កាកបាទក្រហមកម្ពុជា ផ្ដល់អំណោយមនុស្សធម៌ជូនដល់ក្មួយប្រុសពិការម្នាក់ ដែលតស៊ូលក់ម្ជូររកប្រាក់ចិញ្ចឹមគ្រួសារ
ភ្នំពេញ៖ ក្រោយឃើញពីជីវិតតស៊ូរបស់ក្មួយប្រុសពិការម្នាក់លក់ម្ជូររកប្រាក់ចិញ្ចឹមគ្រួសារ នៅថ្ងៃទី ២៥ ខែមករា ឆ្នាំ២០២៥ លោក បូរ ភ័កត្រា និងក្រុមការងារអ្នកស្ម័គ្រចិត្តកាកបាទក្រហមកម្ពុជា បានចុះដល់ផ្ទះក្មួយប្រុស និងបាននាំយកអំណោយមនុស្សធម៌កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ជូនគ្រួសារក្មួយដើម្បីសម្រួលជីវភាពក្នុងការរស់នៅ។
ក្មួយប្រុសឈ្មោះ ចាន់ វិច្ឆិកា អាយុ១៦ឆ្នាំមានពិការភាពទាំងដៃ និងជើងពីកំណើត រស់នៅភូមិបាណន់ ឃុំកន្ទឺ ២ ស្រុកបាណន់ ខេត្តបាត់ដំបង មានឪពុកជាអ្នកបើកឡូរី ហើយម្ដាយជាស្ត្រីមេផ្ទះ ត្បិតតែមានរូបរាងកាយពិការមែន តែវិច្ឆិកាពូកែតស៊ូ និងកតញ្ញូចំពោះគ្រួសារណាស់។
ក្នុងឱកាសចុះជួបគ្រួសារក្មួយវិច្ឆិកា លោក បូរ ភ័កត្រា បានលើកឡើងពីការសិក្សារបស់ក្មួយៗ ក្រោយដឹងថា ដោយសារជីវភាព ក្មួយប្រុសបានសុំម៉ែឈប់រៀនត្រឹមថ្នាក់ទី៧ ដើម្បីមានឱកាសជួយរកប្រាក់ចិញ្ចឹមគ្រួសារ តែទោះជាយ៉ាងណាពេលនេះវិច្ឆិកា ចង់រៀនជំនាញវិជ្ជាជីវៈវិញ ដូច្នេះហើយយើងមានតែលើកទឹកចិត្តក្មួយ និងជូនពរឱ្យការខិតខំនេះទទួលបានជោគជ័យ មានចំណេះជំនាញមួយច្បាស់លាស់ គ្រាន់ចិញ្ចឹមជីវិតនាពេលអនាគត។
អំណោយមនុស្សធម៌ជូនគ្រួសារក្មួយរួមមាន៖ អង្ករចំនួន៥០គីឡូក្រាម, មី ២កេស ទឹកស៊ីអ៊ីវ ២យួរ, ត្រីខ ២០កំប៉ុង ឃីត (មុង ភួយ សារុង ក្រមា) ២កញ្ចប់ និងថវិកា ២០ម៉ឺនរៀល៕
