ប្រធានាធិបតីលីបង់តែងតាំងលោក Nawaf Salam ជានាយករដ្ឋមន្ត្រីថ្មី

បេរូត៖ ប្រធានាធិបតីលីបង់បានប្រកាសនៅក្នុងសេចក្តីថ្លែងការណ៍មួយថា លោក Nawaf Salam ប្រធានតុលាការយុត្តិធម៌អន្តរជាតិនៅទីក្រុងឡាអេ ត្រូវបានតែងតាំងជានាយករដ្ឋមន្ត្រីថ្មីរបស់ប្រទេសលីបង់ នៅថ្ងៃទី១៣ ខែមករា និងទទួលភារកិច្ចបង្កើតរដ្ឋាភិបាលថ្មីកាលពីថ្ងៃចន្ទ។

ការតែងតាំងនេះ បានធ្វើឡើងបន្ទាប់ពីលោក Salam ទទួលបានសំឡេងគាំទ្រចំនួន៨៤ ក្នុងចំណោម ១២៨សំឡេងរបស់សភា អំឡុងពេលការប្រឹក្សាដែលមានចំណងដែលធ្វើឡើងដោយលោកប្រធាន Joseph Aoun។

តាមសេចក្តីថ្លែងការណ៍នោះ លោកប្រធាន Joseph Aoun បានកោះហៅលោក Salam មកប្រគល់តួនាទីឲ្យលោក។ ទោះជាយ៉ាងណាក៏ដោយលោក Salam បច្ចុប្បន្នកំពុងនៅក្រៅប្រទេស ហើយគ្រោងនឹងត្រលប់មកវិញនៅថ្ងៃអង្គារ។

នៅក្រោមបទដ្ឋាននយោបាយដែលកំពុងពេញនិយមរបស់ប្រទេសលីបង់ តំណែងជានាយករដ្ឋមន្ត្រីត្រូវបានកាន់កាប់ជាប្រពៃណីដោយមូស្លីមនិកាយស៊ុននី ខណៈដែលប្រធានាធិបតីតែងតែជាគ្រិស្តសាសនា Maronite ហើយប្រធានសភាគឺជាមូស្លីមនិកាយស៊ីអ៊ីត។

លោក Salam កើតក្នុងគ្រួសារនយោបាយដ៏លេចធ្លោមួយក្នុងឆ្នាំ១៩៥៣ ជាមូស្លីមស៊ុននី។ ពូរបស់លោក Salam គឺលោក Saeb Salam បានបម្រើការជានាយករដ្ឋមន្ត្រីជាច្រើនដងមុនពេលសង្រ្គាមស៊ីវិលឆ្នាំ១៩៧៥-១៩៩០ របស់ប្រទេសលីបង់ ហើយបងប្អូនជីដូនមួយរបស់គាត់គឺលោក Tammam Salam បានកាន់តំណែងដូចគ្នាពីឆ្នាំ២០១៤ ដល់ឆ្នាំ២០១៦។

លោក Salam បានទទួលសញ្ញាប័ត្រអនុបណ្ឌិតផ្នែកច្បាប់ពីសាកលវិទ្យាល័យ Harvard និងបណ្ឌិតចំនួនពីរ ផ្នែកប្រវត្តិសាស្ត្រ និងវិទ្យាសាស្ត្រនយោបាយ ពីសាកលវិទ្យាល័យ Sorbonne។ លោកក៏បានបម្រើការជាឯកអគ្គរដ្ឋទូតរបស់ប្រទេសលីបង់ និងជាតំណាងអចិន្ត្រៃយ៍ប្រចាំអង្គការសហប្រជាជាតិពីឆ្នាំ២០០៧ ដល់ឆ្នាំ២០១៧។

ការតែងតាំងលោក Salam ធ្វើឡើងនៅពេលដែលប្រទេសលីបង់ កើតចេញពីជម្លោះរយៈពេល ១៤ខែ រវាងអ៊ីស្រាអែល និងក្រុមហេសបូឡា។ ក្រៅពីការកសាងឡើងវិញក្រោយជម្លោះ ប្រទេសនេះក៏ប្រឈមមុខនឹងបញ្ហាប្រឈមយ៉ាងខ្លាំង រួមទាំងវិបត្តិសេដ្ឋកិច្ចយ៉ាងជ្រៅ។