ក្រសួងវប្បធម៌ នឹងកោះហៅអ្នកផលិតបទចម្រៀងណា ដែលប្រើប្រាស់ពាក្យអសុរោះ និងកាយវិការមិនសមរម្យមកអប់រំណែនាំ

ភ្នំពេញ៖ ឯកឧត្ដម ស៊ុំ ម៉ាប់ អ្នកនាំពាក្យក្រសួងវប្បធម៌ និងនិងវិចិត្រសិល្ប: បានបញ្ជាក់ថា ក្រសួងវប្បធម៌ និងវិចិត្រសិល្ប: តាមរយៈនាយកដ្ឋានភាពយន្ត ដែលជាសេនាធិការរបស់ខ្លួន នឹងកោះហៅអ្នកផលិតបទចម្រៀងណាដែលប្រើប្រាស់ពាក្យអសុរោះ និងកាយវិការមិនសមរម្យមកអប់រំណែនាំឱ្យបញ្ឈប់ការផ្សព្វផ្សាយ។

ឯកឧត្ដម ស៊ុំ ម៉ាប់ អ្នកនាំពាក្យក្រសួងវប្បធម៌ បន្ថែមថា រាល់បទចម្រៀងទាំងហ្លាយណាដែលផលិតឡើងដោយប្រើពាក្យពេចន៍មិនល្អ ហើយត្រូវបានមហាជនរិះគន់ក្នុងន័យស្ថាបនា ក្រសួងនឹងពិនិត្យមើល ហើយស្នើឱ្យឈប់ការផ្សព្វផ្សាយ។

ជាមួយគ្នានោះឯកឧត្ដម គូសបញ្ជាក់ថា ចំពោះបទចំរៀង«ថីអ្ហែងថី»របស់លោក ងួន ចាន់ដេវីដ ក៏ទទួលបានការរិគន់តាមបណ្តាញសង្គម ថាជាទម្រង់មិនគួរ នាយកដ្ឋានភាពយន្ត និងមានចំណាត់ការដោះស្រាយ។ តែយ៉ាងណា ចំពោះកិច្ចការទម្លាក់មិនឱ្យផ្សាយឬយ៉ាងណា ក្រសួងទុកជូននាយកដ្ឋានជួបគ្នាដោះស្រាយ ហើយស្នើសុំទៅម្ចាស់បទ។ ឯកឧត្ដមថា «ជាការជជែកគ្នា មិនជាមានវិធានការអីធំដុំនោះទេ ព្រោះសុទ្ធតែជាវិស័ឯកជនដែលចូលរួមលើកតម្កើងសិល្បៈវប្បធម៌ជាតិ»។

ឯកឧត្ដម ស៊ុំ ម៉ាប់ ក៏បានពន្យល់ថា រាល់ការកោះហៅសិល្បករ-សិល្បការិនី មកអប់រំ គឺមិនសំដៅលើផលិតកម្មណាមួយនោះទេ ឱ្យតែធ្វើខុស ក្រសួងតែងតែហៅមកណែនាំ។ ជាក់ស្តែងកន្លងទៅក្រសួងបានធ្វើកិច្ចការនេះជាប់ជាប្រចាំ និងជាញឹកញាប់ ជាមួយសិល្បករ-សិល្បការិនី មិនថាតែលើអត្ថន័យចម្រៀងនោះទេ គឺរួមបញ្ចូលទាំងកាយវិការ និងសម្លៀកបំពាក់ផងដែរ។ ការធ្វើដូច្នេះក្នុងគោលដៅរក្សាឱ្យបាននៅអត្តសញ្ញាណជាតិ ទំនៀមទម្លាប់ និងសេចក្តីថ្លៃថ្នូក្នុងសង្គម ក្នុងនាមជាប្រជាជនខ្មែរត្រូវតែប្រកាន់ខ្ជាប់៕