ឧបនាយករដ្ឋមន្ត្រី ហង់ជួន ណារ៉ុន ដឹកនាំកិច្ចប្រជុំពិនិត្យតាមដានវឌ្ឍនភាពការងារ របស់លេខាធិការដ្ឋានទទួលបន្ទុកសម្របសម្រួលការងារ ក្នុងវិស័យអប់រំ យុវជន និងកីឡា
ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២១ ខែមករា ឆ្នាំ២០២៥ បានដឹកនាំកិច្ចប្រជុំស្តីពី ការពិនិត្យតាមដានវឌ្ឍនភាពការងាររបស់លេខាធិការដ្ឋានទទួលបន្ទុកសម្របសម្រួលការងារក្នុងវិស័យអប់រំ យុវជន និងកីឡា ដោយមានការចូលរួមពី ឯកឧត្តម លោកជំទាវ ថ្នាក់ដឹកនាំ សមាជិកលេខាធិការដ្ឋានទទួលបន្ទុកសម្របសម្រួលការងារក្នុងវិស័យអប់រំ យុវជន និងកីឡា និងមន្ត្រីពាក់ព័ន្ធក្រោមឱវាទ។
កិច្ចប្រជុំនេះរៀបចំឡើងក្នុងគោលបំណង ដើម្បីជជែកពិភាក្សាលើវឌ្ឍនភាពការងារគន្លងអប់រំ និងទទួលបានធាតុចូល ក្នុងការពង្រឹងយន្តការការងាររវាងអង្គភាពអនុវត្ត អ្នកសម្របសម្រួល និងលេខាធិការដ្ឋាន ក៏ដូចជាវេទិកាក្នុងការពិភាក្សាលើវឌ្ឍនភាពការងារអាទិភាពដែលនូវសេសសល់ទាំង០៤ ដោយអ្នកសម្របសម្រួល និងមានការបំពេញបន្ថែមដោយតំណាងអង្គភាពអនុវត្ត រួមមាន៖ (១) វឌ្ឍនភាពប្រព័ន្ធព័ត៌មានគ្រប់គ្រងអប់រំ (២) វឌ្ឍនភាពកំណែទម្រង់វិមជ្ឈការ និងវិសហមជ្ឈការ (៣) វឌ្ឍនភាពការសម្របសម្រួលគម្រោង (៤) វឌ្ឍនភាពនៃវិធានការឆ្លើយតបនឹងតេស្តអន្តរជាតិ ជាពិសេស ការដាក់បញ្ចូលការងារ “សាលារៀនឌីជីថលកម្ពុជា” ដែលជាអាទិភាពថ្មីបន្ថែមទៀត។
បន្ទាប់ពីបានស្តាប់នូវរបាយការណ៍ និងបទបង្ហាញពីវឌ្ឍនភាពនៃការងារវិស័យអប់រំរបស់អ្នកសម្របសម្រួល ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់ក្រុមការងារពាក់ព័ន្ធនាពេលកន្លងមក ព្រមទាំងបានស្នើឱ្យក្រុមការងារទទួលបន្ទុកផ្ទាល់ បន្ថែមការយកចិត្តទុកដាក់ និងធ្វើបច្ចុប្បន្នភាពជាប្រចាំ ចំណាយថវិកាឱ្យចំគោលដៅ និងត្រូវមានប្រព័ន្ធរបាយការណ៍វឌ្ឍនភាពការងារឱ្យបានទៀងទាត់ ដោយរៀបចំតួលេខ និងទិន្នន័យឱ្យបានល្អិតល្អន់បន្ទាប់ពីធ្វើការវិភាគ ជាពិសេសត្រូវបន្តធ្វើការបែងចែកភារកិច្ចឱ្យបានច្បាស់លាស់ ពង្រឹងការសហការជាប្រព័ន្ធ និងធ្វើបច្ចុប្បន្នភាពការបែងចែកការងារអាទិភាព កែសម្រួលសមាសភាពអ្នកទទួលខុសត្រូវនិងអ្នកសម្របសម្រួល ដើម្បីធានាបានប្រសិទ្ធភាពបន្ថែមលើការងារសម្របសម្រួលពិនិត្យតាមដានវឌ្ឍនភាព បញ្ហាប្រឈម យន្តការឆ្លើយតប ផ្សព្វផ្សាយព័ត៌មាន និងធានាបាននូវនិរន្តភាពរបស់វិស័យអប់រំ យុវជន និងកីឡា។
គួរបញ្ជាក់ដែរថា លេខាធិការដ្ឋានទទួលបន្ទុកសម្របសម្រួលការងារក្នុងវិស័យអប់រំ ត្រូវបានបង្តើតឡើងក្នុងគោលបំណងផ្តល់ការទទួលភារកិច្ច និងការទទួលខុសត្រូវ ជំរុញតាមដាន និងពង្រឹងការងារអង្គភាពក្នុងវិស័យអប់រំ របស់ក្រសួងអប់រំ យុវជន និងកីឡា ក៏ដូចជាដើម្បីធ្វើការបណ្តុះបណ្ដាលដល់មន្ត្រីជាន់ខ្ពស់នូវការងារគ្រប់គ្រងការងារអប់រំ ដើម្បីអាចដឹងរឿងគ្រប់ជ្រុងជ្រោយ និងអាចដោះស្រាយបញ្ហាមានប្រសិទ្ធភាពខ្ពស់ និងទាន់ពេលវេលា៕
