លោកជំទាវ ពុំ ចន្ទីនី អញ្ជើញសួរសុខទុក្ខអតីតមន្រ្តីសាខាកាកបាទក្រហមកម្ពុជាខេត្តកំពង់ធំ កំពុងមានជំងឺប្រចាំកាយ

ភ្នំពេញ៖ នៅរសៀលថ្ងៃទី៣០ ខែមករា ឆ្នាំ២០២៥ ក្នុងដំណើរបំពេញបេសកកម្មនាខេត្តកំពង់ធំ លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បានឆ្លៀតពេលដឹកនាំក្រុមការងារអញ្ជើញចុះសួរសុខទុក្ខអតីតមន្ត្រីសាខាកាកបាទក្រហមកម្ពុជាខេត្តកំពង់ធំ ចំនួន២នាក់ដែលបាត់បង់សមត្ថភាពការងារ ទី១ លោកស្រី ឌុក សុីដា អាយុ ៦៥ឆ្នាំ អតីតនាយិកាសាខា និងទី២ លោកស្រី ហ៊ផល្លា អាយុ ៥២ឆ្នាំ អតីតប្រធានការិយាល័យអភិវឌ្ឍន៍សាខា អ្នកទាំងពីរកំពុងមានជំងឺប្រចាំកាយ។

ដោយមើលឃើញពីជីវភាពអតីតមន្ត្រីទាំង២មានការខ្វះខាតលោកជំទាវអគ្គលេខាធិការ និងក្រុមការងារបាននាំយកថវិកាមួយចំនួនជួយសម្រួលការលំបាកជូនដល់លោកស្រីទាំងពីរ។ ជាមួយគ្នានេះលោកជំទាវអគ្គលេខាធិការបានពាំនាំប្រសាសន៍ផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងសូមជូនពរអ្នកទាំងពីរឆាប់ជាសះស្បើយ កុំអស់សង្ឃឹមក្នុងជីវិត ខិតខំថែទាំសុខភាពឱ្យបានល្អ ដើម្បីជាម្លប់ដល់ក្រុមគ្រួសារ។

ជាកិច្ចឆ្លើយតប អតីតមន្ត្រីដែលមានជំងឺប្រចាំកាយទាំងពីរខាងលើបានថ្លែងអំណរគុណយ៉ាងជ្រាលជ្រៅបំផុតចំពោះកាកបាទក្រហមកម្ពុជា ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានដែលតែងតែគិតគូរយកចិត្តទុកដាក់និងបានចាត់សហការីចុះសួរសុខទុក្ខអតីតមន្ត្រី បុគ្គលិក ដែលបាត់បង់សមត្ថភាពការងារជាប់ជាប្រចាំ ដោយមិនទុកនរណាម្នាក់ចោលដោយពុំបានដឹងនោះទេ។

សូមជម្រាបថា អតីតមន្ត្រីទាំងពីរខាងលើបានលះបង់កម្លាំងកាយចិត្ត ប្រាជ្ញាស្មារតី តស៊ូ ឆ្លងកាត់ឧបសគ្គរាប់មិនអស់ ដើម្បីបុព្វហេតុមនុស្សធម៌របស់សាខាកាកបាទក្រហមកម្ពុជាខេត្តកំពង់ធំ ក្នុងម្នាក់ៗអស់រយៈពេលជាង៣០ឆ្នាំកន្លងមកហើយ ដោយចាប់ផ្តើមពីអ្នកស្ម័គ្រចិត្តរហូតបានក្លាយជានាយិកា និងមន្ត្រីសាខាកាកបាទក្រហមកម្ពុជាខេត្តកំពង់ធំ។

នៅក្នុងឱកាសនោះដែរ លោកជំទាវ និងក្រុមការងារបន្តចុះសួរសុខទុក្ខ លោក ហង្ស វិច្ឆិកា អាយុ៤២ឆ្នាំ ប្រធានការិយាល័យទំនាក់ទំនងសាធារណៈ និងប្រតិបត្តិការសាលាខេត្តកំពង់ធំ ដែលមានជំងឺសរសៃឈាមបេះដូងកំពុងសង្គ្រោះបន្ទាន់នៅមន្ទីរពេទ្យបង្អែកខេត្តកំពង់ធំផងដែរ៕