ក្មេងប្រុស២នាក់ទៅងូតទឹកប្រឡាយលង់ស្លាប់

ភ្នំពេញ៖ ក្មេងប្រុសពីរនាក់បាននាំគ្នាទៅមួយងូតទឹកប្រឡាយចម្ងាយ ៣០០ម៉ែត្រខាងលិចភូមិទ្រលោក ឃុំភ្នំលៀបស្រុកព្រះនេតព្រះ ខេត្តបន្ទាយមានជ័យបណ្ដាលឱ្យលង់ស្លាប់ទាំហ២នាក់បង្កការភ្ញាក់ផ្អើលនៅវេលាម៉ោង១២និង១០នាទីរសៀលថ្ងៃទី២៨ ខែធ្នូ ឆ្នាំ២០២៤។

នគរបាលស្រុកព្រះនេតព្រះ បានឲ្យដឹងថា ក្មេងប្រុសរងគ្រោះទាំងនាក់មានឈ្មោះ១/-មឿន កូមីន អាយុ ១១ឆ្នាំ និង២/-មាស សៀន អាយុ ១០ឆ្នាំ។ ក្មេងទាំង២នាក់រស់នៅភូមិទ្រលោកឃុំភ្នំលៀប ស្រុកព្រះនេតព្រះ ខេត្តបន្ទាយមានជ័យ ជាមួយជីដូនចាស់ជរាដោយឪពុកម្ដាយរវល់ទៅធ្វើការនៅប្រទេសថៃ។

នគរបាលស្រុកព្រះនេត្រព្រះ បានបញ្ជាក់ថា នៅមុនពេលកើតហេតុក្មេងប្រុសរងគ្រោះទាំង២នាក់បាននាំគ្នាទៅងូតទឹកប្រឡាយចម្ងាយ ៣០០ម៉ែត្រខាងលិចភូមិ ហើយក៏បានលង់ទឹកបណ្ដាលឲ្យស្លាប់ទាំង២នាក់។

សពក្មេងប្រុសទាំង២នាក់បានប្រគល់ជូនក្រុមគ្រួសារចាត់ចែងធ្វើបុណ្យតាមប្រពៃណីក្រោយពីសមត្ថកិច្ចបានពិនិត្យធ្វើកោសល្យវិច័្ចយរួច ៕