រដ្ឋមន្ត្រីក្រសួងអប់រំ៖ កីឡា មានសារៈសំខាន់ខ្លាំង ក្នុងជីវិតរបស់ប្រជាជនគ្រប់រូប ក្នុងការជួយកាត់បន្ថយសម្ពាធ ក៏ដូចជាមានលំនឹងរវាងការរស់នៅ និងការសម្រាក

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី៥ ខែមករា ឆ្នាំ២០២៥ បានអញ្ជើញជាអធិបតី ក្នុងការប្រកួតកីឡាហែលទឹកដណ្តើមពានរង្វាន់ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ដើម្បីអបអរសាទរ ទិវាជ័យជំនះ ៧ មករា សរុបជាទឹកប្រាក់ចំនួន៧លានរៀល នៅសាលារៀនម៉ារីវែលអន្តរជាតិភ្នំពេញ (MISPP) និងមានការចូលរួមពី លោកបណ្ឌិត សេង បូណា ប្រធានក្រុមប្រឹក្សាភិបាល នៃសាលារៀនម៉ារីវែលអន្តរជាតិភ្នំពេញ ឯកឧត្តម លោកជំទាវ ថ្នាក់ដឹកនាំក្រសួង លោកគ្រូ អ្នកគ្រូ សិស្សានុសិស្ស កីឡាករ កីឡាការិនី និងអ្នកពាក់ព័ន្ធទាំងអស់។

តាមរយៈលោក ស្វាយ ធីរិទ្ធ តំណាងគណៈគ្រប់គ្រងនៃសាលារៀនម៉ារីវែលអន្តរជាតិភ្នំពេញ ( MISPP) បានឱ្យដឹងថា ការប្រកួតកីឡាហែលទឹកដណ្តើមពានរង្វាន់ឯកឧត្តមបណ្ឌិតសភាចារ្យ បានបើកទទួលការចុះឈ្មោះដោយសេរី ដែលបែងចែកជា ២ក្រុម គឺ ក្រុមទី១ មានអាយុចន្លោះ ១៨ ទៅ ៣៥ ឆ្នាំ ហើយចំណែកក្រុមទី២ មានអាយុចាប់ពី ៣៦ ឆ្នាំឡើង។ ការចុះឈ្មោះបើកទទួលរហូតដល់ថ្ងៃទី ០៣ មករា ២០២៥ វេលាម៉ោង ៦ ល្ងាច។ ក្នុងថ្ងៃប្រកួតដដែលនោះមានការចូលរួមពីសាធារណជន បេក្ខជន និងបេក្ខនារីចាប់ពីអាយុ១៨ឆ្នាំឡើងទៅ ប្រមាណជា៣០០នាក់។

មានប្រសាសន៍ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណយ៉ាងជ្រាលជ្រៅដល់សាលារៀនម៉ារីវែលអន្តរជាតិភ្នំពេញ ដែលបានរៀបចំឱ្យមានការប្រកួតនេះឡើង ដែលបានចូលរួមចំណែកផ្សព្វផ្សាយ និងលើកកម្ពស់សារៈសំខាន់នៃកីឡាដល់ប្រជាជន​គ្រប់​រូប​ ឱ្យចូលរួម​ស្រឡាញ់ ចូល​ចិត្ត គាំទ្រ និងលេង​កីឡា ដើម្បី​ទទួល​បាន​សុខភាព​ល្អ ជីវភាពល្អប្រសើរ សាមគ្គីភាពប្រកបដោយ​បរិ​យា​បន្ន សុខុដុមនីយកម្មក្នុងសង្គម។

បន្ថែមពីនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ក៏បានគូសបញ្ជាក់ថា កីឡាគឺមានសារៈសំខាន់ខ្លាំងនៅក្នុងជីវិតរបស់ប្រជាជនគ្រប់រូប ក្នុងការជួយកាត់បន្ថយសម្ពាធ ក៏ដូចជាមានលំនឹងរវាងការរស់នៅ និងការសម្រាក ជាពិសេសចំពោះកីឡាហែលទឹកនេះផ្ទាល់ ដែលនឹងជួយឱ្យពួកគាត់មានសុខភាពមាំមួន ប្រាជ្ញាឈ្លាសវៃ ឈានទៅសម្រេចបានភាពជោគជ័យទាំងក្នុងការងារ និងការសិក្សា ក៏ដូចជាអាចជួយខ្លួនឯងនិងអ្នកដទៃបាននៅពេលជួបប្រទះបញ្ហាផ្សេងៗ ដូចជាការលង់ទឹកជាដើម។

សារជាថ្មីម្តងទៀត តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងវាយតម្លៃខ្ពស់ដល់ក្រុមការងារពាក់ព័ន្ធទាំងអស់ ដែលបានខិតខំប្រឹងប្រែងរៀបចំការប្រកូតនេះឡើងដែលប្រព្រឹត្តទៅបានរលូនល្អ និងលើកទឹកចិត្តឱ្យរៀបចំការប្រកួតបន្ថែមទៀត ដើម្បីលើកកម្ពស់វិស័យកីឡា និងសុខុមាលភាពល្អ ចូលរួមចំណែកលើកស្ទួយសាធារណជនឱ្យស្រឡាញ់កីឡា ជាពិសេសជួយបន្តជំរុញចលនា”យុវជនម្នាក់ ចេះកីឡាមួយប្រភេទយ៉ាងតិចប្រចាំជីវិត” របស់រាជរដ្ឋាភិបាល៕