លោក ដូណាល់ ត្រាំ ព្រមានគំរាមដាក់ពន្ធ១០០ភាគរយជាថ្មីម្ដងទៀត លើប្រទេសសមាជិក BRICS បើហ៊ានប្រើរូបិយបណ្ណថ្មីជំនួសប្រាក់ដុល្លារ

វ៉ាស៊ីនតោន៖ លោក ដូណាល់ ត្រាំ ប្រធានាធិបតីសហរដ្ឋអាម៉េរិក បានព្រមានគំរាមដាក់ពន្ធ១០០ភាគរយជាថ្មីម្ដងទៀត លើប្រទេសសមាជិក BRICS បើហ៊ានប្រើរូបិយបណ្ណថ្មីជំនួសប្រាក់ដុល្លាររបស់ខ្លួន។

លោក ត្រាំ បានរៀបរាប់នៅលើកម្មវិធី Truth Social ថា៖«យើងនឹងទាមទារឱ្យមានការប្តេជ្ញាចិត្តពីប្រទេសទាំងនេះ ថាពួកគេនឹងមិនបង្កើតរូបិយបណ្ណ BRICS ថ្មី ឬប្រើប្រាស់រូបិយបណ្ណផ្សេងទៀត ជំនួសប្រាក់ដុល្លារអាម៉េរិក បើមិនដូច្នេះទេ ពួកគេនឹងប្រឈមមុខនឹងពន្ធ១០០ភាគរយ»។

ការអះអាងនេះ ស្ទើរតែដូចគ្នាទៅនឹងអ្វីដែលលោកបានបង្ហោះកាលពីថ្ងៃទី៣០ ខែវិច្ឆិកាឆ្នាំមុន។ នៅពេលនោះ រុស្ស៊ីប្រតិកម្មថា រាល់ការប៉ុនប៉ងរបស់សហរដ្ឋអាម៉េរិក ក្នុងការបង្ខំឱ្យប្រើប្រាស់ប្រាក់ដុល្លារនឹងនាំមកនូវផលវិបាក។ ឥទ្ធិពលប្រាក់ដុល្លារ បានគ្រប់ដណ្ដប់លើសេដ្ឋកិច្ចពិភពលោក កំពុងកើនឡើងក្នុងរយៈពេលចុងក្រោយនេះ ដោយសារសេដ្ឋកិច្ចអាម៉េរិករឹងមាំ គោលនយោបាយរូបិយវត្ថុកាន់តែតឹងតែង និងហានិភ័យភូមិសាស្ត្រនយោបាយកើនឡើង បើទោះបីជាការបែងចែកសេដ្ឋកិច្ចដែលជំរុញដោយប្រទេស BRICS ផ្លាស់ប្ដូរពីប្រាក់ដុល្លារទៅជារូបិយបណ្ណផ្សេងទៀត។

ការសិក្សាដោយមជ្ឈមណ្ឌល GeoEconomics របស់ក្រុមប្រឹក្សាអាត្លង់ទិច កាលពីឆ្នាំមុន បានបង្ហាញថា ប្រាក់ដុល្លារអាម៉េរិកនៅតែជារូបិយបណ្ណបម្រុងចម្បងរបស់ពិភពលោក ហើយទាំងប្រាក់អឺរ៉ូ ឬរូបិយបណ្ណរបស់ប្រទេស BRICS មិនអាចកាត់បន្ថយការពឹងផ្អែកជាសកលលើប្រាក់ដុល្លារបានទេ។ ក្រុម BRICS រួមមាន៖ ប្រេស៊ីល រុស្ស៊ី ឥណ្ឌា ចិន និងអាហ្រ្វិកខាងត្បូង និងប្រទេសមួយចំនួនទៀតដែលបានចូលរួមកាលពីប៉ុន្មានឆ្នាំមុន។ ក្រុមនេះបានបន្ថែមប្រទេសអេហ្ស៊ីប អេត្យូពី អ៊ីរ៉ង់ និងអារ៉ាប់រួមនៅឆ្នាំ២០២៣ ហើយឥណ្ឌូណេស៊ីបានក្លាយជាសមាជិកកាលពីដើមខែនេះ៕