ប្រធានាធិបតីអ៊ុយក្រែន អះអាងថា កងទ័ពកូរ៉េខាងជើងដែលដាក់ពង្រាយនៅតំបន់ឃឺស កំពុងខាតបង់យ៉ាងធ្ងន់ធ្ងរ ដោយពួកគេត្រូវបានទុកចោលដោយកងកម្លាំងរុស្ស៊ី

កៀវ៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី  បានអះអាងកាលពីថ្ងៃសុក្រទី២៧ធ្នូថា កងទ័ពកូរ៉េខាងជើងដែលដាក់ពង្រាយនៅតំបន់ឃឺសរបស់រុស្ស៊ី កំពុងទទួលរងការខាតបង់យ៉ាងធ្ងន់ធ្ងរ ដោយសារតែពួកគេត្រូវបានទុកចោលដោយកងកម្លាំងរុស្ស៊ី។ ដូច្នេះ ការណ៍នេះ បានបបង្ហាញយ៉ាងប្រត្យក្សថា រុស្ស៊ីកំពុងច្រានយោធាកូរ៉េខាងជើងទម្លាក់ក្នុងជ្រោះមរណៈ ខណៈរដ្ឋធានីមូស្គូធ្វើសោះអង្គើយចំពោះទាហានរបស់របបព្យុងយ៉ាង។

លោក ហ្សេឡេនស្គី ថ្លែងក្នុងសន្ទរកថាមួយថា ទាហានរុស្ស៊ីកំពុងបញ្ជូនជនជាតិកូរ៉េខាងជើងចូលទៅក្នុងសមរភូមិ ខណៈយោធាកូរ៉េខាងជើងកំពុងគេចរកតែប្រាសអាយុ។ លោកក៏បានសង្កត់ធ្ងន់ថា៖«យោធាកូរ៉េខាងជើងកំពុងរងការខាតបង់យ៉ាងធ្ងន់ធ្ងរ។ យើងឃើញច្បាស់នឹងភ្នែកថា ទាំងយោធារុស្ស៊ី និងមេបញ្ជាការយោធាកូរ៉េខាងជើង មិនមានឆន្ទៈក្នុងការធានាការរស់រានមានជីវិតរបស់កងទ័ពកូរ៉េខាងជើងទាំងនេះទេ[..]។ ជាក់ស្តែង កងទ័ពរុស្ស៊ីកាន់អាវុធប្រយុទ្ធក្នុងសមរភូមិមានតិចតួចណាស់»។

ថ្មីៗនេះរបាយការណ៍ចារកម្មអ៊ុយក្រែន និងលោកខាងលិចបានបង្ហាញថា មានទាហានកូរ៉េខាងជើងប្រហែល១២០០០នាក់ ត្រូវបានដាក់ពង្រាយនៅក្នុងតំបន់ឃឺស។ យ៉ាងណា នៅដើមសប្តាហ៍នេះ លោក ហ្សេឡេនស្គី បានអះអាងថា ប្រជាជនកូរ៉េខាងជើងជាង៣០០០នាក់ ត្រូវបានសម្លាប់ ឬរងរបួស។

ទន្ទឹមនឹងកងកម្លាំង អ៊ុយក្រែនបាន ចាប់ ទាហាន កូរ៉េ ខាង ជើងពីរ ទៅបី នាក់ដែរ ប៉ុន្តែ ពួកគេ បាន រង របួស យ៉ាង ធ្ងន់ធ្ងរ ដោយគ្មានសង្ឃឹមរស់ឡើយ។ ជាចុងក្រោយ អតីតតារាកំប្លែង ហ្សេឡេនស្គី បានបញ្ជោរបញ្ចើចបញ្ចើរក្នុងន័យចំអកឡកឡឺយថា៖«យោធាកូរ៉េខាងជើងមិនគួរបង់ជីវិតចោលឆ្អឹងឥតអំពើក្នុងសមរភូមិសង្គ្រាមនៅអឺរ៉ុបទេ»៕