រដ្ឋមន្ត្រី ហង់ជួន ណារ៉ុន បញ្ជាក់ពីការគាំទ្ររាល់គំនិតផ្តួចផ្តើម នៃកិច្ចសហប្រតិបត្តិការ ដែលមានគោលដៅលើកកម្ពស់វិស័យអប់រំ និងអភិវិឌ្ឍធនធានមនុស្សកម្ពុជា
ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី១៧ ខែមករា ឆ្នាំ២០២៥ បានទទួលជួបសម្តែងការគួរសម និងពិភាក្សាការងារជាមួយគណៈប្រតិភូនៃសាកលវិទ្យាល័យជូឡាឡុងកន (Chulalongkorn University) ដឹកនាំដោយ Prof. Wilert Puriwat, D.Phil. (Oxon) សាកលវិទ្យាធិការ និងមានការចូលរួមពីសំណាក់ឯកឧត្តម លោកជំទាវ ថ្នាក់ដឹកនាំ និងមន្ត្រីមកពីនាយកដ្ឋានពាក់ព័ន្ធ។
មានប្រសាសន៍នាឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានសម្តែងការស្វាគមន៍យ៉ាងកក់ក្តៅចំពោះវត្តមានរបស់គណៈប្រតិភូនៃសាកលវិទ្យាល័យជូឡាឡុងកនមកកាន់ក្រសួងអប់រំ យុវជន និងកីឡានៅកម្ពុជា និងបានចូលរួមអបអរសាទរសាស្រ្តាចារ្យបណ្ឌិត Wilert Puriwat ដែលត្រូវបានតែងតាំងជាសាកលវិទ្យាធិការនៃសាកលវិទ្យាល័យជូឡាឡុងកន និងជាប្រធានក្រុមប្រឹក្សាសាកលវិទ្យាធិការនៃប្រទេសថៃកាលពីពេលថ្មីៗកន្លងទៅនេះ ព្រមទាំងបានគូសបញ្ជាក់ថា ដំណើរទស្សនកិច្ចថ្ងៃនេះ ពិតជាឆ្លុះបញ្ចាំងពីការប្តេជ្ញាចិត្តរួមគ្នាក្នុងការពង្រឹងកិច្ចសហប្រតិបត្តិការលើផ្នែកអប់រំ និងការជំរុញនវានុវត្តន៍ក្នុងវិស័យសិក្សា។
លើកឡើងក្នុងឱកាសនេះដែរ លោកសាស្រ្តាចារ្យបណ្ឌិតប្រធានប្រតិភូ បានថ្លែងអំណរគុណដល់ក្រសួងអប់រំ យុវជន និងកីឡាចំពោះការផ្តល់នូវកិច្ចសហប្រតិបត្តិការលើវិស័យអប់រំប្រកបដោយការយកចិតទុកដាក់ខ្ពស់ និងបានបង្ហាញចំណាប់អារម្មណ៍ក្នុងការបន្តពង្រឹងនិងពង្រីកកិច្ចសហប្រតិបត្តិការនេះឱ្យកាន់តែទូលំទូលាយ ដែលមិនត្រឹមតែជាការផ្សារភ្ជាប់ទំនាក់ទំនងជាមួយសាកលវិទ្យាល័យជូឡាឡុងកនប៉ុណ្ណោះទេ តែជាការរឹតបន្តឹងទំនាក់ទំនងវិស័យអប់រំរវាងប្រទេសទាំងពីរ ដោយគូសបញ្ជាក់ថា ការអប់រំ គឺជាកូនសោគន្លឹះក្នុងការលើកកម្ពស់គុណភាពជីវិត។ ទន្ទឹមនឹងនេះ លោកសាស្ត្រាចារ្យបណ្ឌិត បានលើកឡើងអំពីសក្តានុពលនៃការសហការអនុវត្តគម្រោងចំនួន៣ជាមួយក្រសួងអប់រំ យុវជន និងកីឡាគឺ៖ (១)បញ្ញាសប្បនិមិត្តក្នុងវិស័យអប់រំ (AI Technology in Education) (២) ការផ្តល់អាហារូបករណ៍ដល់និស្សិតកម្ពុជាទៅបន្តការសិក្សានៅសាកលវិទ្យាល័យជូឡាឡុងកន និង(៣) ការសហការលើផ្នែកការងារស្រាវជ្រាវ។
ជាការឆ្លើយតប តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណយ៉ាងជ្រាលជ្រៅដល់សាកលវិទ្យាល័យជូឡាឡុងកនដែលបានផ្តល់អាហារូបករណ៍ និងកម្មវិធីសិក្សាផ្លាស់ប្តូរបទពិសោធដល់និស្សិតកម្ពុជា ព្រមទាំងការបន្តទំនាក់ទំនងប្រកបដោយការយកចិត្តទុកដាក់ជាមួយអតីតនិស្សិត ក៏ដូចជាក្រសួងអប់រំ យុវជន និងកីឡាកម្ពុជានាពេលកន្លងមក ដោយបានគូសបញ្ជាក់នូវការគាំទ្រចំពោះរាល់គំនិតផ្តួចផ្តើមនៃកិច្ចសហប្រតិបត្តិការបន្ថែមទៀតដែលមានគោលដៅលើកកម្ពស់វិស័យអប់រំ និងអភិវិឌ្ឍធនធានមនុស្សកម្ពុជា៕
