រដ្ឋបាលខេត្តរតនគិរី ជំរុញនិងលើកទឹកចិត្តដល់វិស័យឯកជន ក៏ដូចជាក្រុមហ៊ុនវិនិយោគឱ្យមកបណ្តាក់ទុនរកស៊ីនៅក្នុងខេត្ត
ភ្នំពេញ៖ រដ្ឋបាលខេត្តរតនគិរី បានជំរុញ និងលើកទឹកចិត្តដល់វិស័យឯកជន ក៏ដូចជាក្រុមហ៊ុនវិនិយោគជាច្រើនឱ្យមកបណ្តាក់ទុនរកស៊ីនៅក្នុងខេត្តនេះ។
រដ្ឋបាលខេត្តរតនគិរី បានដាក់ចេញទិសដៅអភិវឌ្ឍន៍អាទិភាពលើវិស័យសិកម្ម និងវិស័យសំខាន់ៗជាច្រើន ជាក់ស្តែងវិស័យកសិកម្ម មានការអភិវឌ្ឍ និងរីកចម្រើនជាបន្តបន្ទាប់ ដែលធានាបាននូវការផ្គត់ផ្គង់ស្បៀងគ្រប់គ្រាន់ និងសល់សម្រាប់ការនាំចេញ។
មន្ទីរព័ត៌មានខេត្តរតនគិរី នៅរសៀលថ្ងៃទី១២មីនានេះ បានឱ្យដឹងថា បច្ចុប្បន្ន មានក្រុមហ៊ុនចំនួន១៣៦ សាខាក្រុមហ៊ុនចំនួន៤៦ និងសហគ្រាសចំនួន៦០។ ក្រៅពីនេះ នៅមានក្រុមហ៊ុនដីសម្បទានសេដ្ឋកិច្ចចំនួន២៧ ក្នុងនោះ ក្រុមហ៊ុនវៀតណាម មានចំនួន១៣ ក្រុមហ៊ុនចិនមានចំនួន៣ ក្រុមហ៊ុនឥណ្ឌាចំនួន១ និងក្រុមហ៊ុនក្នុងស្រុកមានចំនួន១០ វិនិយោគលើដំណាំកសិកម្ម កសិ-ឧស្សាហកម្ម និងចិញ្ចឹមគោយកសាច់។
មន្ទីរព័ត៌មានខេត្តរតនគិរី បន្ថែមថា ការដាក់ចេញទិសដៅជាយុទ្ធសាស្ត្រក្នុងការអភិវឌ្ឍ ដោយផ្តល់ជាអាទិភាពលើវិស័យសំខាន់ៗមួយចំនួន គឺអនុវត្តតាមកម្មវិធីនយោបាយ និងយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលកម្ពុជា ដើម្បីកំណើន ការងារ សមធម៌ ប្រសិទ្ធភាព និងចីរភាព។
មន្ទីរព័ត៌មានខេត្តរតនគិរី ថែមទាំងអះអាងទៀតថា ថ្នាក់ដឹកនាំ មន្ត្រីរាជការ និងពលរដ្ឋក្នុងខេត្តរតនគិរី កំពុងខិតខំអនុវត្តការងារ យ៉ាងសកម្ម ដើម្បីសម្រេចឱ្យបានជោគជ័យនូវភារកិច្ចរបស់ខ្លួន ស្របតាមកម្មវិធីនយោបាយរបស់រាជរដ្ឋាភិបាល គឺការធានាបាននូវសុខសុវត្តិភាព ស្ថេរភាពនយោបាយ ការអភិវឌ្ឍសេដ្ឋកិច្ច សង្គមកិច្ច ការការពារធនធានធម្មជាតិ និងបរិស្ថាន៕ 
