តៃវ៉ាន់ ណែនាំឱ្យនាយកដ្ឋានរដ្ឋាភិបាល មិនគួរប្រើប្រាស់សេវាកម្មបញ្ញាសិប្បនិមិត្ត (AI) DeepSeek របស់ចិននោះទេ
បរទេស៖ ក្រសួងឌីជីថលរបស់កោះតៃវ៉ាន់ បានចេញសេចក្តីណែនាំឱ្យនាយកដ្ឋានរដ្ឋាភិបាល មិនគួរប្រើប្រាស់សេវាកម្មបញ្ញាសិប្បនិមិត្ត (AI) DeepSeek របស់ចិននោះទេ ដោយលើកឡើងពីការព្រួយបារម្ភអំពីសុវត្ថិភាព។
តៃវ៉ាន់បានប្រុងប្រយ័ត្នជាយូរមកហើយចំពោះបច្ចេកវិទ្យារបស់ចិន, នៅក្នុងសេចក្តីថ្លែងការណ៍មួយ ក្រសួងកិច្ចការឌីជីថលតៃវ៉ាន់ បានរៀបរាប់ថា នាយកដ្ឋានរដ្ឋាភិបាលមិនត្រូវបានអនុញ្ញាតឱ្យប្រើប្រាស់សេវាកម្ម AI របស់កម្មវិធី DeepSeek ដើម្បីការពារហានិភ័យសុវត្ថិភាពព័ត៌មាន។
ក្រសួងបន្តថា DeepSeek គឺជាផលិតផលរបស់ចិន ហើយប្រតិបត្តិការរបស់វាពាក់ព័ន្ធនឹងការបញ្ជូនឆ្លងព្រំដែន និងការលេចធ្លាយព័ត៌មាន និងការព្រួយបារម្ភអំពីសុវត្ថិភាពព័ត៌មានផ្សេងទៀត ហើយជាផលិតផលដែលបង្កគ្រោះថ្នាក់ដល់សន្តិសុខព័ត៌មានរបស់ប្រទេស។ ក្រសួងនឹងបន្តរក្សាគោលនយោបាយសន្តិសុខព័ត៌មានរបស់ខ្លួន ដើម្បីការពារសន្តិសុខជាតិ។
នៅព្រឹកថ្ងៃសុក្រទី៣១ ខែមករា ក្រុមឃ្លាំមើលឯកជនភាពព័ត៌មានរបស់ប្រទេសកូរ៉េខាងត្បូង បញ្ជាក់ថា ខ្លួនគ្រោងនឹងសួរទៅកាន់ DeepSeek អំពីរបៀបដែលព័ត៌មានផ្ទាល់ខ្លួនរបស់អ្នកប្រើប្រាស់ត្រូវបានគ្រប់គ្រង។
អាជ្ញាធរនៅប្រទេសបារាំង អ៊ីតាលី និងអៀរឡង់ និងប្រទេសផ្សេងទៀត បាននិងកំពុងពិនិត្យមើលការប្រើប្រាស់ទិន្នន័យផ្ទាល់ខ្លួនរបស់ DeepSeek ផងដែរ។
គួរបញ្ជាក់ថា ជំនួយការ AI ឥតគិតថ្លៃរបស់ DeepSeek បានវ៉ាដាច់គូប្រជែងរបស់សហរដ្ឋអាម៉េរិក ChatGPT ជាកម្មវិធីមានអ្នកទាញយកពី App Store ច្រើនបំផុត។
