សម្តេចតេជោ៖ គិតមកដល់ពេលនេះថ្នាក់ដឹកនាំរដ្ឋនៅក្នុងអាស៊ាន អ្នកដែលមានអាយុច្រើនជាងសម្តេច មានតែ ៣នាក់ប៉ុណ្ណោះ

ភ្នំពេញ៖ នៅក្នុងសម័យប្រជុំជាវិសាមញ្ញរបស់ព្រឹទ្ធសភាកម្ពុជា ដើម្បីអនុម័តលើសេចក្តីស្នើវិសោធនកម្មបទបញ្ជាផ្ទៃក្នុងព្រឹទ្ធសភា នាថ្ងៃទី១៤ ខែមករា ឆ្នាំ២០២៥នេះ សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា បញ្ជាក់ថា គិតមកដល់ពេលនេះចំពោះថ្នាក់ដឹកនាំរដ្ឋនៅក្នុងអាស៊ាន អ្នកដែលមានអាយុច្រើនជាងសម្តេច មានតែ ៣នាក់ប៉ុណ្ណោះ រួមមាន៖ នាយករដ្ឋមន្ត្រីម៉ាឡេស៊ី, ព្រះចៅស៊ុលតង់ព្រុយណេ និងប្រធានាធិបតីឡាវ។

សម្តេចតេជោថ្លែងថា “ឥលូវនៅក្នុងអាស៊ានអ្នកដែលមានអាយុចាស់ជាងខ្ញុំ គឺមាន ៣នាក់ មាន នាយករដ្ឋមន្ត្រីម៉ាឡេស៊ី, ព្រះចៅស៊ុលតង់ព្រុយណេ និងប្រធានាធិបតីឡាវ ដែលមានអាយុច្រើនជាងខ្ញុំ ប៉ុន្តែកាលពីមុនខ្ញុំមានអាយុតិចជាងគេ ហើយមេដឹកនាំទើបតែជំនាន់ឥលូវនេះទេជំនាន់ ស៊ីជីនភីង និង លី ខឺឈាង ដែលមានអាយុតិចជាងខ្ញុំ ហើយទៅជាខ្ញុំអាយុច្រើនជាង”។

សូមបញ្ជាក់ដែរថា គិតមកដល់ពេលនេះសម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា មានអាយុ ៧២ឆ្នាំហើយ ដោយថ្នាក់ដឹកនាំរដ្ឋដែលមានអាយុច្រើនជាងសម្តេចទាំង ៣រូប រួមមាន៖ លោក Thongloun Sisoulith ប្រធានាធិបតីឡាវ អាយុ ៧៩ឆ្នាំ, ព្រះចៅស៊ុលតង់ព្រុយណេ Hassanal Bolkiah Muiz’zaddin Wad’daulah ព្រះជន្មាយុ ៧៨ព្រះវស្សា និង លោក Anwar Ibrahim នាយករដ្ឋមន្ត្រីម៉ាឡេស៉ី អាយុ ៧៧ឆ្នាំ៕