៊ុន អះអាង ថា ពិធី នេះ ធ្វើ ឡើង ដោយគ្រូស្នេហ៍ជនជាតិ ថៃម្នាក់ ឈ្មោះ ជេម (James) មក ពី ខេត្ត ឈៀងម៉ៃ ដែល មាន បទពិសោធ ខាងអំពើដាក់ស្នេហ៍ជាង ២០ ឆ្នាំមកហើយ។
គ្រូស្នេហ៍ជនជាតិថៃរូបនេះ បាន អះអាង ថា លោកជាគ្រូតែ ម្នាក់ គត់ នៅ ប្រទេស ថៃ ដែល មាន ចំណេះ ដឹង សម្ងាត់ ខាងអាគមអូមអាមក្តាមដុត និងអំពើអំព័ន្ធដាក់ស្នេហ៍៍ដោយ ឆ្លង កាត់ តាម ក្បួនគម្ពីរសាស្ត្រាបុរាណ។
ក្នុងដំណើរនៃពិធីដាក់ស្នេហ៍នេះ អតិថិជនត្រូវបានស្នើសុំឱ្យផ្តល់រូបថត និងព័ត៌មានលម្អិតនៃដៃគូដែលពួកគេចង់បាន ឬចង់ដាក់ស្នេហ៍។ យោងតាមក្រុមហ៊ុន ពិធីនេះមានការចាប់អារម្ភខ្លាំងក្នុងចំណោមអតិថិជនមកពីប្រទេសចិន ខណៈសេវាកម្មខាងមន្តអាគម អំពើអំព័ន្ធបែបនេះមានតម្លៃខ្ពស់។
ទោះយ៉ាងណា មិនមែនគ្រប់គ្នាសុទ្ធតែជឿជាក់ទាំងអស់នោះទេ។ ជាក់ស្តែង ប្រព័ន្ធ ផ្សព្វផ្សាយ ចិន បាន រាយការណ៍ថា ករណី បោកប្រាស់ ជាច្រើន ពាក់ព័ន្ធ នឹង អំពើ ស្នេហ៍នេះ។
ក្នុងឆ្នាំ២០២២ ប៉ូលិសក្រុងសៀងហៃបានចាប់ខ្លួនមនុស្សមួយក្រុមដែលត្រូវបានចោទប្រកាន់ពីបទឆបោកប្រាក់ចំនួន ១៧៨១ដុល្លារអាម៉េរិក តាមរយៈពិធីសាសនាក្លែងក្លាយ។ ស្រដៀងគ្នានេះដែរ តុលាការរដ្ឋធានីប៉េកាំង បានកាត់ទោសស្ត្រីម្នាក់ឱ្យជាប់ពន្ធនាគាររយៈពេល៣ឆ្នាំពីបទឆបោកមនុស្សម្នាក់ទៀតជាង១០០០ដុល្លារ ជុំវិញករណីស្រដៀងគ្នា។
គួបញ្ជាក់ថា ការចាប់ អារម្មណ៍ ជាមួយ នឹង មន្តអាគម ឬអំពើដាក់ ស្នេហ៍ នេះ មិន មែន ជា រឿង ប្លែក សម្រាប់ ប្រទេស សិង្ហបុរី ទេ ព្រោះជំនឿស្រដៀងគ្នានេះមានឫសគល់ប្រវត្តិសាស្ត្រនៅអាស៊ីអាគ្នេយ៍រួមទាំង៖ ឡាវ ថៃ និងកម្ពុជាជាដើម។ នៅសម័យបុរាណ មនុស្សធ្វើពិធីបែបនេះដើម្បីដោះស្រាយបញ្ហាស្នេហ៍ា ដើម្បីទាក់ទាញដៃគូ ឬបង្កើតភាពចុះសម្រុងជាមួយអ្នកដទៃ៕
