ប្រជាជនអេហ្ស៊ីបប្រមូលផ្តុំគ្នានៅជិត Rafah ដើម្បីប្រឆាំងនឹងការផ្លាស់ទីលំនៅរបស់ជនជាតិប៉ាឡេស្ទីន
បរទេស៖ មនុស្សរាប់ពាន់នាក់បានប្រមូលផ្តុំគ្នាកាលពីថ្ងៃសុក្រនៅជិតច្រកឆ្លង Rafah ខាងអេហ្ស៊ីបដែលជាប៉ុស្តិ៍តែមួយគត់ដែលភ្ជាប់អេហ្ស៊ីបជាមួយនឹងតំបន់ Gaza Strip ដើម្បីសម្តែងការប្រឆាំងនឹងការផ្លាស់ទីលំនៅរបស់ប្រជាជនប៉ាឡេស្ទីន។
ទូរទស្សន៍រដ្ឋ Nile TV បានបង្ហាញក្រុមបាតុករគ្រវីទង់ជាតិអេហ្ស៊ីប និងប៉ាឡេស្ទីន និងលើកស្លាកដែលសរសេរថា «ទេចំពោះការផ្លាស់ទីលំនៅ»។
ក្រុមបាតុកររួមមានឥស្សរជននយោបាយមកពីសភាអេហ្ស៊ីប និងពលរដ្ឋដែលបានស្រែកទ្រហោយំបដិសេធការអំពាវនាវឱ្យផ្លាស់ទីលំនៅប្រជាជនប៉ាឡេស្ទីនពីទឹកដីរបស់ពួកគេទៅអេហ្ស៊ីប និងហ្ស៊កដានី។
កាលពីថ្ងៃព្រហស្បតិ៍ ប្រធានាធិបតីអាមេរិក លោក ដូណាល់ ត្រាំ បានទទូចថា អេហ្ស៊ីប និងហ្ស៊កដានី នឹងអនុវត្តតាមសំណើដ៏ចម្រូងចម្រាសរបស់លោក ក្នុងការផ្លាស់ទីលំនៅប្រជាជនប៉ាឡេស្ទីនពីតំបន់ហ្គាហ្សា ទៅកាន់ប្រទេសទាំងពីរ។
កាលពីថ្ងៃពុធ ប្រធានាធិបតីអេហ្ស៊ីប លោក Abdel-Fattah al-Sisi បានឲ្យដឹងថា ការផ្លាស់ទីលំនៅរបស់ប្រជាជនប៉ាឡេស្ទីន គឺជាទង្វើនៃអយុត្តិធម៌ ដែលអេហ្ស៊ីបនឹងមិនចូលរួម។
