ទេសរដ្ឋមន្រ្តី គន់ គីម ចុះជួបប្រជាកសិករដែលបង្កបង្កើនផលស្រូវប្រាំងជួបប្រទះការខ្វះខាតទឹកស្រោចស្រព នៅស្រុកគាស់ក្រឡ

ភ្នំពេញ៖ នាព្រឹកថ្ងៃទី៣១ ខែមករា ឆ្នាំ២០២៥ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង បានអញ្ជើញអមដំណើរ ឯកឧត្តមនាយឧត្តមសេនីយ៍ កិត្តិសង្គហបណ្ឌិត គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានអញ្ជើញជួបសំណេះសំណាលសួរសុខទុក្ខ ជាមួយបងប្អូនប្រជាកសិករដែលបានបង្កបង្កើនផលស្រូវប្រាំងកំពុងជួបប្រទះការខ្វះខាតទឹក នៅក្នុងឃុំហប់ និងឃុំធិបតី ស្រុកគាស់ក្រឡ ខេត្តបាត់ដំបង។

ក្នុងដំណើរបេសកកម្មនេះ អាជ្ញាធរខេត្តបានធ្វើការត្រួតពិនិត្យជាក់ស្តែង ពាក់ព័ន្ធនិងការខ្វះខាតទឹកស្រោចស្រពដំណាំស្រូវនៅរដូវរប្រាំងក្នុងឃុំទាំងពីរនេះមានប្រជាកសិករកំពុងអាស្រ័យផលប្រមាណជាង៥០០គ្រួសារ មានផ្ទៃដីសរុបប្រមាណ១,១១៦ហិកតា និងបានស្នើឱ្យស្ថាប័នពាក់ព័ន្ធ មន្ទីរអង្គភាពជំនាញ ជួយរកដំណោះស្រាយសង្គ្រោះស្រូវ ដែលកំពុងខ្វះខាតទឹក ស្ថិតនៅឃុំហប់ និងឃុំធិបតី ស្រុកគាស់ក្រឡ ខេត្តបាត់ដំបងយើងនេះ។

តបតាមសំណើររបស់ប្រជាកសិករ ឯកឧត្តមទេសរដ្ឋមន្ត្រី គន់ គីម បានទទួលនូវសំណើររបស់កសិករ ក្នុងការជួយរកដំណោះស្រាយ ជូនពួកគាត់នៅរដូវប្រាំងដែលខ្វះទឹកស្រោចស្រព ដោយជួយកាយស្តារ និងជីកប្រឡាយទឹកសងខាងផ្លូវ និងរកប្រភពទឹកជូនតាមលទ្ធភាពនាពេលខាងមុខបន្តទៀត ដើម្បីអាចជួយដោះស្រាយបញ្ហាប្រឈមជូនប្រជាកសិករបានទាន់ពេលវេលា ប្រកបដោយប្រសិទ្ធភាព និងប្រសិទ្ធផលខ្ពស់៕