ឯកឧត្តមបណ្ឌិត គឹម សន្តិភាព ដឹកនាំកិច្ចប្រជុំរៀបចំផែនការការងារសម្រាប់ដំណើរបេសកកម្មទៅប្រទេសឡាវ ដើម្បីពិភាក្សាលើខ្លឹមសារសេចក្តីព្រាង MOU រវាង យុវជនគណបក្សប្រជាជនកម្ពុជាថ្នាក់កណ្តាល និងសហភាពយុវជនប្រជាជនបដិវត្តន៍ឡាវ

ភ្នំពេញ៖ នៅព្រឹកថ្ងៃព្រហស្បតិ៍ ទី១៦ ខែមករា ឆ្នាំ២០២៥ នាវិមាន៧មករា ឯកឧត្តមបណ្ឌិត គឹម សន្តិភាព សមាជិកគណៈកម្មាធិការកណ្តាល អនុប្រធានគណៈប្រចាំការនៃគណៈអចិន្ត្រៃយ៍យុវជនគណបក្សថ្នាក់កណ្តាល និងជាប្រធានក្រុមការងារចំពោះកិច្ចរៀបចំកិច្ចព្រមព្រៀងស្តីពីកិច្ចសហប្រតិបត្តិការរវាងយុវជនគណបក្សប្រជាជនកម្ពុជា និងសហភាពយុវជនប្រជាជនបដិវត្តន៍ឡាវ បានអញ្ជើញដឹកនាំកិច្ចប្រជុំក្រ្មមការងារចំពោះកិច្ច ដើម្បីពិនិត្យរៀបចំផែនការការងារសម្រាប់ដំណើរបេសកកម្មទៅសាធារណរដ្ឋប្រជាធិបតេយ្យប្រជាមានិតឡាវ ដើម្បីពិភាក្សាលើខ្លឹមសារសេចក្តីព្រាងកិច្ចព្រមព្រៀងស្តីពីកិច្ចសហប្រតិបត្តិការរវាងយុវជនគណបក្សប្រជាជនកម្ពុជា និងសហភាពយុវជនប្រជាជនបដិវត្តន៍ឡាវ។

សូមបញ្ជាក់ថា ឯកឧត្តមបណ្ឌិត តំណាងយុវជនគណបក្សថ្នាក់កណ្តាល នឹងដឹកនាំគណៈប្រតិភូក្រុមការងារចំពោះកិច្ច បំពេញបេសកកម្មនៅសាធារណរដ្ឋប្រជាធិបតេយ្យប្រជាមានិតឡាវនាពេលខាងមុខ ដើម្បីជួបពិភាក្សាផ្ទាល់ជាមួយសហភាពយុវជនប្រជាជនបដិវត្តន៍ឡាវ ក្នុងការពិនិត្យ និងពិភាក្សាលើសេចក្តីព្រាងស្តីពីកិច្ចសហប្រតិបត្តិការរវាងយុវជនគណបក្សប្រជាជនកម្ពុជា និងសហភាពយុវជនប្រជាជនបដិវត្តន៍ឡាវ ៕