រុស្ស៊ីប្រកាសភាពអាសន្នក្នុងតំបន់គ្រីមៀ ដែលខ្លួនរឹបអូសពីអ៊ុយក្រែន ខណៈកម្មករសម្អាតដីខ្សាច់ និងដីកខ្វក់ជាប់ទៅដោយប្រេងរាប់តោន
មូស្គូ៖ រុស្ស៊ីបានប្រកាសភាពអាសន្នក្នុងតំបន់គ្រីមៀ ដែលខ្លួនបានរឹបអូសពីអ៊ុយក្រែនក្នុងឆ្នាំ២០១៤ ខណៈកម្មករបានសម្អាតដីខ្សាច់ និងដីកខ្វក់ជាប់ទៅដោយប្រេងរាប់តោននៅផ្នែកម្ខាងនៃច្រកសមុទ្ទគើច (Kerch) បន្ទាប់ពីមានការលេចធ្លាយប្រេងនៅក្នុងសមុទ្ទខ្មៅកាលពីខែមុន។
លោក មីខាល រ៉ាហ្សវ៉ូហ្សែវ (Mikhail Razvozhaev) អភិបាលក្រុងសេវ៉ាស្តូប៉ូល (Sevastopol) ដែលដំឡើងដោយប្រទេសរុស្ស៊ី បាននិយាយថា ដានថ្មីនៃការបំពុលតិចតួចទាមទារឱ្យមានការលុបបំបាត់ជាបន្ទាន់ និងបានប្រកាសភាពអាសន្ននៅក្នុងទីក្រុង ដែលផ្តល់អំណាចបន្ថែមដល់អាជ្ញាធរក្នុងការសម្រេចចិត្តយ៉ាងឆាប់រហ័ស ដូចជាការបញ្ជាឱ្យពលរដ្ឋជម្លៀសចេញពីផ្ទះសម្បែងរបស់ពួកគេ។ ច្រកសមុទ្ទគើច រវាងសមុទ្ទខ្មៅ និងសមុទ្ទអាហ្សូវ (Azov) ហើយបំបែកឧបទ្វីបគ្រីមៀពីតំបន់ក្រាសណូដា (Krasnodar) របស់រុស្ស៊ី។
ក្រសួងសង្គ្រោះបន្ទាន់ បានបញ្ជាក់កាលពីថ្ងៃអាទិត្យទី៥មករាថា ពេលនេះក្រុមអ្នកជួយសង្គ្រោះបានសម្អាតដីខ្សាច់ និងដីកខ្វក់ជាង៨៦០០០តោន។ ប្រេង បាន លេច ធ្លាយ ចេញ ពីនាវា ដឹក ប្រេង ចាស់ ពីរ គ្រឿង ដែល ត្រូវ ខ្យល់ ព្យុះ បោកបក់ កាល ពី ថ្ងៃ ទី ១៥ ខែ ធ្នូ។ មួយ បាន លិច ហើយ មួយ គ្រឿង ទៀត បាន ក្រឡាប់។ មនុស្សជាង១០០០០នាក់បាននិងកំពុងធ្វើការដើម្បីសម្អាតប្រេងចេញពីឆ្នេរខ្សាច់ក្នុង និងជុំវិញតំបន់អាណាប៉ា ដែលជារមណីយដ្ឋានរដូវក្ដៅ។
ក្រុមបរិស្ថាន បានរាយការណ៍ពីការស្លាប់របស់សត្វដូហ្វីន និងសត្វស្លាបសមុទ្ទ។ ក្រសួងសង្គ្រោះបន្ទាន់បាន ផ្សព្វផ្សាយ ខ្សែ វីដេអូ របស់ មនុស្សរាប់សិប នាក់ ក្នុង ឈុត ការពារ កំពុងជីគ ដី ខ្សាច់ជាប់ប្រេង ចេញ ដោយ ប៉ែល ដាក់ចូលក្នុងថង់។
ក្រសួងដឹកជញ្ជូនរបស់រុស្ស៊ី បានឱ្យដឹងនៅកាលពីសប្តាហ៍មុនថា អ្នកជំនាញបានប៉ាន់ប្រមាណថា ផលិតផលប្រេងប្រហែល២៤០០តោន បានហៀរចូលទៅក្នុងសមុទ្ទ ដែលតិចជាងការប៉ានស្មានដំបូង។ នៅពេលគ្រោះមហន្តរាយកើតឡើង ប្រព័ន្ធផ្សព្វផ្សាយរដ្ឋបានរាយការណ៍ថា នាវាដឹកប្រេងដែលរងគ្រោះថ្នាក់ ទាំងពីរដែលមានអាយុលើសពី៥០ ឆ្នាំ បានដឹកផលិតផលប្រេងប្រហែល៩២០០០តោន (៦២០០០បារ៉ែល)សរុប៕
