សត្វក្រៀល ក្នុងតំបន់ការពារទេសភាពបឹងព្រែកល្ពៅ និងតំបន់ការពារទេសភាពអន្លង់ព្រីង បានថយចុះប្រមាណ ១៥ក្បាល
ភ្នំពេញ៖ តាមរយៈការចុះធ្វើជំរឿនប្រចាំខែធ្នូ ឆ្នាំ២០២៤ អង្គការជីវិតធម្មជាតិនៅកម្ពុជា កាលពីថ្ងៃអាទិត្យទី៥មករា បានឱ្យដឹងថា សត្វក្រៀល នៅក្នុងតំបន់ការពារទេសភាពបឹងព្រែកល្ពៅ និងតំបន់ការពារទេសភាពអន្លង់ព្រីង បានថយចុះប្រមាណ១៥ក្បាល បើធៀបនឹងរយៈពេលដូចគ្នាកាលពីឆ្នាំ២០២៣។
កាលពីថ្ងៃទី៣០ និង៣១ ខែធ្នូ ឆ្នាំ២០២៤ អង្គការជីវិតធម្មជាតិនៅកម្ពុជា បានសហការជាមួយមន្ទីរបរិស្ថានខេត្តតាកែវ និងមន្ទីរបរិស្ថានខេត្តកំពត ចុះធ្វើជំរឿនសត្វក្រៀលប្រចាំខែធ្នូ ឆ្នាំ២០២៤ នៅតំបន់ការពារទេសភាពបឹងព្រែកល្ពៅ ខេត្តតាកែវ និងតំបន់ការពារទេសភាពអន្លង់ព្រីង ខេត្តកំពត។ តាមរយៈជំរឿននេះ អង្គការបានរកឃើញ សត្វក្រៀលដែលវត្តមាននៅតំបន់ដីសណ្ដរមេគង្គក្រោមប្រទេសកម្ពុជា មានចំនួន៥២ក្បាល។ ក្នុងនោះ សត្វក្រៀលចំនួន៤៤ក្បាល មានវត្តមានក្នុងតំបន់ការពារទេសភាពបឹងព្រែកល្ពៅ និងចំនួន៨ក្បាល មាននៅក្នុងតំបន់ការពារទេសភាពអន្លង់ព្រីង។
បើតាមអង្គការជីវិតធម្មជាតិ តាមរយៈចំនួនសរុបនេះ សត្វក្រៀលបានថយចុះចំនួន១៥ក្បាល ស្មើនិង២២,៣៩ភាគរយ បើធៀបនឹងចំនួនសរុបកាលពីខែធ្នូ ឆ្នាំ២០២៣ មានចំនួន៦៧ក្បាល។ ការថយចុះនេះ បណ្ដាលមកពីការប្រែប្រួលទីជម្រក ការរំខានពីសកម្មភាពមនុស្សចូលនេសាទក្នុងតំបន់ការពារ និងការលែងសត្វក្របីច្រើន ពាសវាលពាសកាលក្នុងតំបន់ការពារជាដើម។ នេះបើតាមអង្គការរជីវិតធម្មជាតិ។ ពាក់ព័ន្ធនឹងបញ្ហានេះ អង្គការសង្គមស៊ីវិលបានស្នើដល់សហគមន៍ អាជ្ញាធរមូលដ្ឋាន និងប្រជាពរដ្ឋទូទាំងប្រទេស ចូលរួមការពារតំបន់ដីសើមនេះ និងនិយាយថាទេ ចំពោះការបរិភោគសាច់សត្វព្រៃគ្រប់ប្រភេទ។
តំបន់ការពារទេសភាពបឹងព្រែកល្ពៅ ខេត្តតាកែវ និងតំបន់ការពារទេសភាពអន្លង់ព្រីង ខេត្តកំពត ជាតំបន់ទេសចរណ៍មួយសម្បូរទៅដោយសត្វស្លាប បក្សី ដូចជាសត្វចាបព្រៃវែង រនាលពណ៌ ត្រដក់ធំ ត្រយងខ្លួនស ទុងប្រផេះ ស្មោញ និងសត្វក្រៀល ដែលជាប្រភេទសត្វកម្រ និងជិតផុតពូជ៕
