អភិបាលខេត្តតាកែវ ណែនាំអាជ្ញាធរសម្អាតអនាម័យបរិស្ថាន នៅតាមតំបន់រមណីយដ្ឋាននានាក្នុងខេត្ត ឱ្យបានស្អាតល្អ ដើម្បីទាក់ទាញភ្ញៀវទេសចរណ៍

ភ្នំពេញ៖ ឯកឧត្តម វ៉ី សំណាង អភិបាលខេត្តតាកែវ បានធ្វើការណែនាំ និងរំលឹកដល់អាជ្ញាធរស្រុក-ក្រុង ពិសេសមន្ទីរទេសចរណ៍ខេត្ត ត្រូវសហការគ្នា ធ្វើការសម្អាតអនាម័យ បរិស្ថាន នៅតាមតំបន់រមណីយដ្ឋាននានាក្នុងខេត្ត ឱ្យបានស្អាតល្អ ដើម្បីទាក់ទាញ ភ្ញៀវទេសចរណ៍ ចូលមកកម្សាន្តកាន់តែច្រើន។

ថ្លែងក្នុងឱកាសអញ្ជើញក្នុងសន្និបាត បូកសរុបលទ្ធផលការងារ ឆ្នាំ ២០២៤ នឹងលើកទិសដៅបន្ត ឆ្នាំ២០២៥ របស់រដ្ឋបាលខេត្តតាកែវ នៅថ្ងៃទី៣០ ខែធ្នូ ឆ្នាំ២០២៤ ឯកឧត្តម វ៉ី សំណាង បានថ្លែងបន្តថា ខេត្តតាកែវមានតំបន់រមណីយដ្ឋាន ប្រវត្តិសាស្ត្រ វប្បធម៌ និងរមណីយដ្ឋានកែច្នៃជាច្រើនកន្លែង សម្រាប់ភ្ញៀវជាតិ អន្តរជាតិ មកលេងកម្សាន្តជារៀងរាល់ថ្ងៃ ទន្ទឹមនឹងនោះ ដើម្បីទាក់ទាញ ភ្ញៀវជាតិ មកលេងកាន់តែច្រើនបាន គប្បីអាជ្ញាធរ ក្រុងស្រុក ដែលមានតំបន់រមណីយដ្ឋាន ត្រូវធ្វើការអភិវឌ្ឍន៍ កែច្នៃ ធ្វើយ៉ាងណាឲ្យមានភាពទាក់ទាញ ពិសេស បញ្ហាសំរាម ត្រូវចូលរួមសំអាត ឱ្យបានស្អាតល្អ ដើម្បីធានាបាននៅ ភាពស្អាត បរិស្ថានស្អាត និងអនាម័យជូនភ្ញៀវទេសចរណ៍។

អភិបាលខេត្តតាកែវ បានថ្លែងបន្តទៀតថា ក្រៅពីការអភិវឌ្ឍន៍ តំបន់ទេសចរណ៍ អាជ្ញាធរ ពិសេសមន្ទីរជំនាញ ត្រូវយកចិត្តទុកដាក់ ណែនាំដល់អាជីវករលក់ដូរ មិនត្រូវដំឡើងថ្លៃ ហួសហេតុពេកទេ ដែល ធ្វើឲ្យ ប៉ះពាល់ដល់ភ្ញៀវជាតិ អន្តរជាតិ មកលេងកម្សាន្ត ព្រោះវិស័យទេសចរណ៍ គឺជាវិស័យមួយដែលជំរុញ ដល់កំណើនសេដ្ឋកិច្ចជាតិ និងប្រជាពលរដ្ឋ បានរីកចម្រើន ចូលរួមកាត់បន្ថយ ភាពក្រីក្រ និងចំណាកស្រុកផងដែរ៕