យោធាដែលកំពុងកាន់អំណាចរបស់ប្រទេសមីយ៉ាន់ម៉ា បន្តដាក់ប្រទេសក្នុងស្ថានភាពអាសន្នរយៈពេលប្រាំមួយខែទៀត

ណៃពិដោ៖ នៅថ្ងៃសុក្រទី៣១ ខែមករា ប្រព័ន្ធផ្សព្វផ្សាយរដ្ឋមីយ៉ាន់ម៉ា រាយការណ៍ថា យោធាដែលកំពុងកាន់អំណាចរបស់ប្រទេសមីយ៉ាន់ម៉ា បានបន្តដាក់ប្រទេសក្នុងស្ថានភាពអាសន្នរយៈពេលប្រាំមួយខែទៀត មួយថ្ងៃមុនថ្ងៃគម្រប់ខួប៤ឆ្នាំនៃរដ្ឋប្រហារ ដែលបានធ្វើឱ្យប្រទេសនេះធ្លាក់ចូលទៅក្នុងភាពវឹកវរ។

ប្រព័ន្ធផ្សព្វផ្សាយរដ្ឋមីយ៉ាន់ម៉ា MRTV បានបញ្ជាក់នៅលើតេឡេក្រាមថា៖«នៅមានកិច្ចការជាច្រើនទៀត ដែលត្រូវធ្វើដើម្បីរៀបចំការបោះឆ្នោតសកលប្រកបដោយជោគជ័យ។ ជាពិសេស សម្រាប់ការបោះឆ្នោតដោយសេរី និងយុត្តិធម៌ ស្ថិរភាព និងសន្តិភាពនៅតែត្រូវការជាចាំបាច់»។

យ៉ាងណាមិញ របបសឹកមិនទាន់បានកំណត់កាលបរិច្ឆេទសម្រាប់ការបោះឆ្នោតនោះទេ។ ទោះបីជាមានការប្រយុទ្ធគ្នា សេដ្ឋកិច្ចកំពុងធ្លាក់ចុះ និងគណបក្សនយោបាយរាប់សិបត្រូវបានហាមឃាត់ ឬបដិសេធមិនចូលរួមក៏ដោយ ក៏របបយោធាបានប្តេជ្ញាចិត្តរៀបចំការបោះឆ្នោត។ ក្រុមអ្នកប្រឆាំងរដ្ឋាភិបាលយោធាបានជំរុញប្រទេសផ្សេងទៀតមិនឱ្យទទួលស្គាល់លទ្ធផល ដោយនិយាយថា វានឹងធ្វើឡើងប្រឆាំងនឹងឆន្ទៈរបស់ប្រជាជន។

គួរបញ្ជាក់ថា មីយ៉ាន់ម៉ាត្រូវបានជាប់គាំងនៅក្នុងសង្គ្រាមស៊ីវិល ដែលបង្កឡើងដោយការផ្តួលរំលំរដ្ឋាភិបាលស៊ីវិលជាប់ឆ្នោតរបស់លោកស្រី អ៊ុងសាន ស៊ូជី។ របបយោធាគ្រោងនឹងរៀបចំការបោះឆ្នោតនៅឆ្នាំនេះ៕