ឆ្នាំ២០២៤ ថៃ ទទួលបានភ្ញៀវទេសចរបរទេសជាង ៣៥,៥៤លាននាក់
បាងកក៖ ថៃទទួលបានភ្ញៀវទេសចរបរទេសជាង ៣៥,៥៤លាននាក់ក្នុងឆ្នាំ២០២៤ ខណៈប្រទេសពឹងផ្អែកខ្លាំងលើវិស័យទេសចរណ៍នេះមានបំណងទាក់ទាញភ្ញៀវទេសចរអន្តរជាតិឱ្យបាន៤០ លាននាក់ និងបង្កើនប្រាក់ចំណូលដល់ ៩៨,៥ពាន់លានដុល្លារនៅឆ្នាំ២០២៥ នេះ។
ភ្ញៀវទេសចរចិនគឺជាប្រភពទីផ្សារដ៏ធំបំផុតសម្រាប់ប្រទេសថៃកាលពីឆ្នាំមុន ជាមួយនឹងការមកដល់ចំនួន៦,៧៣ លាននាក់ បន្ទាប់មកគឺ៤,៩៥ លាននាក់មកពីម៉ាឡេស៊ី និង២,១២ លាននាក់មកពីប្រទេសឥណ្ឌា។ នេះបើយោងតាមក្រសួងទេសចរណ៍ និងកីឡាថៃ។ ក្រសួងបានបង្ហាញនៅក្នុងសេចក្តីថ្លែងការណ៍មួយថា ថៃទទួលបានប្រាក់ចំណូលប្រហែល៤៨,៤៥ ពាន់លានដុល្លារអាម៉េរិក ពីភ្ញៀវទេសចរអន្តរជាតិក្នុងឆ្នាំ២០២៤ ដែលកើនឡើង៣៤ ភាគរយពីឆ្នាំ២០២៣។ បច្ចុប្បន្ន ភ្ញៀវទេសចរមកពី៩៣ប្រទេស ត្រូវបានអនុញ្ញាតឱ្យស្នាក់នៅក្នុងប្រទេសថៃរហូតដល់៦០ ថ្ងៃដោយគ្មានទិដ្ឋាការ រួមទាំងអ្នកមកពីទីផ្សារសំខាន់ៗដូចជា ចិន ឥណ្ឌា កូរ៉េខាងត្បូង និងរុស្ស៊ី។ ចាប់ពីខែមករានេះ ភ្ញៀវទេសចរទៅប្រទេសថៃអាចដាក់ពាក្យសុំទិដ្ឋាការអេឡិចត្រូនិកតាមរយៈប្រព័ន្ធអនឡាញដែលមាននៅគ្រប់ស្ថានទូត និងស្ថានកុងស៊ុលថៃទូទាំងពិភពលោក ដោយធានាបាននូវដំណើរការដាក់ពាក្យកាន់តែងាយស្រួល និងជម្រើសបង់ប្រាក់តាមអ៊ីនធឺណិតដ៏ងាយស្រួល។
ទន្ទឹមគ្នានោះ យោងតាមអាជ្ញាធរទេសចរណ៍ ព្រះរាជាណាចក្រនេះមានគោលបំណងទាក់ទាញភ្ញៀវទេសចរអន្តរជាតិរហូតដល់ ៤០លាននាក់នៅឆ្នាំនេះ។ លោក ស៊ូវង្ស ធៀនថុង (Suwong Thienthong) រដ្ឋមន្ត្រីក្រសួងទេសចរណ៍ និងកីឡា បានបង្ហាញផែនការជំរុញទេសចរណ៍នៅឆ្នាំ២០២៥ ដោយប្រើយុទ្ធនាការ «ឆ្នាំទេសចរណ៍ដ៏អស្ចារ្យរបស់ប្រទេសថៃ២០២៥ (Amazing Thailand Grand Tourism Year 2025)» រាជរដ្ឋាភិបាលនឹងធ្វើការជាមួយក្រុមហ៊ុនទេសចរណ៍ទូទាំងពិភពលោក ដើម្បីលើកកម្ពស់វិស័យទេសចរណ៍។ គោលបំណងគឺដើម្បីបង្កើនប្រាក់ចំណូលពីវិស័យទេសចរណ៍ចំនួន ៧,៥ភាគរយ ស្មើនឹង៩៨,៥ ពាន់លានដុល្លារ។ លោករដ្ឋមន្ត្រីក៏នឹងអញ្ជើញឯកអគ្គរដ្ឋទូតបរទេសដែលឈរជើងក្នុងប្រទេសថៃ មកពិភាក្សាអំពីឧបសគ្គដែលអាចនឹងរារាំងភ្ញៀវទេសចរអន្តរជាតិពីការមកទស្សនាប្រទេសនេះផងដែរ។ គោលបំណងនៃកិច្ចពិភាក្សាទាំងនេះ គឺដើម្បីកែលម្អលក្ខខណ្ឌសម្រាប់ភ្ញៀវទេសចរ។ បន្ទាប់ពីបញ្ហានេះ អាជ្ញាធរពាក់ព័ន្ធ និងតំណាងវិស័យឯកជននឹងត្រូវអញ្ជើញឱ្យរួមគ្នារកទីផ្សារចំណាយខ្ពស់ដូចជាអឺរ៉ុប ឥណ្ឌា និងម៉ាឡេស៊ី ដើម្បីប៉ះប៉ូវការធ្លាក់ចុះនៃភ្ញៀវទេសចរចិន។
លទ្ធផលនៃវិស័យទេសចរណ៍ត្រូវបានគេរំពឹងថានឹងមានភាពប្រសើរឡើងយ៉ាងខ្លាំងនៅឆ្នាំ២០២៥ បើធៀបនឹងឆ្នាំ២០២៤។ លោក ថាផានី គាតផាយប៊ុន (Thapanee Kiatphaiboon) ទេសាភិបាលនៃអាជ្ញាធរទេសចរណ៍នៃប្រទេសថៃ ក៏បានចង្អុលបង្ហាញថា ព្រឹត្តិការណ៍ឆ្លងឆ្នាំបានជំរុញសេដ្ឋកិច្ចដល់ជាង១,៨ ពាន់លានដុល្លារ នៅក្នុងអាជីវកម្មដែលទាក់ទងនឹងទេសចរណ៍ រួមទាំងសណ្ឋាគារ ភោជនីយដ្ឋាន និងឧស្សាហកម្មកម្សាន្ត។ ព្រឹត្តិការណ៍នេះបានទាក់ទាញភ្ញៀវទេសចរបរទេសចំនួន១,៥៦ លាននាក់ទៅកាន់ប្រទេសថៃ កើនឡើង១៦ ភាគរយ និងបង្កើតប្រាក់ចំណូលចំនួន ៤៥ពាន់លានបាត កើនឡើង២០ភាគរយ៕
