អគ្គនាយករដ្ឋបាល លើកពីបញ្ហាប្រឈម ៨ចំណុច ដែលខ្លួនជួបប្រទះក្នុងការបំពេញភារកិច្ចកន្លងមក

ភ្នំពេញ៖ តាមរយៈរបាយការណ៍សកម្មភាព និងលទ្ធផលការងារប្រចាំខែមករា និងទិសដៅ អនុវត្តការងារបន្តសម្រាប់ខែកុម្ភៈ ឆ្នាំ២០២៥ អគ្គនាយកដ្ឋានរដ្ឋបាល បានបញ្ជាក់ថា ទន្ទឹមនឹងលទ្ធផលសម្រេចបាន ក្នុងការបំពេញភារកិច្ចកន្លងមក អគ្គនាយកដ្ឋានរដ្ឋបាលបាន ជួបប្រទះនូវបញ្ហាប្រឈមមួយចំនួនដូចខាងក្រោម៖

– អគ្គនាយកដ្ឋានរដ្ឋបាលតែងតែទទួលបានការចាត់តាំង និងការអញ្ជើញចូលរួមប្រជុំជាច្រើននៅតាមក្រសួង ដែលករណីខ្លះការបញ្ជូនលិខិតអញ្ជើញមានភាពយឺតយ៉ាវ និងករណីខ្លះជាការអញ្ជើញប្រជុំលក្ខណៈបន្ទាន់ ដែល ធ្វើឱ្យជួបការលំបាកក្នុងការចាត់តាំងមន្ត្រី និងការត្រៀមឯកសារខ្លឹមសារសម្រាប់ចូលរួមកិច្ចប្រជុំ
ថវិកាដែលអនុម័តឱ្យមកអគ្គនាយកដ្ឋានរដ្ឋបាលពុំសមស្របនឹងទំហំការងារដែលមានការកើនឡើងជា រៀងរាល់ឆ្នាំ

– ការចុះបេសកកម្មនៅតាមបណ្តាខេត្តនានា ដើម្បីគាំទ្រដល់ការអនុវត្តការងាររបស់រដ្ឋបាលថ្នាក់ក្រោមជាតិ នៅតែជួបបញ្ហាប្រឈម និងការលំបាកទាំងមធ្យោបាយធ្វើដំណើរ និងថវិកា
– ការបណ្តុះបណ្តាល និងកសាងធនធានមនុស្ស នៅតែជាតម្រូវការចាំបាច់ដែលត្រូវខិតខំពង្រឹងបន្ថែម ព្រមទាំង ការគិតគូរអំពីការពង្រឹងសមត្ថភាពទាំងផ្នែកទន់ និងផ្នែករឹងលើបច្ចេកវិទ្យាឌីជីថល

– កិច្ចការដ៏ចម្បងមួយរបស់អគ្គនាយកដ្ឋានរដ្ឋបាល គឺការតាក់តែងលិខិតបទដ្ឋានគតិយុត្ត និងយន្តការតាមដាន និងត្រួតពិនិត្យ ដើម្បីពង្រឹងការគ្រប់គ្រង និងលើកកម្ពស់ប្រសិទ្ធភាពការងារនៅរដ្ឋបាលថ្នាក់ក្រោមជាតិ ដែលកិច្ចការខ្លះ មានលក្ខណៈបច្ចេកទេស និងទិដ្ឋភាពច្បាប់ច្រើន ទាមទារឱ្យមានការសិក្សាស្រាវជ្រាវ និងទស្សនកិច្ចសិក្សាស្វែងយល់
បន្ថែមនៅបរទេស ឬត្រូវការជំនួយបន្ថែមពីទីប្រឹក្សាជាតិ និងអន្តរជាតិ

– ការចរាចរលិខិតស្នាមរដ្ឋបាលផ្ទៃក្នុងត្រូវការចំណាយពេលច្រើន ប៉ុន្តែលិខិតស្នាមខ្លះជាការងារប្រញាប់ ដែល ត្រូវចាត់ចែងជាបន្ទាន់ និងឱ្យបានទាន់ពេលវេលាកំណត់
– ទំនាក់ទំនងការងារ និងការផ្តល់របាយការណ៍ ឬព័ត៌មានមួយចំនួនពីក្រសួង ស្ថាប័ន និងរដ្ឋបាលរាជធានី ខេត្តជូនមកអគ្គនាយកដ្ឋានរដ្ឋបាលពុំទាន់បានរលូនគ្រប់ជ្រុងជ្រោយ និងទាន់ពេលវេលា
– អគ្គនាយកដ្ឋានរដ្ឋបាលមិនទាន់បានក្លាយជាអង្គភាពថវិកាកម្មវិធីពេញលេញនៅឡើយធ្វើឱ្យការអនុវត្ត គម្រោងផែនការសកម្មភាព និងថវិកាប្រចាំឆ្នាំជួបការលំបាក និងមានភាពយឺតយ៉ាវ ៕