ប្រតិភូអង្គការបេះដូងមាស ស្នើសុំអនុសាសន៍ពីរដ្ឋមន្ត្រី ហង់ជួន ណារ៉ុន ពាក់ព័ន្ធការដាក់សំណើស្របតាមផ្លូវច្បាប់កម្ពុជា ក្នុងការបង្កើតក្រុមប្រឹក្សាភិបាល ដើម្បីដឹកនាំគ្រប់គ្រងវិទ្យាសា្ថន NIPES

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២៧ ខែមករា ឆ្នាំ២០២៥ បានទទួលជួបសម្ដែងការគួរសម និងពិភាក្សាការងារជាមួយគណៈប្រតិភូអង្គការបេះដូងមាស (Hearts of Gold) ដឹកនាំដោយ លោក NISHIYAMA Naoki អគ្គលេខាធិការ/នាយក (Secretary General /Director) និងមានការចូលរួមពីសំណាក់ ឯកឧត្តម លោកជំទាវ មន្ត្រីពាក់ព័ន្ធក្រោមឱវាទក្រសួង។

ក្នុងឱកាសនៃជំនួបនេះ លោកអគ្គលេខាធិការ/នាយកអង្គការ បានថ្លែងអំណរគុណដល់ក្រសួងអប់រំ យុវជន និងកីឡា ចំពោះការផ្តល់កិច្ចសហប្រតិបត្តិការប្រកបដោយការយកចិត្តទុកដាក់ខ្ពស់ ដែលបានរួមចំណែកជំរុញគម្រោង Physical Education នៅតាមសាលាកន្លងមកទទួលបានជោគជ័យត្រចះត្រចង់ និងបានរាយការណ៍អំពីវឌ្ឍនៈភាពនៃការអនុវត្តគម្រោងអភិវឌ្ឍន៍វិទ្យាស្ថានជាតិអប់រំកាយសម្បទា និងកីឡា ឱ្យក្លាយជាគ្រឹះស្ថានឧត្តមសិក្សា (Developing National Institute of Physical Education and Sport – NIPES) ផ្តោតលើការបណ្ដុះបណ្ដាលការអប់រំកាយ និងកីឡាកម្រិតឧត្តមសិក្សារយៈពេល៤ឆ្នាំ តាមរយៈការប្រើប្រាស់ប្រព័ន្ធ ICT ដែលគម្រោងនេះបានចាប់ផ្តើមក្នុងឆ្នាំ ២០២៣ រហូតដល់ ២០២៦ ព្រមទាំងបានសុំអនុសាសន៍ពាក់ព័ន្ធនឹងការដាក់សំណើស្របតាមផ្លូវច្បាប់នៃព្រះរាជាណាចក្រកម្ពុជា ក្នុងការបង្កើតក្រុមប្រឹក្សាភិបាល(Board of Directors) ដើម្បីដឹកនាំគ្រប់គ្រងវិទ្យាសា្ថន។

ជាការឆ្លើយតប ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានឯកភាពលើសំណើបង្កើតក្រុមប្រឹក្សាភិបាល វិទ្យាស្ថានជាតិអប់រំកាយសម្បទា និងកីឡា NIPES ដើម្បីជំរុញប្រសិទ្ធភាពក្នុងការដឹកនាំ និងគ្រប់គ្រងវិទ្យាស្ថានឱ្យមានភាពរលូន និងល្អប្រសើរឡើង ព្រមទាំងបានថ្លែងអំណរគុណយ៉ាងជ្រាលជ្រៅដល់អង្គការបេះដូងមាស និងភាគីពាក់ព័ន្ធទាំងអស់ដែលបានបន្តជួយគាំទ្រលើកកម្ពស់វិស័យអប់រំកាយសម្បទា និងកីឡានៅកម្ពុជាជាបន្តបន្ទាប់ ដោយគូសបញ្ជាក់ពីសារៈសំខាន់នៃការអប់រំកាយសម្បទា (Physical Education) ក្នុងប្រព័ន្ធអប់រំកម្ពុជា ដែលជួយលើកកម្ពស់សុខុមាលភាព សុខភាព និងសមត្ថភាពយុវជនកម្ពុជាឱ្យក្លាយជាកម្លាំងចលករប្រកបដោយសក្តានុពលក្នុងការចូលរួមអភិវឌ្ឍសេដ្ឋកិច្ចសង្គមជាតិប្រកបដោយចីរភាព។

តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងវាយតម្លៃខ្ពស់ចំពោះកិច្ចសហប្រតិបត្តិការជាមួយអង្គការបេះដូងមាស (Heart of Gold) និងក្រុមការងារវិទ្យាស្ថានអប់រំកាយសម្បទា និងកីឡា NIPES ជាពិសេសចូលរួមអបអរសាទរចំពោះវឌ្ឍនភាពគួរជាទីមោទនៈរបស់គម្រោង ក្នុងការអភិវឌ្ឍពីវិទ្យាស្ថានអប់រំកាយ និងកីឡា NIPES ឱ្យក្លាយជាគ្រឹះស្ថានឧត្តមសិក្សាពេញលេញ និងសូមឱ្យបន្តយកចិត្តទុកដាក់ក្នុងការចងក្រងកម្មវិធីសិក្សាប្រកបដោយលក្ខណៈស្តង់ដាសម្រាប់ថ្នាក់បរិញ្ញាបត្រ ដោយបង្ហាញពីការបន្តចូលរួមគាំ្រនូវរាល់គំនិតផ្តួចផ្តើមនានាក្នុងគោលដៅលើកកម្ពស់ការអប់រំ និងការអភិវឌ្ឍធនធានមនុស្សកម្ពុជាប្រកបដោយគុណភាព ឆ្លើយតបនឹងចក្ខុវិស័យរបស់រាជរដ្ឋាភិបាល៕