សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផ្ដល់អំណោយជូនដល់ប្រជាពលរដ្ឋរងគ្រោះដោយខ្យល់កន្ទ្រាក់ ជាង១ពាន់គ្រួសារ នៅស្រុកព្រៃនប់
ភ្នំពេញ៖ នៅរសៀលថ្ងៃអាទិត្យទី១៩ ខែមករា ឆ្នាំ២០២៥ ឯកឧត្តម ម៉ាង ស៊ីណេត ប្រធានគណ:កម្មាធិការសាខាកាកបាទក្រហមកម្ពុជា ខេត្តព្រះសីហនុ លោក អុី ធារិន ប្រធានគណៈកម្មាធិកា អនុសាខាស្រុកព្រៃនប់ សមាជិកសមាជិការគណៈកម្មាធិកាសាខា មន្ត្រីសាខា អនុសាខានិង អ្នកស្ម័គ្រចិត្ត រួមទាំងសប្បុរស បាននាំយកអំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាក បាទក្រហមកម្ពុជា ចែកជូនប្រជាពលរដ្ឋរងគ្រោះដោយខ្យល់កន្ទ្រាក់ចំនួន ១.៣៥៤គ្រួសារ មកពីឃុំចំនួន៦ ក្នុងស្រុកព្រៃនប់ ខេត្តព្រះសីហនុ។
លោក អ៉ី ធារិន ប្រធានអនុសាខាគណ:កម្មការធិការសាខាកាកបាទក្រហមស្រុកព្រៃនប់ បានធ្វើរបាយណ៍ស្តីពីខ្យល់កន្ទ្រាក់រយ:ពេលពីរថ្ងៃ គឺចាប់ពីថ្ងៃទី១១ និងថ្ងៃ១២ ខែមករា ឆ្នាំ២០២៥នេះ ធ្វើឪ្យប៉ះពាល់ដល់ផ្ទះប្រជាពលរដ្ឋក្នុងឃុំចំនួន៦ មានចំនួន ១,៣៥៤ខ្នងផ្ទះ ក្នុងនោះរលំចំនួន ០៣ខ្នង និងរបើកដំបូលចំនួន ១.៣៥១ខ្នង បណ្តាលធ្វើឪ្យខូចខាតសង្កសីចំនួន ៧.២៦៤សន្លឹក ក្រៅពីការខូចខាតដំបូលផ្ទះប្រជាពលរដ្ឋ និងរលំផ្ទះដោយសារគ្រោះធម្មជាតិខាងលើ ក៏បណ្តាលឪ្យខូចខាតដំបូលប៉ុស្តិ៍រដ្ឋបាលឃុំទឹកល្អក់ និងដំបួលសាលារៀនចំនួន ៥ទីតាំងផងដែរ។
ឯកឧត្តម ម៉ាង ស៊ីណេត ប្រធានគណ:កម្មាធិការសាខាកាកបាទក្រហមកម្ពុជាខេត្តព្រះសីហនុ បានធ្វើការសំណេះ សំណាលអគុណសប្បុរសជនដែលបានចូលរួមនាពេលនេះ សូមចូលរួមសោកស្តាយគ្រោះធម្មជាតិខ្យល់កន្ត្រាក់ បាត់បង់ខូចខាតទ្រព្យសម្បត្តិ អំណោយទាំងនេះមិនអាចជួយបានមួយគ្រា មិនអាចជួយបានរហូតទេជាគោលការណ៍របស់សម្តេចកិត្តិព្រឹទ្ធបណ្ឌិតប្រធានកាកបាទក្រហមកម្ពុជា សម្តេចតែងតែយកចិត្តទុកដាក់ណែនាំជួយពុកម៉ែជួបការលំបាកណាមួយ នេះជាទឹកចិត្ត ស្មារតីនៃមាតាមនុស្សធម៌។
ឯកឧត្តម ប្រធានសាខាកាកបាទក្រហមខេត្ត សូមអរគុណអនុសាខាស្រុក ក៏ដូចសាខាខេត្ត យុវជនស្ម័គ្រចិត្ត អ្នកស្ម័គ្រចិត្តសាខាបានសហការគ្នារៀបចំជាអំណោយបានទាន់ពេលវេលាជាការងារមនុស្សធម៌មួយដែលយើងបានធ្វើការលះបង់គ្រប់បែបយ៉ាងសម្រាប់ជួយគ្នាក្នុងគ្រាក្រ ជួយគ្នាក្នុងគ្រាលំបាក ស្របតាមគោលការណ៍គ្រឹះរបស់កាកបាទក្រហមកម្ពុជាទីណាមានការលំបាក ទីនោះមានកាកបាទក្រហមកម្ពុជា ដោយមិនគិតពីការលំបាក ជិតឬឆ្ងាយ មានព្យុះភ្លៀង កាកបាទក្រហមកម្ពុជា ទៅដល់ទីនោះដោយមិនរុញរាឡើយ ជាគោលដៅរួមចំណែកជួយសម្រាលទុក្ខលំបាករបស់បងប្អូនប្រជាពលរដ្ឋ លើកទឹកចិត្តនូវក្តីសង្ឃឹម និងភាពកក់ក្តៅដល់ជនរងគ្រោះ គ្រួសាររងគ្រោះ ជាពិសេសជនចាស់ជរា ជនគ្មានទីពឹង ស្ត្រីមេម៉ាយ កុមារកំព្រា និងគ្រួសារដែលមានជំងឺប្រចាំកាយជាដើម ហើយឯកឧត្តម ប្រធានសូមថ្លែងអំណរគុណដល់សប្បុរសជនតែងតែចូលរួមឧបត្ថម្ភដល់សាខាផងដែរ។
ក្នុងនោះលោក គាំ សុខុម នាយកសាខា បានផ្សព្វផ្សាយយុទ្ធសាស្រ្តដើម្បីធ្វើអោយមានសុខភាពល្អនិងអាយុវែងគឺ សូមបងប្អូនហាត់ប្រាណជារាងរាល់ថ្ងៃ ហូបបន្លែធម្មជាតិអោយបានច្រើន សូមបងប្អូនកាត់បន្ថយ អាហារមានសារធាតុខ្លាញ់ ផ្អែម ប្រៃ ជាពិសេសគ្រឿងស្រវឹងវាអាចធ្វើអោយបងប្អូនជួបប្រទៈនូវជំងឺផ្សេងៗ ហើយមន្រ្តីសាខាក៏បានផ្សព្វផ្សាយវិជ្ជាសង្គ្រោះបឋមដល់បងប្អូនប្រជាពលរដ្ឋបានចូលរួមក្នុងថ្ងៃនេះផងដែរ។
ក្នុងនោះមួយគ្រួសារទទួលបាន អង្ករ ២៥គីឡូ មី១កេស ត្រីខ១០កំប៉ុង ទឹកត្រី១យួរ កន្ទេល១ ឃីត១កញ្ចប់ (មុង១ ភួយ១ ក្រមា១ សារុង១) និងថវិកាចំនួន ៥ម៉ឺនរៀល ដោយឡែកប្រជាពលរដ្ឋរលំផ្ទះចំនួន ៣ខ្នង ទទួលបានតង់១ សម្ភារ:ផ្ទះបាយ១ឈុត និងថវិកា ១លានរៀល៕
