ហាណូយ៖ រដ្ឋធានីហាណូយរបស់ប្រទេសវៀតណាមត្រូវបានគ្របដណ្ដប់ដោយផ្សែងអព្ទពុលខ្លាំងក្នុងរយៈពេលប៉ុន្មានសប្តាហ៍ថ្មីៗនេះ ដោយបានរុញរដ្ឋធានីនេះឱ្យស្ថិតនៅចំណាត់ថ្នាក់កំពូលនៃបញ្ជីរដ្ឋធានី/ទីក្រុងដែលមានការបំពុលខ្លាំងបំផុតលើពិភពលោក ខណៈរដ្ឋាភិបាលកុម្មុយនីស្ដវៀតណាមបានអះអាងថានឹងជំរុញឱ្យប្រើប្រាស់រថយន្តអគ្គិសនី (EVs) បន្ថែមទៀតដើម្បីកាត់បន្ថយបញ្ហាបរិស្ថាន។

កម្រិតភាគល្អិតនិចលក្នុងខ្យល់ដ៏គ្រោះថ្នាក់ ឬ PM2.5 ត្រូវបានវាស់នៅកម្រិត ២៦៦មីក្រូក្រាមក្នុងមួយម៉ែត្រគូបនៅរដ្ឋធានីហាណូយកាលពីថ្ងៃសុក្រទី៣ខែមករាឆ្នាំ២០២៥ ដែលជាកម្រិតជាតិពុលក្នុងបរិយាកាសខ្ពស់បំផុតក្នុងលោក។ នេះបើយោងតាមក្រុមហ៊ុន AirVisual។ ប្រទេសអាស៊ីអាគ្នេយ៍មួយនេះបានរាយការណ៍ពីការបំពុលខ្យល់យ៉ាងធ្ងន់ធ្ងរនៅក្នុងទីក្រុងធំៗរបស់ខ្លួនអស់រយៈពេលជាច្រើនឆ្នាំ ជាពិសេសនៅរដ្ឋធានីហាណូយតែម្ដង។

ផ្សែងអព្ទពុលដ៏ក្រាស់ក្រែលនេះ ភាគច្រើនបណ្តាលមកពីចរាចរណ៍មមាញឹកខ្លាំង ការដុតកាកសំណល់សំរាម និងសកម្មភាពឧស្សាហកម្មនានា ខណៈប្រទេសសង្គមនិយមមួយនេះជាមជ្ឈមណ្ឌលផលិតកម្មក្នុងតំបន់ដ៏សំខាន់ដែលមានសេដ្ឋកិច្ចរីកលូតលាស់លឿនបំផុតនៅអាស៊ី។ គួរបញ្ជាក់ថា ការបំពុលខ្យល់ខ្លាំងបំផុតបែបនេះនឹងអាចនាំមកនូវវិបត្តិសុខភាពសម្រាប់មនុស្សចាស់ កុមារ ឬអ្នកដែលមានបញ្ហាសុខភាពស្រាប់ ខណៈកម្រិតភាគល្អិតនិចលក្នុងខ្យល់កាន់តែអាក្រក់ទៅៗនាពេលថ្មីៗនេះ៕