រដ្ឋាភិបាលជប៉ុន ផ្ដល់ជំនួយឥតសំណង ៣២១ ៧២០ដុល្លារ ដល់កម្ពុជា
ភ្នំពេញ៖ ឯកឧត្ដម ឃួង ស្រេង អភិបាលរាជធានីភ្នំពេញ កាលពីថ្ងៃទី១៩កុម្ភៈ ឆ្នាំ២០២៥ បានចុះហត្ថលេខាលើកិច្ចសន្យាទទួលជំនួយឥតសំណងរបស់រដ្ឋាភិបាលជប៉ុន ចំនួន៣២១ ៧២០ដុល្លារអាម៉េរិក។
ពិធីចុះហត្ថលេខាផ្តល់ជំនួយខាងលើ ធ្វើទ្បើងនៅស្ថានទូតជប៉ុន ដោយលោក អ៊ូអិណុ អាត់ស៊ូស៊ី ឯកអគ្គរាជទូតជប៉ុនប្រចាំកម្ពុជា បានចុះហត្ថលេខាជាមួយ លោក ឃួង ស្រេង លើកិច្ចសន្យាផ្តល់ជំនួយរួមមាន៖ ទី១.គម្រោងធ្វើលទ្ធកម្មរថយន្តបាញ់ផ្សែងរបស់ជប៉ុន នៅរាជធានីភ្នំពេញ ក្នុងថវិកាចំនួន៨៣៦៧២ដុល្លារអាម៉េរិក។ រថយន្តនេះ មានមុខងារនឹងជួយឱ្យក្រុមការងារពន្លត់អគ្គិភ័យមានលទ្ធភាពបាញ់ផ្សែងចេញពីអគារមានឧប្បត្តិហេតុអគ្គិភ័យ និងបង្កលក្ខណៈងាយស្រួលដល់ប្រតិបត្តិការសង្រ្គោះ។ ទី២. គម្រោងធ្វើលទ្ធកម្មរថយន្តពន្លត់អគិ្គភ័យ និងរថយន្តសង្រ្គោះបន្ទាន់ ប្រើប្រាស់រួចនៅរាជធានីភ្នំពេញ ក្នុងថវិកាចំនួន១៥៤៣៧៦ដុល្លារអាម៉េរិក។ គម្រោងនេះ នឹងផ្ដល់ជូននូវរថយន្តសង្រ្គោះបន្ទាន់ចំនួន០១គ្រឿង និងរថយន្តពន្លត់អគ្គិភ័យបំពាក់ជណ្តើរកម្ពស់៤០ម៉ែត្រ ចំនួន០១គ្រឿង។
ជាមួយគ្នាឯកឧត្ដម ឃួង ស្រេង ក៏បានថ្លែងអំណរគុណយ៉ាងជ្រាលជ្រៅដល់រដ្ឋាភិបាលនិងប្រជាជនជប៉ុន តាមរយៈស្ថានទូតជប៉ុន ដែលបានផ្តល់ជំនួយឧបត្ថម្ភជាថវិកា សម្ភារ និងបច្ចេកទេសក្នុងដំណើរការស្តារ កសាង និងអភិវឌ្ឍន៍រាជធានីភ្នំពេញជារៀងរហូតមក ជាពិសេសគម្រោងដែលបានចុះហត្ថលេខានាពេលនេះ គឺមិនត្រឹមតែបានគាំទ្រដល់ការធ្វើឱ្យប្រសើរឡើងនូវសមត្ថភាពពន្លត់អគ្គិភ័យប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់ក្នុងការរឹតចំណងមិត្តភាព សាមគ្គីភាព និងកិច្ចសហប្រតិបត្តិការល្អរវាងប្រទេសទាំងពីរឱ្យកាន់តែរឹងមាំ និងស្ថិតស្ថេរគង់វង្សជានិច្ចនិរន្តន៍។ ទន្ទឹមនោះ លោកឯកអគ្គរាជទូត រំពឹងថា ជំនួយឥតសំណងទាំងនេះនឹងរួមចំណែក ដល់ការអនុវត្តសមត្ថភាពពន្លត់អគ្គិភ័យក្នុងរាជធានីភ្នំពេញ៕
