លោក ថាក់ស៊ីន៖ ប្រទេសថៃគួរតែជំរុញឱ្យមានការអនុញ្ញាតឱ្យលេងល្បែងអនឡាញស្របច្បាប់
បាងកក៖ អ្នកនយោបាយជើងចាស់លោក ថាក់ស៊ីន ស៊ីណាវ៉ាត្រា ជឿជាក់ថា ប្រទេសថៃគួរតែជំរុញឱ្យមានការអនុញ្ញាតឱ្យការលេងល្បែងអនឡាញក្លាយជាស្របច្បាប់។
លោកជំរុញបែបនេះ ដោយលើកទឡ្ហីករណ៍ថា វាអាចធ្វើឱ្យរាជរដ្ឋាភិបាលទទួលបានប្រាក់ចំណូលប្រចាំឆ្នាំរហូតដល់១០០ ពាន់ លាន បាត ឬស្មើនឹងប្រមាណ២,៨៩ពាន់លានដុល្លារ។
ទោះបីជាលោក ថាក់ស៊ីន គ្មានតួនាទីផ្លូវការក្នុងរាជរដ្ឋាភិបាលក៏ដោយ ក៏អតីតនាយករដ្ឋមន្ត្រីវ័យ៧៥ឆ្នាំរូបនេះ នៅតែជាឥស្សរជនដ៏មានឥទ្ធិពលបំផុតម្នាក់នៅក្នុងឆាកនយោបាយថៃ ហើយត្រូវបានគេមើលឃើញយ៉ាងច្បាស់ថា លោកគឺជាជន្ទល់អំណាចនៅពីក្រោយនាយករដ្ឋមន្ត្រីថៃវ័យ៣៨ឆ្នាំ លោកស្រី ផែផងថាន ស៊ីណាវ៉ាត្រា ដែលជាកូនស្រីពៅរបស់លោក។
ថ្លែងនៅក្នុងព្រឹត្តិការណ៍មួយក្នុងរាជធានីបាងកក កាលពីល្ងាចថ្ងៃចន្ទទី១៣មករា ត្រឹមតែប៉ុន្មានម៉ោង បន្ទាប់ពីគណៈរដ្ឋមន្ត្រីថៃអនុម័តលើសេចក្តីព្រាងច្បាប់ ដើម្បីធ្វើឱ្យកាស៊ីណូស្របច្បាប់ លោកថាក់ស៊ីន បានអះអាងថា រាជរដ្ឋាភិបាលថៃកំពុងបង្កើតវិធីដើម្បីគ្រប់គ្រងការចូលប្រើប្រាស់ និងចំណូលពន្ធពីល្បែងអនឡាញ។
លោក ថាក់ស៊ីន បានបន្ថែមថា៖«ល្បែងអនឡាញមានអ្នកលេងជាជនជាតិថៃពី២ទៅ៤លាននាក់ ជាមួយនឹងការសន្សំប្រាក់ចំនួន៣០០ពាន់លានបាត និងចំណេញ និងខាតបង់ប្រហែល៥០០ពាន់លានក្នុងមួយឆ្នាំ។ ប្រសិន បើ យើង អាច យក ពន្ធ បាន ២០ភាគរយ យើង នឹង ទទួល បាន ជាង១០០ពាន់ លាន ក្នុង មួយ ឆ្នាំ»។
ការលេងល្បែងស៊ីសងភាគច្រើនខុសច្បាប់នៅក្នុងប្រទេសថៃ ប៉ុន្តែវាពេញនិយមខ្លាំង។ ហេតុដូចនេះ រាជរដ្ឋាភិបាលបានជំរុញឱ្យមានភាពស្របច្បាប់ ដើម្បីបង្កើតឱកាសការងារ និងជំរុញវិស័យទេសចរណ៍ ហើយប្រាក់ជាច្រើនដែលបានបាត់បង់ ដែលអាចប្រែទៅជាចំណូលរដ្ឋវិញ។ ជាមួយគ្នានេះ លោក ថាក់ស៊ីន បានលើកឡើងថា រាជរដ្ឋាភិបាលកំពុងធ្វើការលើប្រព័ន្ធកំណត់អត្តសញ្ញាណ ដើម្បីគ្រប់គ្រងការចូលលេងល្បែងអនឡាញ ដើម្បីចៀសវាងការលេងល្បែងមិនទាន់គ្រប់អាយុ និងអនុញ្ញាតឱ្យមានការត្រួតពិនិត្យអ្នកញៀនល្បែង។
លើសពីនេះ លោក ថាក់ស៊ីន ក៏បានជំរុញឱ្យស្ថាប័នហិរញ្ញវត្ថុរបស់ប្រទេសថៃ បើកទូលាយជាងមុន ចំពោះរូបិយបណ្ណគ្រីបតូ ដោយលើកឡើងពីជំហរគាំទ្រគ្រីបតូរបស់ប្រធានាធិបតីជាប់ឆ្នោតអាម៉េរិក លោក ដូណាល់ ត្រាំ រួមទាំងការតែងតាំងលោក ប៉ូល អាតឃីន ( (https://www.reuters.com/world/us/trump-picks-former-sec-commissioner-paul-atkins-run-agency-2024-12-04/)Paul Atkins (https://www.reuters.com/world/us/trump-picks-former-sec-commissioner-paul-atkins-run-agency-2024-12-04/)) (https://www.reuters.com/world/us/trump-picks-former-sec-commissioner-paul-atkins-run-agency-2024-12-04/) ជាប្រធានគណៈកម្មការមូលបត្រអាម៉េរិកផងដែរ៕
