អាជីវករលក់ជី និងថ្នាំកសិកម្មទាំងអស់គឺជាដៃគូដ៏សំខាន់របស់ក្រសួងកសិកម្ម ដេីម្បីជួយដល់កសិករ

ភ្នំពេញ៖ ឯកឧត្តម គង់ ច័ន្ទវាសនា រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា អាជីវករលក់ជី និងថ្នាំកសិកម្មទាំងអស់គឺជាដៃគូដ៏សំខាន់របស់ក្រសួងកសិកម្ម រដ្ឋបាលខេត្ត និងមន្ទីរកសិកម្មរាជធានី/ខេត្ត ដេីម្បីជួយដល់កសិករ ។

នាព្រឹកថ្ងៃទី៣ ខែកុម្ភៈ ឆ្នាំ២០២៥ ឯកឧត្តម គង់ ច័ន្ទវាសនា រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ និងឯកឧត្តម វុី សំណាង អភិបាលនៃគណ:អភិបាលខេត្តតាកែវ បានរួមគ្នាជួបសំណេះសំណាលជាមួយអាជីវករលក់ជី និងថ្នាំកសិកម្មក្នុង នៅក្នុងខេត្តតាកែវ ដោយមាន ការចូលរួមពីសំណាក់ថ្នាក់ដឹកនាំ មន្ត្រីពាក់ព័ន្ធ និងអាជីវករចំនួន ២១១នាក់។

ជាកិច្ចចាប់ផ្តេីម ឯកឧត្តមអភិបាលខេត្ត វុី សំណាង បានលេីកឡេីងពីកិច្ចខិតខំរបស់រដ្ឋបាលខេត្ត តាកែវ ក្នុងការចូលរួមអភិវឌ្ឍវិស័យកសិកម្ម និងការដោះស្រាយបញ្ហាប្រឈម នានាជូនប្រជាកសិករ ជាពិសេសការសម្រួលដល់ការ លក់ស្រូវរបស់កសិករក្នុងរដូវប្រមូលផល នាពេលនេះ។

ទន្ទឹមនឹងនេះ ឯកឧត្តម គង់ ច័ន្ទវាសនា បានជម្រាបជូនបងប្អូនអាជីវករអំពីកិច្ចខិតខំប្រឹងប្រែងរបស់រាជរដ្ឋាភិបាល និងក្រសួងកសិកម្ម ក្នុងការជំរុញអភិវឌ្ឍវិស័យកសិកម្ម និង បានលេីកឡេីងពីកម្មវិធីគោលនយោបាយអាទិភាពទី៥ និងទី៦ ដែលផ្តោតលើយន្តការរក្សាលំនឹងថ្លៃកសិផល ការដាក់ពង្រាយមន្ត្រីកសិកម្មឃុំ និងការអភិវឌ្ឍសហគមន៍កសិកម្មទំនើប ដើម្បី កាត់ បន្ថយ ថ្លៃ ដើម ផលិត បង្កេីនប្រាក់ចំណេញ និងលើក កម្ពស់ ជីវភាព ប្រជា កសិករ ។

បន្ថែមពីនេះ ឯកឧត្តមរដ្ឋលេខាធិការ បានគូស បញ្ជាក់ថា អាជីវករលក់ជី និងថ្នាំកសិកម្មទាំងអស់គឺជាដៃគូដ៏សំខាន់របស់ក្រសួងកសិកម្ម រដ្ឋបាលខេត្ត និងមន្ទីរកសិកម្មរាជធានី/ខេត្ត ដេីម្បីជួយដល់កសិករ និងបានលេីកទឹកចិត្តឱ្យអាជីវករទាំងអស់ចូលរួមផ្សព្វផ្សាយអ្វីដែលផ្តល់ផលប្រយោជន៍ដល់កសិករ ពិតប្រាកដ ជាពិសេស បច្ចេកទេសប្រេីប្រាស់ជី និងថ្នាំកសិកម្ម ដេីម្បីជួយកាត់បន្ថយថ្លៃដេីម ផលិតរបស់កសិករ មិនប៉ះពាល់បរិស្ថាន និងមានប្រសិទ្ធភាពខ្ពស់៕