ស្នងការដ្ឋាននគរបាលខេត្តសៀមរាប រៀបចំពិធីបិទសិក្ខាសាលាស្តីពី សុខភាពនគរបាល និងការសិក្សាអំពីការបង្កើតគិលានដ្ឋាន
ភ្នំពេញ៖ នៅថ្ងៃទី២២ ខែមករា ឆ្នាំ២០២៥ នៅសាលប្រជុំស្នងការដ្ឋាននគរបាលខេត្តសៀមរាប បានរៀបចំពិធីបិទសិក្ខាសាលាស្តីពី សុខភាពនគរបាល និងការសិក្សាអំពី ការបង្កើតគិលានដ្ឋាន នៅស្នងការដ្ឋាននគរបាលខេត្តសៀមរាប ក្រោមអធិបតីភាព លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តសៀមរាប និងលោកឧត្តមសេនីយ៍ទោ វេជ្ជបណ្ឌិត ធីវ ឈុនស៊ីម អនុប្រធាននាយកដ្ឋានសុខាភិបាល និងជាប្រធានកិច្ចការគិលានដ្ឋាន។
ក្នុងនោះផងដែល ក៏មានការអញ្ជើញចូលរួមពី ប្រតិភូអមដំណើរ លោកស្នងការរង លោកនាយ-នាយរងការិយាល័យ សមាជិក សមាជិកា និងសិក្ខាកាមទាំងអស់សរុបចំនួន ៨០នាក់ ស្រី២៥នាក់ ។
ក្នុងឱកាសនោះដែល លោកឧត្តមសេនីយ៍ទោ ស្នងការ បានមានប្រសាសន៍ក្រើនរំលឹក ដល់មន្ត្រីនគរបាលទាំងអស់ ត្រូវយកចិត្តទុកដាក់ចំពោះបញ្ហាសុខភាព ព្រោះវាជាបញ្ហាផ្ទាល់ខ្លួនរបស់មន្ត្រីម្នាក់ៗ ប្រសិនបើយើងជាកងកម្លាំងនគរបាល ជាអ្នកបំរើជាតិបំរើប្រជាពលរដ្ឋ តែមន្ត្រីមានជំងឺប្រចាំកាយ សុខភាពទ្រុឌទ្រោមនោះ ពិតជាមិនអាចបំរើការងារជូនប្រជាពលរដ្ឋដោយពេញលេញនោះទេ ដូច្នេះសូមកងកម្លាំងយើងទាំងអស់ត្រូវគិតគូឲ្យបានជាប់ជាប្រចាំចំពោះបញ្ហាសុខភាព។
ជាមួយគ្នានោះដែល លោកឧត្តមសេនីយ៍ទោ វេជ្ជបណ្ឌិត បានមានប្រសាសន៍ អំពីវិធីសាស្រ្តក្នុងការការពារ ការថែទាំសុខភាព ការប្តូរទំលាប់មិនល្អមួយចំនួន ការបរិភោគអាហារឲ្យបានត្រឹមត្រូវ និងការយកចិត្តទុកដាក់អំពីបញ្ហាសុខភាពរបស់ខ្លួន ឧស្សាហាត់ប្រាណ លេងកីឡា និងជាពិសេស ឲ្យសិក្ខាកាមទាំងអស់ដែលបានសិក្សា នូវខ្លឹមសារមេរៀន ត្រូវខិតខំអនុវត្តឲ្យបានល្អប្រសើរសំរាប់ខ្លួនឯង ក្រុមគ្រួសារ និងចែករំលែកបន្តដល់មិត្តរួមការងារនៅក្នុងអង្គភាព ក៏ដូចជាអ្នកនៅជុំវិញខ្លួនយើង ឲ្យយល់ដឹងបន្តអំពីសុខភាព ៕
