អភិបាលស្រុកសំរោងទង និងក្រុមយុវជនពិសេសសម្តេចតេជោ នឹងរៀបចំកម្មវិធីការចែករំលែកក្តីស្រឡាញ់ និងស្នាមញញឹម នៅសាលាបឋមសិក្សាទួលស្រគំ នាដើមខែក្រោយ
ភ្នំពេញ៖ អភិបាលនៃ អភិបាលស្រុកសំរោងទង រួមជាមួយនឹង ក្រុមយុវជនពិសេសសម្តេចតេជោ បានសហការគ្នាត្រៀមរៀបចំ«កម្មវិធីការចែករំលែកក្តី ស្រឡាញ់ និងស្នាមញញឹមលើកទី១៧» នៅថ្ងៃទី៨ ខែកុម្ភៈ ឆ្នាំ២០២៥ ខាងមុខនេះ នៅក្នុងសាលាបឋមសិក្សាទួលស្រគំ ស្ថិតក្នុងភូមិបាក់ធ្មេញ ឃុំរលាំងចក ស្រុកសំរោងទង ខេត្តកំពង់ស្ពឺ ។
ការត្រៀមរៀបចំកម្មវិធីនេះ បន្ទាប់ពី លោក ហេង សំណាង ក្រុមយុវជនពិសេសសម្តេចតេជោ ដែលមានតំណាងយុវជនលោក ជុំ ហាក់ និងលោក ស្កាយ សេម ប្រធានសាខាខេត្ត ព្រមទាំងសមាជិក សមាគមយុវជនខ្មែរមហានគរ សាខាខេត្ដកំពង់ស្ពឺនាព្រឹកថ្ងៃទី៣១ ខែមករា ឆ្នាំ២០២៥ បានប្រគល់លិខិត និងគោរពសម្តែងការគួរសមដល់ ប្រធានរដ្ឋបាលខេត្តកំពង់ស្ពឺ លោក គង់ ឈុនលី និង លោក មុត ភន អភិបាល នៃគណៈអភិបាលស្រុកសំរោងទង។
គោលបំណងនៃការនៃ«កម្មវិធីការចែករំលែកក្តី ស្រឡាញ់ និងស្នាមញញឹមលើកទី១៧» ធ្វើឡើងដើម្បីចែកសម្ភារសិក្សា ចូលរួមដាំកូនឈើ ទុកជាអនុស្សាវរីយ៍នៅជុំវិញសាលា និងដើម្បីបង្កើនគម្របបៃតង ផ្តល់ខ្យល់អាកាសបរិសុទ្ធ និងបង្កើនសោភ័ណភាពដល់សាលារៀន និងមូលដ្ឋាន។
កម្មវិធីការចែករំលែកក្តី ស្រឡាញ់ និងស្នាមញញឹមលើកទី១៧ នេះភ្ជាប់ជាមួយ កម្មវិធី «ស្តីពីការអប់រំ និងបរិស្ថាន» ដែលស្របទៅតាមគោលនយោបាយរបស់ក្រសួងបរិស្ថានក្នុងវិស័យចក្រា «ភាពស្អាត បៃតង និងចីរភាព» ដឹកនាំដោយឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន ពិសេសជាផ្នែកមួយនៃមុំយុទ្ធសាស្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ ក្រោមការដឹកនាំ ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។
ទាក់ទិននឹងបញ្ហានេះ ឯកឧត្តម ខ្វៃ អាទិត្យា អ្នកនាំពាក្យក្រសួងបរិស្ថាន បានថ្លែងឲ្យដឹងថា កម្មវិធីរបស់ក្រសួងបរិស្ថាន ពិតជាមានសារៈសំខាន់ និង បានបំផុស នៅ ចលនាចូលរួមរបស់ក្មេងៗ ជំនាន់ក្រោយនៅតាមសាលរៀនទូទាំងប្រទេស ប្រមាណ ជាង ៣ លាន ៤ សែន នាក់ ឱ្យមានការយល់ដឹង និងអនុវត្ត ដើម្បីធ្វើឱ្យតាមសាលារៀន ដងផ្លូវ ទី សាធារណៈ តំបន់សហគមន៍ កន្លែងទេសចរណ៍ ជាកន្លែងដែលស្អាត និងគ្មាន ការ ប្រើ ប្រាស់ ថង់ ប្លាស្ទិក និងមានភាពបៃតង មានដើមឈើ មានម្លប់ និងមានខ្យល់អាកាសល្អ ហើយ បានចូលរួមជាមួយ រាជរដ្ឋាភិបាលក្នុងការសម្រេចគោលដៅប្រទេសកម្ពុជា ជាប្រទេសអព្យាក្រឹតកាបូន និង មានគម្របព្រៃ៦០% នៅឆ្នាំ២០៥០៕