ព្រលានយន្តហោះឌូបៃបានបំបែកកំណត់ត្រាអ្នកដំណើរក្នុងឆ្នាំ២០២៤
ឌូបៃ៖ អាកាសយានដ្ឋានអន្តរជាតិឌូបៃ (DXB) នៃប្រទេសអារ៉ាប់រួម (UAE) បានប្រកាសកាលពីថ្ងៃព្រហស្បតិ៍ថា តួលេខចរាចរណ៍អ្នកដំណើរដែលបំបែកកំណត់ត្រាសម្រាប់ឆ្នាំ២០២៤ នៃចំនួន ៩២.៣លាននាក់ កើនឡើងពី ៨៧លាននាក់ក្នុងឆ្នាំ២០២៣។
ឥណ្ឌានៅតែជាទីផ្សារគោលដៅធំបំផុតរបស់ DXB ដោយមានអ្នកដំណើរ ១២លាននាក់ តាមពីក្រោយដោយអារ៉ាប៊ីសាអូឌីត (៧.៦លាននាក់) និងចក្រភពអង់គ្លេស (៦.២លាននាក់) នេះបើយោងតាមការចេញផ្សាយដោយការិយាល័យប្រព័ន្ធផ្សព្វផ្សាយរបស់ DXB។
ទន្ទឹមនឹងនេះដែរ នាយកប្រតិបត្តិនៃអាកាសយានដ្ឋានឌូបៃ លោក Paul Griffiths បានប្រាប់ស៊ីនហួថា ប្រទេសចិននៅតែបន្តជាទីផ្សារដ៏សំខាន់សម្រាប់ DXB ជាមួយនឹងអ្នកដំណើរ ២.១លាននាក់ក្នុងឆ្នាំ២០២៤ កើនឡើង ៣១ភាគរយពីមួយឆ្នាំទៅមួយឆ្នាំ។
លោក Griffiths បានបន្ថែមថា DXB កំពុងកំណត់គោលដៅរបស់ខ្លួនក្នុងការស្វាគមន៍អ្នកដំណើរ ១០០លាននាក់ជារៀងរាល់ឆ្នាំនៅឆ្នាំ២០២៧។
ដោយហៅ DXB ថាជាអាកាសយានដ្ឋានដែលមមាញឹកបំផុតរបស់ពិភពលោកសម្រាប់អ្នកដំណើរអន្តរជាតិ Mohammed bin Rashid អ្នកគ្រប់គ្រងទីក្រុងឌូបៃ និងជាអនុប្រធាន និងជានាយករដ្ឋមន្ត្រីនៃ UAE បានលើកឡើងពីតួនាទីដ៏សំខាន់របស់ព្រលានយន្តហោះក្នុងការពង្រឹងជំហររបស់ឌូបៃជាមជ្ឈមណ្ឌលពាណិជ្ជកម្ម និងទេសចរណ៍ពិភពលោក។