ទូរទស្សន៍ CNBC TV18៖ ការដំឡើងពន្ធ២៥ភាគរយ ដែលត្រូវបានស្នើឡើងទៅលើគ្រប់ប្រភេទឱសថដែលនាំចូលក្នុងសហរដ្ឋអាមេរិក អាចប៉ះពាល់ដល់ក្រុមហ៊ុនឥណ្ឌាជាច្រើន

បរទេស៖ យោងតាមការចេញផ្សាយរបស់ RT ដែលបានដកស្រង់ព័ត៌មានចេញពីទូរទស្សន៍ CNBC TV18 បានឱ្យដឹងថា ការដំឡើងពន្ធ២៥ភាគរយ ដែលត្រូវបានស្នើឡើងទៅលើគ្រប់ប្រភេទ ឱសថដែលនាំចូលក្នុងសហរដ្ឋអាមេរិក អាចប៉ះពាល់ដល់ក្រុមហ៊ុនឥណ្ឌាជាច្រើន និងអាចនាំឱ្យមានការរំខានដល់ខ្សែសង្វាក់ផ្គត់ផ្គង់ និងការកើនឡើងថ្លៃដើម សម្រាប់អ្នកប្រើប្រាស់អាមេរិកខ្លួនឯង។

កាលពីថ្ងៃអង្គារ ប្រធានាធិបតីអាមេរិកលោក Donald Trump បានប្រាប់អ្នកសារព័ត៌មាន នៅឯវិមានលំនៅដ្ឋានរបស់លោក Mar-a-Lago របស់គាត់ថា ពន្ធតាមវិស័យលើឱសថ និងសារធាតុដើម្បីផលិតបន្ទះឈីបឬ semiconductor នឹងចាប់ផ្តើមនៅ ក្នុងកម្រិតតម្លើង២៥ភាគរយ ឬខ្ពស់ជាងនេះ។

លោក Trump បានកត់សម្គាល់ថាពន្ធគយនឹង មិនអាចអនុវត្តបានចំពោះក្រុមហ៊ុនឱសថ ដែលមានរោងចក្រនៅសហរដ្ឋអាមេរិកទេ ហើយយើង ចង់ ផ្តល់ ពេល ឱ្យ ពួកគេ ចូល មក វិញ ព្រោះ ដូច ដែល អ្នក ដឹង ហើយ ថា ពេល ពួកគេ ចូល ក្នុង សហរដ្ឋ អាមេរិក ហើយ ពួកគេ មាន រោងចក្រ ដែលមិនត្រុវបង់ ពន្ធជាច្រើនផ្សេងទៀត។ ដូច្នេះ យើង ចង់ ផ្តល់ ឱកាស ឲ្យ ពួកគេ បន្តិច បន្តួចប៉ុណ្ណោះដើម្បីកែប្រែ។

ការនាំចេញឱសថរបស់ឥណ្ឌាទៅកាន់សហរដ្ឋអាមេរិកត្រូវបានគេប៉ាន់ប្រមាណថាមានចំនួន ៨,៧៣ពាន់លានដុល្លារ ក្នុងឆ្នាំសារពើពន្ធ២០២៤ ដែលជាការកើនឡើងជិត១៦ភាគរយកាលពីឆ្នាំមុន ដែលស្មើនឹងប្រហែល ៣១ភាគរយ នៃការនាំចេញសរុបរបស់ឧស្សាហកម្ម នេះបើយោងតាមស្ថាប័នពាណិជ្ជកម្ម ដែលគាំទ្រដោយរដ្ឋាភិបាល ក្រុមប្រឹក្សាលើកកម្ពស់ការ នាំចេញឱសថនៃប្រទេសឥណ្ឌា (Pharmexcil) ។

គួរឲ្យដឹងដែរថាការវិវឌ្ឍន៍នេះកើតឡើង បន្ទាប់ពីនាយករដ្ឋមន្ត្រីឥណ្ឌា Narendra Modi បានជួបលោក Trump ក្នុងទីក្រុងវ៉ាស៊ីនតោនកាលពីសប្តាហ៍មុន ដើម្បីចរចាកិច្ចព្រមព្រៀងពាណិជ្ជកម្ម រវាងប្រទេសទាំងពីរប្រទេស៕